Heb 12 | KaaIBT22L | STEP | Minekey, bizlerdi qorshaǵan usınday kóp sanlı gúwalar toparı bar eken. Sonlıqtan bizler de kesent beretuǵın hár bir júkti hám ózlerimizge tez jabısatuǵın gúnanı taslap, Quday aldımızǵa qoyǵan jarısta shıdamlılıq penen juwırayıq.

‏ Hebrews 12

Quday Ózi súygen adamın tárbiyalaydı

1 Minekey, bizlerdi qorshaǵan usınday kóp sanlı gúwalar toparı bar eken. Sonlıqtan bizler de kesent beretuǵın hár bir júkti hám ózlerimizge tez jabısatuǵın gúnanı taslap, Quday aldımızǵa qoyǵan jarısta shıdamlılıq penen juwırayıq. 2 Isenimimizdiń tiykarın salıwshı hám onı minsizlikke eristiriwshi Iysaǵa kóz tigeyik. Ol Ózin kútip turǵan quwanısh ushın, atanaq aǵashta shegeleniwdiń shermendeshiligin pisent etpey ólimge barıp, Qudaydıń taxtınıń oń jaǵına otırdı. 3 Gúnakarlardıń usınday qarsılıqlarına shıdaǵan Iysanı oylańlar. Sonda haldan tayıp, ruwxıy túskinlikke túspeysizler. 4 Sizler gúnaǵa qarsı gúreste qanıńız tógilgenshe gúresken joqsız-ǵo. 5 Qudaydıń Óz ullarına sóylegendey qılıp, sizlerge aytqan mına aqıl-násiyatın umıttıńız: «Balam! Jaratqan Iyeniń tárbiyasına itibarsız qarama,
Ol áshkaralaǵanda júregińe awır alma.
6 Sebebi Ol súygen adamın tárbiyalaydı,
Ulı qılıp qabıl etken hár bir adamın jazalaydı». ^{▼▼ Hkm 3:11-12.}

7 Tárbiyalanıw ushın shegip atırǵan azaplarıńızǵa shıdańlar. Quday sizlerge Óz balalarınday qatnas jasap atır-ǵo. Ákesi tárepinen tárbiyalanbaytuǵın ul bola ma? 8 Hár bir adam alatuǵın tárbiyanı almay atırǵan bolsańız, onda sizler haqıyqıy ullar emes, al nekesiz tuwılǵan balalarsız. 9 Sonday-aq, ózlerimizdi tárbiyalaǵan dúnyadaǵı ákelerimizdi bizler húrmet etip atırǵan ekenbiz, onda ruwxıy Ákemiz bolǵan Qudayǵa ele de kóbirek boysınıp jasawımız kerek emes pe? 10 Ákelerimiz bizlerdi ózleri durıs dep oylaǵan jol boyınsha qısqa waqıt ishinde tárbiyaladı. Biraq Quday Onıń muxaddesligine sherik bolıwımız ushın, bizlerdiń paydamızdı oylap tárbiyalaydı. 11 Tárbiyalaw ushın berilgen hár bir jaza waqtında quwanısh emes, al qapagershilik alıp keledi. Biraq keyin ala ol usılay tárbiyalanǵan adamlarǵa tınıshlıq beriwshi haqlıq alıp keledi.

12 Solay etip, túsken eńseńizdi kóterip, ayaqlarıńızda tik turıńlar. 13 Arańızda isenimi aqsaǵanlar jaman jolǵa túspey tuwrılanıwı ushın, dúziw jol menen júrińler.

Qudayǵa qulaq aspay ketpeńler!

14 Hámme menen tatıw bolıp jasawǵa hám muxaddes bolıwǵa tırısıńlar. Muxaddeslikke iye bolmay turıp, hesh kim de Jaratqan Iyeni kórmeydi. 15 Arańızdaǵı hesh birińizdiń Qudaydıń miyriminen ayırılıp qalmawı ushın hám arańızda sizlerge zıyan tiygizip, kóplerdi záhárleytuǵın ashshı tamır kógerip shıqpawı ushın, ^{▼▼ Nzm 29:18.} bir-birińizge jaqsılap qarańlar. 16 Ishińizde hesh kim buzıqshılıq islemesin yamasa tuńǵıshlıq huqıqın bir awqat ushın satqan Esaw sıyaqlı qudaysız bolmasın ^{▼▼ Jar 25:29-34.}. 17 Xabarıńız bar, Esaw sońınan ákesiniń pátiyasın alıwdı qálegende, tilegi qabıl etilmedi. Ol kóz jasların tógip jalbarınsa da, ózi islep qoyǵan isti ózgerte almadı ^{▼▼ Jar 27:30-40.}.

18 Sizler jaqınlaǵan taw – kózge kórinetuǵın, lawlap janǵan, qarańǵılıq penen túnekke shókken, dawıl basqan, 19 kárnay sesti hám Qudaydıń sózi jańlaǵan Sinay tawı emes. Qudaydıń sol dawısın esitkenler, Qudaydıń ózlerine qayta sóylemewin sorap jalbarınǵan edi. 20 Óytkeni olar: «Eger tawǵa, hátte, maldıń tuyaǵı tiyse de, tas boran qılıp óltirilsin», ^{▼▼ Shıǵ 19:12-13.} – degen buyrıqtan qorqıp, shıday almadı. 21 Bul kórinis sonshelli qorqınıshlı bolǵanlıqtan, Muwsa da: «Júdá qorqıp, dirildep baratırman», ^{▼▼ Nzm 9:19.} – degen edi. 22 Biraq sizler Sion tawına, yaǵnıy tiri Qudaydıń qalası – aspandaǵı Erusalimge, ondaǵı mıń-mıńlaǵan perishtelerdiń quwanıshlı jıyınına 23 hám atları aspanda jazılǵan, Qudaydıń tuńǵısh balaları sıyaqlı bolǵan birinshi iseniwshiler jıynaǵına jaqınladıńlar. Sizler jáne de hámme adamdı húkim etiwshi Qudayǵa, minsizlikke erisken haq adamlardıń ruwxlarına, 24 jańa kelisimniń táwelleshisi Iysaǵa hám Abıldıń qanınan ^{▼▼ Jar 4:10.} da artıq bolǵan Iysanıń keshirim beretuǵın sebilgen qanına jaqınladıńlar.

25 Abaylı bolıńlar, sóylep turǵan Qudayǵa qulaq aspay ketpeńler. Onıń tapsırması menen jer betinde sóylegen Muwsaǵa qulaq aspaǵan Izrail xalqı jazadan qashıp qutıla almaǵan edi. Eger bizler de aspannan ózlerimizge sóylep turǵan Qudayǵa qulaq aspasaq, bunnan da awırıraq jazadan qalay qashıp qutıla alamız? 26 Quday Sinay tawında sóylegende, Onıń dawısı jerdi silkindirip jibergen edi ^{▼▼ Shıǵ 19:18-20.}. Ol taǵı da: «Jáne bir mártebe tek jerdi emes, al aspandı da silkindiremen», ^{▼▼ Xag 2:6, 21.} – dep wáde bergen edi. 27 «Jáne bir mártebe» degen sózler qozǵalmaytuǵın nárselerdiń máńgige qalıwı ushın, qozǵalatuǵın nárselerdiń, yaǵnıy jaratılǵan nárselerdiń joq bolatuǵının ańlatadı. 28 Solay etip, bizler qozǵalmaytuǵın patshalıqqa eriskenimiz ushın shúkirlik bildirip, Qudayǵa unamlı túrde, Oǵan húrmet hám qorqınısh penen sıyınayıq. 29 Sebebi biziń Qudayımız – jandırıp joq qılatuǵın ot ^{▼▼ Nzm 4:24.}.