Heb 7 | KaaIBT22L | STEP | Bul Melkisedek Salim patshası hám Quday Taalanıń ruwxaniyi edi. Ol patshalardı jeńiliske ushıratıp qaytıp kiyatırǵan Ibrayımdı qarsı alıp, oǵan pátiyasın bergen edi.

‏ Hebrews 7

Ruwxaniy Melkisedek

1 Bul Melkisedek Salim ^{▼▼ Salim – Erusalimniń eski atı.} patshası hám Quday Taalanıń ruwxaniyi edi. Ol patshalardı jeńiliske ushıratıp qaytıp kiyatırǵan Ibrayımdı qarsı alıp, oǵan pátiyasın bergen edi. 2 Al Ibrayım oǵan hámme nárseniń onnan birin bergen edi ^{▼▼ Jar 14:17-20.}. Onıń eki atı bar, birinshisi Melkisedek bolıp, bul attıń mánisi «ádillik patshası», al ekinshisi Salim patshası bolıp, bul attıń mánisi «tınıshlıq patshası» degendi ańlatadı. 3 Onıń ákesi, anası hám shejiresi belgisiz. Ómiriniń bası, ya sońı joq. Ol sol jaǵınan Qudaydıń Ulına uqsaydı hám máńgige ruwxaniy bolıp qaladı.

4 Qarańlar, ol qanshelli ullı! Hátte, túp babamız Ibrayım da túsken oljalarınıń onnan birin oǵan bergen edi. 5 Lebiy urıwınan shıqqan ruwxaniyler Muxaddes Nızamdaǵı buyrıq boyınsha óz tuwısqanlarınan, yaǵnıy xalıqtan, hámmesi de Ibrayımnıń urpaqları bolsa da, onnan birin alıwı tiyis edi. 6 Melkisedek Lebiy urıwınan bolmasa da, Ibrayımnan onnan birin alıp, Qudaydıń wádesine iye bolǵan oǵan pátiyasın bergen edi. 7 Pátiya bergen adam pátiya alǵan adamnan ullı ekeni sózsiz. 8 Onnan birin alatuǵın ruwxaniylerdiń basında ólim bar. Biraq, Ibrayımnan onnan birin alǵan Melkisedektiń tiri ekeni haqqında gúwalıq bar. 9 Demek, onnan birin alatuǵın Lebiydiń ózi de Ibrayım arqalı onnan birin berdi, dep aytıwǵa boladı. 10 Óytkeni Melkisedek Ibrayımdı qarsı alǵanda, Lebiy ele babası Ibrayımnıń belinde edi.

11 Izrail xalqı Muxaddes Nızamdı lebiylilerdiń ruwxaniylik xızmeti tiykarında alǵan edi. Biraq eger Xaron áwladınan bolǵan lebiylilerdiń ruwxaniylik xızmeti arqalı minsizlikke erisiw múmkin bolǵanda, onda Melkisedek sıyaqlı basqa bir ruwxaniydiń keliwine hájet bar ma edi? 12 Sebebi ruwxaniylik xızmeti ózgertilse, Muxaddes Nızam da ózgertiliwi tiyis. 13 Aldın sóz etilgen adam, yaǵnıy Iysa basqa urıwdan shıqqan edi. Sol urıwdan hesh kim qurbanlıq orında xızmet etpegen. 14 Al Iyemiz Iysanıń Yahuda urıwınan kelip shıqqanı anıq. Muwsa bul urıwǵa baylanıslı ruwxaniylik haqqında hesh nárse aytpaǵan edi.

Iysa Melkisedek sıyaqlı ruwxaniy

15 Melkisedekke uqsaǵan basqa bir ruwxaniy payda bolǵanda bul sózlerimiz ele de anıǵıraq boladı. 16 Iysa Lebiy urıwına baylanıslı bolǵan Muxaddes Nızamdaǵı qaǵıydalar boyınsha emes, al tawısılmaytuǵın ómir qúdireti menen ruwxaniy boldı. 17 Óytkeni Muxaddes Jazıwda Ol haqqında: «Sen Melkisedek sıyaqlı,
Máńgige ruwxaniy bolıp qalasań!», ^{▼▼ Zab 109:4.} –

degen gúwalıq bar. 18 Ruwxaniylik haqqında áwelgi qaǵıydalar hálsiz hám paydasız bolǵanlıqtan biykar etildi. 19 Sebebi Muxaddes Nızam hesh bir nárseni minsizlikke eristirmedi. Bunıń ornına, bizlerdi Qudayǵa jaqınlastıratuǵın jaqsı úmit berildi.

20 Iysa Qudaydıń bergen antı boyınsha ruwxaniy boldı. Al lebiyli ruwxaniyler Qudaydıń antı boyınsha ruwxaniy bolǵan joq. 21 Iysa Ózine: «Jaratqan Iye ant ishti, Óz qararınan qaytpaydı:
„Máńgige ruwxaniy bolıp qalasań!“», ^{▼▼ Zab 109:4.} –

degen Qudaydıń antı boyınsha ruwxaniy boldı. 22 Solay etip, Iysa ele de jaqsıraq kelisimniń kepili boldı.

23 Jáne bir ayırmashılıǵı mınaday: lebiyli ruwxaniylerdiń sanı kóp edi. Óytkeni ólim olarǵa xızmetlerin dawam etiwge tosqınlıq qılatuǵın edi. 24 Biraq Iysa máńgi jasaytuǵın bolǵanlıqtan, Onıń ruwxaniyligi de máńgi. 25 Sonlıqtan Ol Ózi arqalı Qudayǵa kelgenlerdi pútkilley qutqaratuǵın kúshke iye. Sebebi Ol máńgige tiri bolıp, Qudaydan olar ushın ótinip soraydı.

26 Iysa bizlerge kerek bolǵan bas ruwxaniydiń anıq Ózi boladı. Óytkeni Ol muxaddes, ayıpsız, pák, gúnakarlardan ajıratılǵan hám aspannan da joqarı kóterilip, ullı abırayǵa iye bolǵan. 27 Basqa bas ruwxaniyler sıyaqlı, hár kúni áweli Óz gúnaları ushın, al sońınan xalıqtıń gúnaları ushın qurbanlıq beriwdiń Oǵan hájeti joq. Sebebi Ol Ózin qurban etip, bul isti bir mártebe hám birotala orınladı. 28 Muwsanıń Nızamı boyınsha minsiz emes bolǵan adamlar bas ruwxaniy qılıp qoyıldı. Biraq Muwsanıń Nızamınan soń, Qudaydıń ant etip bergen wádesi Onıń máńgige minsiz Ulın bas ruwxaniy etip qoydı.