Heb 6 | KaaIBT22L | STEP | Sonlıqtan Masiyx haqqında baslanǵısh tálimattı úyreniwde toqtap qalmayıq, al alǵa ilgerilep, jetilisip barayıq. Ólimge jetelewshi isler ushın táwbe etiwden, Qudayǵa iseniwden,

‏ Hebrews 6

1 Sonlıqtan Masiyx haqqında baslanǵısh tálimattı úyreniwde toqtap qalmayıq, al alǵa ilgerilep, jetilisip barayıq. Ólimge jetelewshi isler ushın táwbe etiwden, Qudayǵa iseniwden, 2 suwǵa shomıldırıw haqqındaǵı qaǵıydalardan, qol qoyıp duwa etiwden, ólilerdiń tiriliwinen hám máńgilik húkimnen ibarat bolǵan sol tálimattıń tiykarların qaytadan salmayıq. 3 Eger Quday ruxsat berse, bizler alǵa ilgerilep, jetilisip baramız.

4 Bir mártebe haqıyqatlıq nurı túsip, Qudaydıń sıyınıń dámin tatqan hám Muxaddes Ruwxqa sherik bolǵanlardı, 5 Qudaydıń sóziniń jaqsı ekenin hám keleshektiń qúdiretli islerin ómirlerinde kórip bolıp, 6 isenimnen qaytqanlardı dúzetip táwbe qıldırıw múmkin emes. Sebebi olar Qudaydıń Ulın ózleri qaytadan atanaq aǵashqa shegelep, masqara qılǵan boladı. 7 Ústine jiyi-jiyi jawǵan jawındı ishken hám ózinde islegenlerge paydalı zúráát bergen jerdi Quday jarılqaydı. 8 Biraq sheńgel menen jantaq ósken jer jaramsız bolıp, kóp kútpey ǵarǵısqa ushıraydı hám aqırı jandırılıp jiberiledi.

9 Sizlerge kelsek, súyikli tuwısqanlarım, bizler usılay desek te, sizlerdiń qutqarılıwǵa baylanıslı ele de kóbirek jarılqawlarǵa iye ekenińizge isenimimiz kámil. 10 Óytkeni Quday ádalatsız emes. Ol sizlerdiń miynetińizdi hám muxaddeslerge ^{▼▼ Muxaddesler – Iysaǵa iseniwshiler.} qılǵan hám qılıp atırǵan xızmetińiz arqalı Ózine kórsetken súyispenshiligińizdi umıtpaydı. 11 Hár birińiz úmitińizdi aqırına deyin bekkem saqlawıńız ushın, usılay ǵayrat salıwıńızdı árman etemiz. 12 Jáne de erinshek bolmay, Quday tárepinen wáde etilgenlerdi isenim hám sabırlılıq penen alǵanlardan órnek alıwıńızdı qáleymiz.

Qudaydıń ózgermeytuǵın wádesi

13 Quday Ibrayımǵa wáde bergende, Ózinen ullıraq hesh kim bolmaǵanlıqtan, Óziniń atı menen ant iship, 14 bılay degen edi:

«Seni ústi-ústine jarılqayman. Urpaqlarıńdı sansız qılıp kóbeytemen». ^{▼▼ Jar 22:17.}

15 Solay etip, Ibrayım sabırlılıq penen kútip, wáde etilgendi aldı.

16 Adamlar ózlerinen ullıraq bolǵan menen ant ishedi. Olar ushın ant aytılǵan sózlerdi tastıyıqlap, hár bir tartıstı toqtatadı. 17 Sol sıyaqlı, Quday da Óz erkiniń ózgermeytuǵının wádeni miyras etip alǵanlarǵa ashıq kórsetpekshi bolıp, wádesin ant penen tastıyıqladı. 18 Solay etip, usı eki nárse, yaǵnıy wáde hám ant ózgermeydi. Sebebi Quday olardı aytqanda ótirik sóylewi múmkin emes. Sonlıqtan ózlerimizge berilgen úmitti bekkem saqlawımız ushın, Qudaydan pana tapqan bizler olar arqalı úlken jubanıshqa iye bolamız.

19 Bizlerdiń bul úmitimiz janlarımız ushın kemeniń kóshkisi sıyaqlı isenimli hám bekkem. Usı úmit bizlerdi aspandaǵı Muxaddes shatırdıń perdesiniń arǵı tárepine ótkizedi. 20 Iysa bizler ushın sol jerge bizlerden aldın kirip, Melkisedek sıyaqlı máńgige bas ruwxaniy boldı.