‏ Habakkuk 3

Xabaqquqtıń duwası

1Payǵambar Xabaqquqtıń jır menen aytılatuǵın duwası.

2Jaratqan Iye, dańqıńdı esittim,
Seniń islegen islerińe tań qaldım,
Biziń zamanımızda da sonday islerdi jáne isle, o, Jaratqan Iye,
Endi hámmege málim bolsın neler isley alatuǵınıń.
Miyrim-shápáátińdi umıtpa ǵázeplengenińde!

3Quday járdemge keledi Temannan,
Muxaddes Quday keler Paran tawınan. Selah ▼
▼ Selah – bul saz termini bolıwı múmkin. Mánisi belgisiz. Zabur jırlarında jiyi qollanılǵan.

Onıń ullılıǵı qaplaydı aspandı,
Oǵan arnalǵan alǵıs-maqtawlar dúnyanı toltıradı.

4Onıń nurı jıldırımday jarqırar,
Nur shashılar Onıń qollarınan,
Kúsh-qúdireti qollarında jasırınǵandur.
 5Ol Óziniń aldınan illet jiberer,
Óltiretuǵın keselge izinen júriwdi buyırar.
 6Ol turǵanda jer silkinedi,
Názer taslaǵanda, xalıqlar titireydi.
Áyyemnen kiyatırǵan tawlar qulap túsip,
Burınnan bar bolǵan tóbeshikler shógip, Oǵan bas iyedi,
Máńgidur Qudaydıń jolları.
 7Kushan adamlarınıń óz shatırlarında qorqqanın,
Midyan jerinde jasaytuǵın adamlardıń titiregenin kóremen.
 8Jaratqan Iye, saylarǵa ashıwlandıń ba?
Ǵázeplendiń be dáryalarǵa?
Yamasa óshiń bar ma edi teńizde?
Xalqıń ushın mindiń be jeńilmes atlarıńa hám sawash arbalarıńa?
 9Sen atıw ushın oq jayıńdı alasań,
Oqlarıńdı atıwǵa tayarlaysań. Selah
Jer júzin dáryalar menen qaq bólip taslaysań.
 10Titirep keter tawlar Seni kórgende,
Seller tasıp, barlıq nárseni juwıp keter,
Teńiz túpleri shırqırap, tolqınları kóteriler.
 11Seniń oqlarıńnıń ushqan nurınan,
Jıltıraǵan nayzańnıń jıltırawınan,
Óz ornında qatıp qalar quyash penen ay.
 12Sen basıp óterseń jer júzin ǵázep penen,
Xalıqlardı qáháriń menen basıp ezerseń.
 13Óziń tańlaǵan xalıqtı hám tayınlaǵan patshanı qutqarıw ushın keleseń,
Jawız eldiń basshısın tas-talqan eteseń,
Tolıq joq qılasań jawız patshalıqtıń kúshlerin. Selah
 14Dushpan áskerleri bizlerdi daǵıtıw ushın quyınday bolıp keler,
Buqqı taslap, hálsiz adamlardı talan-taraj eter,
Sóytip, olar shadlanıp quwanar.
Al Sen olardıń basshısın óz nayzası menen óltireseń.
 15Atlarıń menen teńizdi basıp,
Ullı suwlardı úyir etip, aylandırasań.

16Bulardı esitkenimde, lárzege keldi denem,
Qaltırap ketti meniń erinlerim,
Erip ketkendey boldı súyeklerim,
Dármansızlıqtan dizelerim titiredi.

Biraq bizlerge hújim qılǵanlardıń apatshılıq kúnin,
Kútemen men sabırlılıq penen.

17Hátteki, ánjir aǵashı miywelemey qalsa,
Júzim aǵashları júzim bermese,
Ónim bermese de záytún aǵashları,
Atızlarda zúráát bolmay qalsa da,
Qoy qoralar bosap qalsa da,
Padada mallar qalmasa da,
 18Men bári bir Jaratqan Iyede yoshlanaman,
Qutqarıwshım Qudayıma quwanaman.
 19Quday Iye kúshimdur meniń,
Ol ayaqlarımdı kiyiktiń ayaǵınday shaqqan qılar.
Tawlardıń ústinen meni júrgizer.

Atqarıwshılardıń jetekshisine: tarlı saz ásbaplar menen aytıladı.
Copyright information for KaaIBT22L