Heb 8 | KaaIBT22L | STEP | Aytqanlarımızdıń baslı mánisi mınadan ibarat: aspanda qúdiretli Qudaydıń oń jaǵında otırǵan bizlerdiń bas ruwxaniyimiz Iysa bar.

‏ Hebrews 8

Iysa – jańa kelisimniń bas ruwxaniyi

1 Aytqanlarımızdıń baslı mánisi mınadan ibarat: aspanda qúdiretli Qudaydıń oń jaǵında otırǵan bizlerdiń bas ruwxaniyimiz Iysa bar. 2 Ol sol jerde adam tárepinen emes, al Jaratqan Iye tárepinen qurılǵan haqıyqıy hám Muxaddes shatırda xızmet qıladı. 3 Hár bir bas ruwxaniy sadaqa hám qurbanlıqlar beriw ushın tayınlanadı. Sonlıqtan bizlerdiń bas ruwxaniyimizdiń de beretuǵın bir nársesi bolıwı tiyis edi. 4 Eger Iysa jer júzinde qalǵanda, ruwxaniy bolmas edi. Óytkeni álle qashan jer júzinde Muxaddes Nızam boyınsha sadaqalar beretuǵın ruwxaniyler bar. 5 Biraq, bul ruwxaniyler aspandaǵı haqıyqıy Muxaddes shatırdıń úlgisi hám kóleńkesi bolǵan jerdegi Muxaddes shatırda xızmet etedi. Sebebi Muwsa usı Muxaddes shatırdı qurıwǵa kiriskende, Quday tárepinen bılay dep eskertilgen edi: «Abaylı bol, hár bir nárseni saǵan tawda kórsetilgen úlgiler boyınsha isle». ^{▼▼ Shıǵ 25:40.} 6 Al Iysa burınǵıdan da jaqsıraq wádelerge tiykarlanıp dúzilgen, Quday menen adamlardıń arasındaǵı jaqsıraq kelisimniń táwelleshisi boldı. Sonlıqtan Ol ruwxaniylerdiń xızmetinen anaǵurlım joqarıraq xızmetke iye boldı.

7 Eger sol birinshi kelisim kemshiliksiz bolǵanda, onıń ornına ekinshisin dúziwdiń keregi bolmas edi. 8 Al, xalqın ayıplı dep tapqan Qudaydıń sózleri mınaday:

«Mınaday kúnler keledi, – deydi Jaratqan Iye. – Men Izrail hám Yahuda xalqı menen jańa kelisim dúzemen. 9 Bul kelisim Men olardıń ata-babalarınıń qolınan uslap, Mısır elinen alıp shıqqan waqtımda olar menen dúzgen kelisimdey bolmaydı. Óytkeni olar Meniń kelisimime sadıq bolmadı. Sonda Men de olardan júzimdi teris burdım. 10 Sol kúnlerden keyin, Izrail xalqı menen dúzetuǵın kelisimim mınaw, – deydi Jaratqan Iye, – Men Óz nızamımdı olardıń sana-sezimine ornalastırıp, júreklerine jazıp qoyaman. Men olardıń Qudayı bolaman, olar Meniń xalqım boladı. 11 Hesh kim óz dostına yamasa óz tuwısqanına „Jaratqan Iyeni tanıp bil“, – dep úyretpeytuǵın boladı. Sebebi kishkenesinen úlkenine deyin hámmesi Meni tanıytuǵın boladı. 12 Men olardıń qılmısların rehimlilik penen keshiremen, gúnaların qaytıp esime almayman». ^{▼▼ Erm 31:31-34.}

13 Quday «jańa kelisim» dep, burınǵısınıń gónergenin kórsetti. Gónergen nárse kóp ótpey joq boladı.