Heb 4 | KaaIBT22L | STEP | Sonlıqtan Qudaydıń tınıshlıq beretuǵın mákanǵa kirgiziwi haqqındaǵı wádesi ele de kúshke iye eken, arańızdaǵı hár birińiz usı wádeden bos qalıp qoyıwdan qorqıp, saq bolıńlar.

‏ Hebrews 4

1 Sonlıqtan Qudaydıń tınıshlıq beretuǵın mákanǵa kirgiziwi haqqındaǵı wádesi ele de kúshke iye eken, arańızdaǵı hár birińiz usı wádeden bos qalıp qoyıwdan qorqıp, saq bolıńlar. 2 Sebebi bizlerge járiyalanǵan Xosh Xabardı ata-babalarımız da esitken edi. Biraq olar esitken sózlerin isenim menen qabıl etpegenlikten, bul sózlerdiń olarǵa paydası tiymedi. 3 Quday dúnyanı jaratıp bolǵannan keyin-aq, tınıshlıq beretuǵın mákandı tayarlap qoyǵan bolsa da, olar haqqında bılay degen: «Men qáhárlengenimde:
„Olar Meniń tınıshlıq beretuǵın mákanıma hesh qashan kirmeydi“, – dep ant ishtim». ^{▼▼ Zab 94:11.}

Biraq, isenetuǵın bizler sol mákanǵa kiremiz. 4 Muxaddes Jazıwdıń bir jerinde jetinshi kún ^{▼▼ Jetinshi kún – Qudaydıń buyrıǵı boyınsha, yahudiylerdiń Shabbat kúni.} haqqında bılay delingen: «Quday jetinshi kúni barlıq islerinen dem aldı». ^{▼▼ Jar 2:2.}

5 Jáne de, Muxaddes Jazıwdıń basqa jerinde Quday bılay degen: «Olar Meniń tınıshlıq beretuǵın mákanıma hesh qashan kirmeydi». ^{▼▼ Zab 94:11.}

6 Solay etip, aldın Xosh Xabardı esitkenler sózge qulaq aspaǵanlıqtan, tınıshlıq beretuǵın mákanǵa kirmedi. Biraq, basqalar ushın ol jerge kiriwge múmkinshilik bar. 7 Sol sebepten Quday «búgin» dep atalatuǵın jáne bir kúndi belgilep, aldın aytılǵanday, kóp waqıtlardan soń, Dawıt arqalı bılay degen edi: «Eger búgin Qudaydıń dawısın esitseńler,
Tas qılmańlar júreklerińizdi». ^{▼▼ Zab 94:7-8.}

8 Eger Eshua izraillılardı tınıshlıq beretuǵın mákanǵa eristirgende ^{▼▼ Nzm 31:7.}, Quday sońınan basqa bir kún haqqında aytpaǵan bolar edi. 9 Demek, Qudaydıń xalqı ushın haqıyqıy dem alatuǵın waqıt keledi. 10 Quday dúnyanı jaratqannan soń qalay dem alǵan bolsa, tınıshlıq mákanına kirgen hár bir adam da óz islerinen solay dem aladı. 11 Solay eken, hesh birimiz boysınbaǵan sol adamlarǵa erip adaspay, tınıshlıq mákanına kiriwge tırısayıq.

12 Qudaydıń sózi tiri hám tásirli. Ol eki júzli qılıshtan da ótkir bolıp, jan menen ruwxtı, buwın menen súyeklerdi bóletuǵın dárejede suǵılıp kiredi. Ol júrektegi oy hám niyetlerdi áshkara qıladı. 13 Jaratılǵan hesh bir nárse Quday aldında jasırın emes. Onıń kóz aldında hár bir nárse ashıq hám ayan. Bizler usı Qudayǵa esap beremiz.

Bas ruwxaniyimiz Iysa

14 Biraq, bizlerde aspanǵa kóterilgen ullı bas ruwxaniyimiz – Qudaydıń Ulı Iysa bar. Sonlıqtan ózlerimiz ashıq tán alǵan isenimimizdi bekkem saqlayıq. 15 Ol – bizlerdiń hálsizliklerimizdi bólise alatuǵın bas ruwxaniy. Onıń Ózi hár tárepleme bizler sıyaqlı sınaldı, biraq gúna islemedi. 16 Sonlıqtan rehimlilik alıw ushın hám kerek waqtında ózlerimizge járdem etetuǵın miyrimge erisiw ushın, Qudaydıń miyrimge iye taxtına batıllıq penen jaqınlayıq.