‏ Habakkuk 1

1Bul payǵambarshılıq sóz – Xabaqquq payǵambarǵa ayan arqalı berilgen xabar.

Xabaqquqtıń Jaratqan Iyege nala shegiwi

2Jaratqan Iye, qashanǵa deyin Seni járdemge shaqıraman,
Maǵan qulaq salasań ba, ózi?
«Zorlıq-zombılıq!» dep jalbarınıp atırman,
Biraq bizlerdi qutqarmay atırsań Sen!
3Ne ushın jawızlıqtı kózim menen kóriwime jol qoydıń?
Sonday nahaqlıqqa qalay qarap turıpsań?
Qayaqqa qarasam da talan-tarajlıq hám zorlıq-zombılıq.
Hámme jerde daw hám jánjeller tolıp ketti.
4Sonlıqtan nızam óz kúshin joytıp, ádillik ayaq astı boldı,
Jawızlar ádil adamlardan ústin keldi,
Solay etip, ádillik burmalandı.

Jaratqan Iyeniń juwabı

5«Dıqqat penen qarańlar basqa xalıqlarǵa,
Tań qalasızlar kórgenlerińizge.
Sizlerdiń dáwirińizde sonday isler qılaman,
Esitken waqtıńızda, isene almaysızlar.
6Mine, Men kaldeylerdi kúshli qılaman,
Bul xalıq jawız hám tınımsız.
Olar dúnyanıń tórt tárepine júris qıladı,
Basqa xalıqlarǵa tiyisli jerlerdi basıp aladı.
7Olar qorqınıshlı hám qáwiplidur,
Ózine xan, ózine biy bolǵan menmen xalıqdur.
8Olardıń atları qaplannan tez,
Túnde júretuǵın ash qasqırlardan da qáwiplidur.
Atlı áskerleri jerdi shańǵıtıp, uzaqtan keler,
Oljasına taslanatuǵın búrkit yańlı ushıp keler.
9Olardıń hámmesi kiyatır tonaw ushın,
Ordaları shól quyınınday alǵa talpınıp,
Olar qum jıynaǵanday tutqınlardı jıynap keler.
10Patshalardı mazaqlap, basshılardı masqara qıladı,
Qorǵanlı, bekkem qalalardıń ústinen kúledi,
Sol qalalardıń diywallarına qıya etip, topıraq úyip,
Keyin olardı qolǵa aladı.
11Sonnan keyin, olar samal sıyaqlı tez ótip ketedi,
Bul gúnakar adamlar óz kúshin quday, dep esaplaydı».

Xabaqquqtıń Jaratqan Iyege jáne nala shegiwi

12Jaratqan Iye, Muxaddes Qudayım,
Hámme waqıtta bar bolǵan Sen emesseń be?
Solay eken, bizler joq bolıp ketpeymiz.
O, Jaratqan Iye, bizlerdi jazalaw ushın, kaldeylerdi tańladıń,
O, meniń qorǵawshı Jartasım, jazalaw huqıqın solarǵa berdiń.

13Jawızlıqtı kórgisi kelmeytuǵın sonday pákdur Seniń kózleriń,
Xosh kórmeyseń Sen nahaqlıqtı.
Ne ushın endi usı jawız adamlarǵa shıdap atırsań?
Jawızlar ózlerine qaraǵanda ádilirek bolǵanlardı jutıp atırǵanda,
Sen qalayınsha únsiz turıpsań?
14Sen adamzattı teńizdegi balıqlarday,
Basshısı joq shıbın-shirkeylerdey qıldıń.
15Kaldeyler olardıń barlıǵın óz qarmaǵına túsirer,
Tor taslap balıq awlaǵanday etip, olardı awlar.
Awları menen tutıp alıp, jıynap alar,
Sonda olar quwanıp, shadlanar.
16Awları arqalı olar kóp olja aladı,
Jaqsı awqatlar menen awqatlanadı,
Sol sebepli, awları ushın qurbanlıqlar shaladı.
Awlarına arnap, tútetki tútetedi.
17Qashanǵa deyin, olar awları menen ellerdi awlap,
Xalıqlardı ayawsız óltiriwdi dawam etedi?