Hag 1 | KaaIBT22L | STEP | Patsha Dariydiń patshalıǵınıń ekinshi jılınıń altınshı ayınıń birinshi kúninde Yahuda hákimi Shealtieldiń ulı Zerubbabelge hám bas ruwxaniy Iosadaq ulı Eshuaǵa payǵambar Xaggay arqalı Jaratqan Iyeden mınaday sóz tústi:

‏ Haggai 1

Jaratqan Iyeniń Ibadatxananı qaytadan qurıwdı buyırıwı

1 Patsha Dariydiń patshalıǵınıń ekinshi jılınıń altınshı ayınıń birinshi kúninde Yahuda hákimi Shealtieldiń ulı Zerubbabelge hám bas ruwxaniy Iosadaq ulı Eshuaǵa payǵambar Xaggay arqalı Jaratqan Iyeden mınaday sóz tústi:

2 «Álemniń Jaratqan Iyesi bılay deydi: Bul xalıq Jaratqan Iyeniń Úyin qaytadan quratuǵın waqıt ele kelmedi, dep aytıp atır».

3 Sonnan keyin, Jaratqan Iyeden payǵambar Xaggay arqalı jáne mınaday sóz tústi:

4 «Bul Ibadatxana wayran bolıp qulap atırǵan waqıtta, sizlerge aǵashlar menen qaplanǵan sulıw úylerde jasaytuǵın waqıt pa?

5 Mine, endi Álemniń Jaratqan Iyesi bılay deydi: Ózlerińizdiń tutqan jollarıńız haqqında jaqsılap oylanıp, túsinip alıńlar! 6 Kóp ektińler, biraq az orıp aldıńlar. Sizler awqat hám sharap iship-jeseńiz de, toymadıńlar. Kiyim-kenshek kiyseńiz de, deneńiz jılımadı. Is haqıńızdı alǵanıńız benen, tesik shıjlan qaltaǵa salǵanday boladı.

7 Álemniń Jaratqan Iyesi bılay dep aytıp atır: Ózlerińizdiń tutqan jollarıńız haqqında jaqsılap oylanıp, túsinip alıńlar! 8 Tawlarǵa shıǵıp, aǵash alıp kelińler hám Meniń Úyimdi qayta qurıńlar. Usılay etip, Meniń kewlim tolıp, atım ullılansın! – deydi Jaratqan Iye. 9 – Mol zúráát alıwǵa úmit etken edińler, biraq az jıynadıńlar. Awa, úylerińizge ne alıp kelseńiz de, olardı kókke suwırdım. Ne ushın? – deydi Álemniń Jaratqan Iyesi. – Awa, Meniń Úyim wayran bolıp jatırǵan waqıtta, sizler óz úylerińizdi salıwǵa juwırǵanıńız ushın solay isledim. 10 Sonıń ushın da, aspan jawılıp, shıq túspedi hám jer óz zúráátin bermedi. 11 Eldegi tawlarǵa hám atızlarǵa qurǵaqshılıq jiberdim. Bunıń kesiri taza sharapqa, záytún mayına, jerdiń jetistiretuǵın barlıq ónimlerine, adamlarǵa hám haywanlarǵa tiyip, islegen miynetlerińiz bosqa ketti».

Xalıqtıń buyrıqqa qulaq asıwı

12 Sonda Shealtiel ulı Zerubbabel, bas ruwxaniy Iosadaq ulı Eshua hám qalǵan xalıqtıń barlıǵı Qudayı Jaratqan Iye jibergen payǵambar Xaggaydıń sózlerine qulaq salıp, Jaratqan Iyege boysındı.

13 Keyin Jaratqan Iyeniń xabarshısı Xaggay Onıń: «Men sizler menen birgemen», – degen sózlerin xalıqqa jetkerdi. 14 Solay etip, Jaratqan Iye Yahuda hákimi Shealtiel ulı Zerubbabeldi, bas ruwxaniy Iosadaq ulı Eshuanı hám qalǵan xalıqtıń barlıǵın ruwxlandırıp, usı iske jigerlendirdi. Sonda olar kelip, Qudayı bolǵan Álemniń Jaratqan Iyesiniń Úyiniń qayta qurıw jumısın baslap jiberdi. 15 Bul patsha Dariydiń patshalıǵınıń ekinshi jılınıń altınshı ayınıń jigirma tórtinshi kúni edi.