Heb 3 | KaaIBT22L | STEP | Solay etip, bizler menen birge Quday tárepinen shaqırılǵan, muxaddes tuwısqanlarım, Qudaydıń elshisi hám bas ruwxaniyi, dep ózlerimiz ashıq tán alǵan Iysa haqqında tereń oylańlar!

‏ Hebrews 3

Iysa Muwsadan ullı

1 Solay etip, bizler menen birge Quday tárepinen shaqırılǵan, muxaddes tuwısqanlarım, Qudaydıń elshisi hám bas ruwxaniyi, dep ózlerimiz ashıq tán alǵan Iysa haqqında tereń oylańlar! 2 Muwsa Qudaydıń pútkil shańaraǵında Qudayǵa sadıq bolǵanınday, Iysa da Ózin xızmetke qoyǵan Qudayǵa sadıq boldı. 3 Úydi salǵan salınǵan úyden góre kóbirek húrmetke ılayıqlı bolǵanı sıyaqlı, Iysa da Muwsadan góre joqarıraq ullılıqqa ılayıq tabıldı. 4 Hár bir úydiń qurıwshısı bar, al Quday pútkil barlıqtıń jaratıwshısı. 5 Muwsa keleshekte aytılatuǵın sózler haqqında gúwalıq beriw ushın, Qudaydıń pútkil shańaraǵında bir xızmetker sıpatında sadıq boldı. 6 Biraq, Masiyx Qudaydıń shańaraǵın basqaratuǵın Ul sıpatında sadıq boldı. Eger ózlerimizdegi úmit sebepli payda bolatuǵın batırlıq hám quwanıshtı aqırına deyin bekkem saqlasaq, bizler – Onıń shańaraǵımız.

Qudaydıń tınıshlıq beretuǵın mákanı

7 Sol sebepten Muxaddes Ruwx bılay deydi: «Eger búgin Qudaydıń dawısın esitseńler,
8 Shóldegi sınaq waqtında qozǵalań kótergen ata-babalarıńızday,
Tas qılmańlar júreklerińizdi.
9 Olar sol jerde qırıq jıl boyı islegen islerimdi kórgen bolsa da,
Meni sınay berdi.
10 Sonlıqtan Men sol áwladqa ǵázeplenip bılay dedim:
„Olardıń júrekleri bárqulla azǵırılǵan,
Olar Meniń jollarımdı bilmedi“.
11 Jáne de, Men qáhárlengenimde:
„Olar Meniń tınıshlıq beretuǵın mákanıma kirmeydi“, – dep ant ishken edim». ^{▼▼ Zab 94:7-11.}

12 Háy tuwısqanlarım, júregińiz isenbey jawız bolıp qalıp, tiri Qudaydan bezip ketiwden saq bolıńlar! 13 Kerisinshe, arańızdaǵı hesh birińiz gúnanıń aldawına erip, júregin qaysar qılmawı ushın, hár kúni ele «búgin» dep aytılıp atır eken, bir-birińizdi jigerlendirip barıńlar. 14 Óytkeni eger bizler dáslepki isenimimizdi aqırına deyin bekkem saqlasaq, Masiyxqa tiyisli bolǵan hámme nársege sherik bolamız. 15 Joqarıda bılay delingen edi: «Eger búgin Qudaydıń dawısın esitseńler,
Qozǵalań kótergen ata-babalarıńızday,
Tas qılmańlar júreklerińizdi». ^{▼▼ Zab 94:7-8.}

16 Qudaydıń sózin esitse de, Oǵan qarsı qozǵalań kótergen kimler edi? Muwsanıń basshılıǵında Mısırdan shıqqanlardıń hámmesi emes pe edi? 17 Quday kimlerge qırıq jıl ashıwlı edi? Gúna islep, súyekleri shólde qalǵanlarǵa emes pe? 18 Quday kimlerge: «Meniń tınıshlıq beretuǵın mákanıma kirmeysizler», – dep ant ishken edi? Ózine boysınbaǵanlarǵa emes pe? 19 Solay etip, kórip turǵanımızday, olar isenbegenlikten sol jerge kire almadı.