Gal 6 | KaaIBT22L | STEP | Tuwısqanlar! Eger birewdiń gúna islegeni málim bolıp qalsa, Muxaddes Ruwxqa boysınıp jasap atırǵan sizler bunday adamdı múláyimlik penen tuwrı jolǵa salıńlar. Sizler de azǵırılmawıńız ushın ózlerińizge saq bolıńlar.

‏ Galatians 6

Jaqsılıq qılıwdan jalıqpańlar!

1 Tuwısqanlar! Eger birewdiń gúna islegeni málim bolıp qalsa, Muxaddes Ruwxqa boysınıp jasap atırǵan sizler bunday adamdı múláyimlik penen tuwrı jolǵa salıńlar. Sizler de azǵırılmawıńız ushın ózlerińizge saq bolıńlar. 2 Bir-birińizdiń awırmanlıǵıńızdı kóterińler. Sonda Masiyxtıń Nızamın orınlaysızlar. 3 Eger kim de kim hesh nárse bolmasa da, ózin áhmiyetli adam dep esaplasa, óz-ózin aldaǵan boladı. 4 Hár bir adam óz is-háreketin tekserip kórsin. Sonda ózin basqalar menen salıstırmay, óz tabısları menen maqtana aladı. 5 Sebebi hár bir adam óz awırmanlıǵın ózi kóteriwi tiyis.

6 Qudaydıń sózin úyreniwshi ustazı menen barlıq iygilikli nárselerdi bólissin.

7 Óz-ózińizdi aldamańlar, Qudaydı aldaw múmkin emes. Adam ne ekse, sonı oradı. 8 Óziniń gúnakar tábiyatına boysınıwshı sol tábiyatqa tán ólim aladı. Muxaddes Ruwxqa boysınıwshı Muxaddes Ruwxqa tán máńgilik ómirdi aladı. 9 Solay eken, jaqsılıq islewden jalıqpańlar. Eger hálsizlenip qalmasaq, waqtı kelgende jemisin orıp alamız. 10 Sonlıqtan múmkinshiligimiz bar eken, hámme adamǵa, ásirese iseniwshi tuwısqanlarımızǵa jaqsılıq isleyik.

Sońǵı eskertiwler hám sálemnamalar

11 Qarańlar, óz qolım menen sizlerge qanday úlken háripler menen jazıp atırman! 12 Sırtqı kórinisi menen adamlarǵa unaǵısı kelgenler Masiyxtıń atanaq aǵashı sebepli quwdalanbaw ushın, sizlerdi súnnet etiliwge májbúrlemekte. 13 Biraq, súnnet etilgenlerdiń ózleri de Muxaddes Nızamdı orınlamaydı. Olar tek sizlerdiń denelerińiz benen maqtanıw ushın ǵana súnnet etiliwińizdi qálep atır.

14 Al men Iyemiz Iysa Masiyxtıń atanaq aǵashınan basqa bir nárse menen hesh qashan maqtanbayman. Usı atanaq aǵash arqalı dúnya men ushın ólgen, men de dúnya ushın ólgenmen. 15 Súnnetleniwdiń de, súnnetlenbewdiń de hesh qanday áhmiyeti joq, áhmiyetlisi – jańa jaratılıs bolıw. 16 Usınday qaǵıyda boyınsha jasap atırǵanlardıń hámmesine, yaǵnıy Qudaydıń xalqına tınıshlıq hám miyrim-shápáát yar bolsın!

17 Endigiden bılay, hesh kim maǵan jábir bermesin. Óytkeni meniń denemde Iysanıń jaraqatlarınıń izleri bar.

18 Tuwısqanlar, Iyemiz Iysa Masiyxtıń miyrimi ruwxıńızǵa yar bolsın! Awmiyin.