Heb 5 | KaaIBT22L | STEP | Hár bir bas ruwxaniy adamlar arasınan tańlap alınadı hám ol Qudayǵa baylanıslı islerde adamlardıń wákili bolıp, olardıń gúnaları ushın Qudayǵa sadaqa hám qurbanlıqlar beriw ushın tayınlanadı.

‏ Hebrews 5

1 Hár bir bas ruwxaniy adamlar arasınan tańlap alınadı hám ol Qudayǵa baylanıslı islerde adamlardıń wákili bolıp, olardıń gúnaları ushın Qudayǵa sadaqa hám qurbanlıqlar beriw ushın tayınlanadı. 2 Bilmey qalıp joldan adasqanlarǵa ol múláyimlilik penen qatnas jasay aladı. Óytkeni onıń óziniń de hálsiz jerleri bar. 3 Sol sebepten ol tek xalıqtıń gúnaları ushın emes, al óziniń gúnaları ushın da qurbanlıq beriwi shárt. 4 Hesh bir adam bas ruwxaniy bolıw mártebesine ózliginen erise almaydı. Tek Xaron sıyaqlı Quday tárepinen shaqırılsa ǵana erise aladı ^{▼▼ Shıǵ 28:1.}.

5 Sol sıyaqlı, Masiyx ta bas ruwxaniylik mártebesine iye bolıw ushın, Ózin Ózi ullılaǵan joq. Al Oǵan: «Sen Meniń Ulımsań,
Búgin Men Saǵan Áke boldım», ^{▼▼ Zab 2:7.} –

degen Qudaydıń Ózi Onı usı mártebege eristirdi. 6 Muxaddes Jazıwdıń basqa jerinde Quday Oǵan bılay degen: «Sen Melkisedek ^{▼▼ Jar 14:17-20.} sıyaqlı,
Máńgige ruwxaniyseń». ^{▼▼ Zab 109:4.}

7 Masiyx jer júzinde adam bolıp jasaǵan kúnlerde Ózin ólimnen qutqara alatuǵın kúshke iye bolǵan Qudayǵa bálent dawıs penen páriyad etip, kóz jasların tógip hám duwa etip jalbarındı ^{▼▼ Mrk 14:32-42; Yuxn 12:27-33.}. Ol Qudayǵa boysınǵanlıqtan, Quday Onı esitti. 8 Ol Qudaydıń Ulı bolsa da, shekken azapları arqalı boysınıwdı úyrendi. 9 Masiyx usı tárizde minsizlikke erisip, Ózine boysınatuǵınlardıń hámmesi ushın máńgilik qutqarılıwǵa jol ashtı 10 hám Ol Quday tárepinen Melkisedek sıyaqlı bas ruwxaniy, dep ataldı.

Isenimnen qaytpaw haqqında eskertiw

11 Melkisedek haqqında aytajaq kóp sózlerimiz bar, biraq sizler zeyinsiz bolǵanlıqtan, túsindiriw qıyın boladı. 12 Usı waqıtqa kelip, sizler muǵallim bolıwıńız kerek edi. Biraq sizler Qudaydıń sózleriniń dáslepki tiykarların qaytadan úyreniwge mútájsiz. Sizlerge kúshli awqat emes, al sút kerek! 13 Sút penen azıqlanatuǵın hár bir adam gódek, yaǵnıy haqıyqatlıq sózi boyınsha jasawda tájiriybesiz adam bolǵanı. 14 Al kúshli awqat eresek adamlar ushın, yaǵnıy ómirdegi tájiriybesi arqalı jaman menen jaqsını ayırıw sezimine iye bolǵanlar ushın arnalǵan.