Heb 2 | KaaIBT22L | STEP | Sonlıqtan esitkenlerimizden uzaqlap, joldan shıǵıp ketpewimiz ushın, esitkenlerimizge ele de kóbirek dıqqat awdarıwımız kerek.

‏ Hebrews 2

Dıqqat-itibarlı bolayıq!

1 Sonlıqtan esitkenlerimizden uzaqlap, joldan shıǵıp ketpewimiz ushın, esitkenlerimizge ele de kóbirek dıqqat awdarıwımız kerek. 2 Sebebi perishteler arqalı aytılǵan sóz kúshke iye bolıp, hár qanday jınayat hám boysınbawshılıq ushın ádil jaza beriletuǵın edi. 3 Solay eken, dáslep Iyemiz tárepinen aytılǵan, sońınan Onnan esitkenler tárepinen tastıyıqlanǵan ullı qutqarılıwǵa itibarsız qarasaq, bizler bul jazadan qalay qashıp qutıla alamız? 4 Quday da bul haqqında káramatlı belgiler, tań qalarlıq nárseler hám hár túrli káramatlı isler arqalı, jáne de, Óz qálewi boyınsha Muxaddes Ruwxtıń sıyların úlestiriwi arqalı gúwalıq berdi.

Qutqarılıwǵa jetelewshi Iysa

5 Quday bizler sóz etip atırǵan keleshek zamandı perishtelerge baǵınıshlı qılǵan joq. 6 Kerisinshe, Muxaddes Jazıwdıń bir jerinde birew bılay dep gúwalıq bergen edi: «Sen adam tuwralı oylaǵanday, ol kim bolıptı?
Sen adamzatqa ǵamxorlıq qılǵanday, ol kim bolıptı?
7 Sen Onı perishtelerden az waqıtqa ^{▼▼ Az waqıtqa – yamasa «sál-pál».} tómenirek qoydıń,
Izzet-húrmet tajın oǵan kiygizdiń. ^{▼▼ Bazı qoljazbalarda mına sózler de bar: «Qolıń menen dóretkenlerińniń ústinen onı húkimdar qıldıń».}
8 Hámme nárseni onıń ayaqlarına bas urǵızdıń». ^{▼▼ Zab 8:5-7.}

Quday hámme nárseni adamǵa baǵınıshlı qılıp, oǵan baǵınıshlı bolmaǵan hesh bir nárse qaldırmadı. Degen menen, hámme nárseniń adamǵa baǵınıshlı ekenin bizler elege deyin kórmey atırmız. 9 Biraq bizler perishtelerden az waqıtqa tómenirek qoyılǵan Iysanıń ólim azabın shekkeni ushın, dańq-húrmet tajın kiygenin kórip turmız. Awa, Ol Qudaydıń miyrimi menen hámme adamlar ushın ólimdi basınan keshirgen edi. 10 Hámme nárse Quday ushın hám Quday arqalı bar bolǵan. Usı Quday kóp perzentlerin ullılıqqa eristiriw ushın, olardı qutqarılıwǵa jetelewshi Iysanı azap-aqıretler arqalı minsizlikke jetkiziwdi maqul kórdi. 11 Óytkeni muxaddes qılıwshı Iysa hám Ol muxaddes qılǵan iseniwshilerdiń hámmesi bir Ákeden. Sonlıqtan Iysa olardı «tuwısqanlarım» dep atawǵa uyalmaydı. 12 Iysa Qudayǵa bılay deydi: «Tuwısqanlarıma Seniń atıńdı járiyalayman,
Jámiyet aldında Saǵan alǵıs-maqtaw aytaman». ^{▼▼ Zab 21:23.}

13 Jáne basqa jerde bılay delingen: «Men Qudayǵa súyenemen» ^{▼▼ Iysh 8:17.}

taǵı da: «Minekey, Men Qudaydıń Maǵan bergen balaları menen birge usı jerdemen». ^{▼▼ Iysh 8:18.}

14 Bul balalar et hám qannan ibarat bolǵanlıqtan, Iysanıń Ózi de olarǵa teńlesip, et hám qannan ibarat bolǵan adamnıń denesine iye boldı. Bunı Ol ólim ústinen biylikke iye bolǵandı, yaǵnıy shaytandı Óz ólimi arqalı nabıt qılıw ushın 15 hám ómir boyı ólim qorqınıshı sebepli qul bolǵanlardıń hámmesin azat qılıw ushın isledi. 16 Sebebi, álbette, Iysa perishtelerge emes, al Ibrayımnıń urpaǵınan bolǵanlarǵa járdem etedi. 17 Sol sebepten Qudaydıń xızmetinde miyrim-shápáátli hám sadıq bas ruwxaniy bolıp, adamlardıń gúnaların tazalaw ushın, Ol hár tárepleme tuwısqanlarına uqsawı kerek edi. 18 Onıń Ózi sınaqqa túsip, azap shekkenlikten, Ol sınaqqa túskenlerge de járdem ete aladı.