‏ Hebrews 13

Sońǵı aqıl-násiyatlar

1Bir-birińizdi tuwısqanlarsha súyiwdi dawam etińler. 2Miymandoslıqtı umıtpańlar. Óytkeni ayırımlar usılay islep, ózleri bilmey, perishtelerdi qonaq qılǵan. 3Qamaqta bolǵanlardı ózlerińiz olar menen birge tutqın bolǵanday este tutıńlar. Jáne de, azap shegip atırǵanlardı da ózlerińiz azap shegip atırǵanday yadıńızdan shıǵarmańlar. 4Hámmeńiz nekege húrmet penen qarańlar. Nekeńizdiń tósegi gúna menen bılǵanbasın. Sebebi Quday buzıqshılıq islegenlerdi hám neke hadallıǵın buzǵanlardı húkim etedi. 5Aqshanı súyiwden awlaq bolıp jasańlar. Ózlerińizde barǵa qanaat etińler. Óytkeni Quday bılay degen:

«Seni hesh qashan taslap ketpeymen, hesh qashan qaldırmayman». ▼

▼ Nzm 31:6, 8; Jar 28:15; Eshu 1:5.

6Sonlıqtan bizler batırlıq penen bılay deymiz: «Jaratqan Iye maǵan járdem beredi, men qorqpayman,
Ne qıla aladı adamlar maǵan?» ▼

▼ Zab 117:6.

7Sizlerge Qudaydıń sózin aytqan jetekshilerińizdi eske túsirińler. Olardıń qalay jasaǵanına hám ómiriniń aqırı qanday bolǵanına qarap, olardıń iseniminen órnek alıńlar. 8Iysa Masiyx keshe, búgin hám máńgilikke birdey. 9Hár túrli jat tálimatlarǵa berilip, azǵırılmańlar. Júrektiń awqatqa baylanıslı qaǵıydalardı orınlaw menen emes, al Qudaydıń miyrimi menen bekkemlengeni jaqsı. Bunday qaǵıydalardı orınlawshılar hesh qanday payda kórmedi.

10Bizlerdiń qurbanlıq ornımız bar. Muxaddes shatırda xızmet etetuǵın ruwxaniylerdiń sol qurbanlıqtan jewge haqısı joq. 11Bas ruwxaniy gúna ushın qurbanlıqqa berilgen mallardıń qanın Eń muxaddes bólmege aparadı. Al shalınǵan mallardıń denesi ordanıń sırtında órtep jiberiledi ▼

▼ Leb 4:11-12; 6:30; 16:27.

. 12Sol sıyaqlı Iysa da Óz qanı menen adamlardı muxaddes qılıw ushın, qala dárwazasınıń sırtında azap shekti. 13Olay bolsa, bizler de Onıń kórgen xorlıǵın bólisiwimiz ushın, elattıń sırtına shıǵıp, Oǵan barayıq. 14Sebebi bul jerde bizlerdiń máńgilik qalamız joq. Bizler keleshekte aspannan túsetuǵın qalanı árman etemiz.

15Sonlıqtan Iysa arqalı Qudayǵa úzliksiz maqtawlarımızdı qurbanlıq sıpatında usınayıq. Yaǵnıy, Onıń atına degen alǵıslarımız awzımızdan túspesin. 16Jaqsılıq islewdi hám ózlerińizde bolǵan nárseni basqalar menen bólisiwdi umıtpańlar. Óytkeni bunday qurbanlıqlar Qudayǵa unaydı.

17Jetekshilerińizdiń sózlerin tıńlańlar hám olarǵa boysınıńlar. Sebebi olar sizler ushın Qudayǵa esap beretuǵın adamlar bolǵanlıqtan, janlarıńızdı qarawıllaydı. Olar bul xızmetin quwanısh penen, nalımay atqarıw ushın, olarǵa qulaq asıńlar. Bolmasa, ózlerińiz zıyan kóresizler.

18Bizler ushın duwa etińler. Bizler ózlerimizdiń pák hújdanǵa iye ekenimizge hám hár tárepleme hadal ómir súriwdi qáleytuǵınımızǵa isenemiz. 19Ásirese janıńızǵa tez qaytıp barıwım ushın duwa etiwińizdi ótinish etemen.

Sońǵı sálemnama hám tilekler

20Óz qanın tógip, máńgilik kelisimdi bekitiwi arqalı qoylardıń ullı Shopanı bolǵan Iyemiz Iysanı tınıshlıq beriwshi Quday ólimnen tiriltti. 21Usı Quday Onıń erkin orınlawıńız ushın, sizlerge hár bir jaqsı nárseni jetkizsin. Ózine unaytuǵın nárseni Ol Iysa Masiyx arqalı bizlerde ámelge asırsın. Masiyxqa máńgi-baqıy dańq bolsın! Awmiyin.

22Tuwısqanlarım, sizlerge ótinish etemen, usı násiyat sózlerimdi qabıl etińler. Óytkeni men sizlerge qısqasha jazdım. 23Tuwısqanımız Timofeydiń azat etilgenin biliwińizdi qáleymen. Ol jaqın arada janıma kelse, onıń menen birge sizlerdi kóriwge baraman. 24Jetekshilerińizdiń hámmesine hám pútkil muxaddeslerge sálem aytıńlar. Italiyadan kelgenler sizlerge sálem aytıp atır. 25Qudaydıń miyrimi hámmeńizge yar bolsın!