Hab 2 | KaaIBT22L | STEP | Men gúzetshi minarasına shıǵıp, Minaranıń ústinde qarap turaman, Jaratqan Iyeniń juwabın kútemen. Meniń nalalarıma qanday juwap beretuǵının kóremen.

‏ Habakkuk 2

1 Men gúzetshi minarasına shıǵıp,
Minaranıń ústinde qarap turaman,
Jaratqan Iyeniń juwabın kútemen.
Meniń nalalarıma qanday juwap beretuǵının kóremen.

Jaratqan Iyeniń Xabaqquqqa bergen juwabı

2 Sonda Jaratqan Iye maǵan bılay dep juwap berdi:
«Taslarǵa anıq qılıp jaz saǵan ayan qılǵanlarımdı,
Hár bir adam bir qaraǵannan oqıy alatuǵın bolsın.
3 Bul ayan belgilengen waqıtta ámelge asadı,
Sol waqıt tez arada keledi, bul ayan jalǵan emes.
Eger de keshikkendey bolıp kórinse, sabır et,
Ol álbette keshikpey orınlanadı.
4 Qara, menmen adam tuwrı joldan júrmegeni ushın óledi,
Haq adam Qudayǵa bolǵan sadıqlıǵı arqalı jasaydı.

5 Baylıq ^{▼▼ Baylıq – Qumran qoljazbasınan. Basqa evreyshe qoljazbalarda «Sharap».} aldamshıdur,
Menmen adam tınım tappaydı,
Ol óliler mákanına uqsap,
Ólim sıyaqlı hesh qashan toymaydı.
Sonıń ushın, ellerdi basıp alıp, xalıqlardı tutqın qıladı.

6 Tutqınǵa túsken xalıqlar onıń ústinen kúlip, mazaqlap bılay deydi: „Háy, ózine tiyisli bolmaǵandı talap, bir úyin qılǵan,
Hásiret shegeseń, basqalardıń zatların tonap, qarızıńdı arttırǵan.
Bul jaǵday qashanǵa deyin dawam eter edi?“
7 Qarızıńdı qaytarıwdı talap qılatuǵınlar tosattan payda boladı,
Olar kelip, seni qorqınısh ishinde qaldıradı,
Sonda sen olar ushın olja bolıp qalasań.
8 Sen kóp xalıqlardı tonap, qan tóktiń.
Ellerge, qalalarǵa hám ondaǵı xalıqlarǵa zorlıq-zombılıq qıldıń,
Sonıń ushın, olardan aman qalǵanları seni talaydı.
9 Úyin jawızlıq penen baylıqqa toltırıp,
Apattan qashıw ushın, úyin biyikke qurǵan, hásiret shegedi!
10 Sen óz hiyleń menen,
Óz urpaǵıńa shermendelik alıp keldiń,
Kóp xalıqlardı qıyratqanıń ushın,
Apat alıp keldiń óz basıńa.
11 Hátteki, úyińniń diywal tasları saǵan qarsı páriyad qıladı,
Óre aǵashları da olarǵa qosılıp jańǵıradı.
12 Háy, qan tógip qala qurǵan, hásiret shegeseń,
Háy, ádalatsızlıq penen qorǵan salǵan, hásiret shegeseń!
13 Xalıqlardıń ter tógip eriskenleriniń janıp ketiwi,
Milletlerdiń barlıq miynetleriniń bosqa shıǵıwı,
Álemniń Jaratqan Iyesiniń isi emes pe?
14 Óytkeni suwlar teńizdi toltırıp turǵanınday,
Jer júzi Jaratqan Iyeniń ullılıǵı haqqındaǵı bilimge toladı.
15 Hásiret shegeseń! Háy, jalańash denelerin tamasha qılıw ushın,
Qońsı xalıqlarǵa más bolǵanınsha ózińniń ǵázep sharabıńnan ishtirgen.
16 Sen abıray ornına shermendelikke bóleneseń,
Endi gezek saǵan keldi, óziń de ish hám kórinsin súnnetsiz jalańash deneń.
Jaratqan Iye saǵan ishtirer oń qolındaǵı jazaǵa tolı kesesin,
Sóytip abırayıńdı tógip, shermende qılar.
17 Lebanon toǵaylarında qılǵan zorlıq-zombılıǵıń óz basıńa túsedi,
Jabayı haywanlardı qırıp tasladıń,
Endi sol islegen jawızlıǵıń ózińdi qorqıwǵa saladı.
Adamzattıń qanın tóktiń,
Ellerge, qalalarǵa hám ondaǵı xalıqlarǵa zorlıq-zombılıq qıldıń.
18 Adamzattıń qoldan soqqan oyma hám quyma butları nege jaraydı?
Olardıń ne paydası bar jalǵannan basqa?
Adam ózi soqqan butına isener,
Biraq soqqan butı tilsiz bir únsiz zatdur.
19 Aǵash butqa „Oyan!“dep aytqan,
Tilsiz tasqa „Tur!“dep jalbarınǵan, hásiret shegeseń!
But saǵan tuwrı joldı kórsete alar ma edi?
Olar altın hám gúmis penen qaplanǵandur,
Biraq onıń ishinde ómir joq.
20 Al Jaratqan Iye – Óz muxaddes Ibadatxanasında,
Únsiz tursın pútkil dúnya Onıń aldında».