Heb 9 | KaaIBT22L | STEP | Birinshi kelisim dáwirinde sıyınıw qaǵıydaları hám adamnıń qolınan qurılǵan Muxaddes shatır bar edi.

‏ Hebrews 9

Birinshi kelisim dáwirindegi diniy xızmet

1 Birinshi kelisim dáwirinde sıyınıw qaǵıydaları hám adamnıń qolınan qurılǵan Muxaddes shatır bar edi. 2 Qurılǵan sol Muxaddes shatırdaǵı «Muxaddes bólme» dep atalatuǵın birinshi bólmede shıra qoyǵısh, stol hám stoldıń ústinde usınılǵan nanlar bolatuǵın edi. 3 Muxaddes shatırdaǵı ekinshi perdeniń artında «Eń muxaddes bólme» dep atalatuǵın ekinshi, ishki bólme bar edi. 4 Bul bólmede altınnan islengen tútetki tútetiletuǵın orın hám hámme jeri altın menen qaplanǵan Kelisim sandıǵı bar edi. Sandıqtıń ishinde manna ^{▼▼ Manna – Izrail xalqı Mısırdan shıǵıp shólde júrgende, Quday aspannan bergen azıq.} salınǵan altın gúze, Xaronnıń bórtken hasası hám on buyrıq oyıp jazılǵan taslar bar edi. 5 Sandıqtıń ústinde saltanatlı kerublardıń ^{▼▼ Kerub – qanatlı ruwxıy barlıq.} músinleri bar edi. Olar sandıqtıń ústindegi gúnadan páklew ornın qanatları menen jawıp turatuǵın edi ^{▼▼ Shıǵ 36:8–37:29.}. Biraq, házir bul nárseler haqqında birme-bir ayta almaymız.

6 Muxaddes shatır usılay úskenelengen edi. Onıń birinshi bólmesine ruwxaniyler hár qashan kirip, sıyınıw xızmetin orınlaytuǵın edi. 7 Al ekinshi, ishki bólmege bolsa, bir jılda bir mártebe tek bas ruwxaniy ǵana kire alatuǵın edi. Ol ózi menen birge sol jerge óziniń gúnalarınıń hám xalıqtıń bilmey islegen gúnalarınıń keshiriliwi ushın shalınǵan qurbanlıqtıń qanın alıp kiriwi tiyis edi. 8 Bul arqalı Muxaddes Ruwx bizlerge mınanı bildiredi: Muxaddes shatırdıń birinshi bólmesi ele bar eken, Eń muxaddes bólmege baratuǵın jol jabıq boladı. 9 Bul házirgi zaman ushın tımsal bolıp, berilgen sadaqalar hám qurbanlıqlardıń Qudayǵa sıyınatuǵın adamnıń hújdanın pákley almaytuǵının kórsetedi. 10 Bular tek jewge, ishiwge hám hár qıylı diniy tazalanıw úrdislerine baylanıslı nárseler bolıp, jańa dúzim payda bolǵanǵa deyin kúshke iye bolǵan sırtqı qaǵıydalar ǵana.

11 Biraq Masiyx payda bolǵan jaqsı nárselerdiń ^{▼▼ payda bolǵan jaqsı nárselerdiń – Bazı qoljazbalarda: «keleshektegi jaqsı nárselerdiń».} bas ruwxaniyi bolıp kelip, qoldan soǵılmaǵan, yaǵnıy bul dúnyadaǵı jaratılıstan bolmaǵan ullıraq hám minsiz Muxaddes shatırǵa kirdi. 12 Masiyx teke hám tanalardıń qanı menen emes, al Óz qanı menen Eń muxaddes bólmege birinshi hám sońǵı mártebe kirip, bizlerge máńgilik qutqarılıw alıp keldi. 13 Burın haramlanıp qalǵanlardıń denesiniń pák bolıwı ushın, olardıń ústilerine teke menen buǵalardıń qanı ^{▼▼ Leb 16:1-34.} hám qasharlardıń kúli ^{▼▼ San 19:1-22.} sebilip, olardı muxaddes qılatuǵın edi. 14 Al endi bolsa, máńgilik Muxaddes Ruwx arqalı Ózin minsiz qurbanlıq qılıp Qudayǵa baǵıshlaǵan Masiyxtıń qanı bizlerdiń tiri Qudayǵa xızmet ete alıwımız ushın, hújdanımızdı ólimge jetelewshi islerden tazalawı sózsiz.

15 Solay etip, Quday tárepinen shaqırılǵanlardıń wáde etilgen máńgilik miyrastı alıwı ushın, Masiyx Quday menen adamlardıń arasında dúzilgen jańa kelisimniń táwelleshisi boldı. Óytkeni Ol adamlardı birinshi kelisimniń waqtında islegen gúnalarınan qutqarıw ushın, Ózin qurban etti. 16 Wásiyat ^{▼▼ Wásiyat – grekshe «wásiyat» sózi «kelisim» degendi de bildiredi.} bar jerde wásiyat etken adamnıń ólimin tastıyıqlaw da kerek boladı. 17 Wásiyat tek adamnıń óliminen soń ǵana kúshke iye boladı. Wásiyat etken adam tiri bolsa, ol hesh qanday kúshke iye emes. 18 Sonlıqtan birinshi kelisim de qan tógilgennen keyin kúshke endi. 19 Muwsa Muxaddes Nızamnıń hár bir buyrıǵın xalıqqa járiyalaǵannan soń, tana hám tekelerdiń suw qosılǵan qanına qırmızı jún menen mayoran shóbin malıp alıp, Kelisim kitabınıń hám pútkil xalıqtıń ústine sewip: 20 «Bul – Qudaydıń sizler menen dúzgen kelisimin bekitetuǵın qan», ^{▼▼ Shıǵ 24:8.} – dedi. 21 Sonday-aq, ol Muxaddes shatırdıń hám sıyınǵanda qollanılatuǵın barlıq zatlardıń ústine de qan septi. 22 Haqıyqattan da, Muxaddes Nızam boyınsha derlik hámme nárse qan menen tazalanadı. Qan tógilmese, gúna keshirilmeydi.

Masiyxtıń minsiz qurbanlıǵı

23 Solay etip, aspandaǵı haqıyqıy nárselerdiń úlgisi bolǵan bul nárseler usılay tazalanıwı kerek edi. Biraq aspandaǵı nárseler bolsa, onnan da jaqsıraq qurbanlıqlar menen tazalanıwı tiyis. 24 Sebebi Masiyx aspandaǵı haqıyqıy hám Muxaddes shatırdıń úlgisi bolǵan, qoldan qurılǵan Muxaddes shatırǵa emes, al tuwrı aspanǵa kirip, házir bizler ushın Qudaydıń aldında tur. 25 Maldıń qanı menen Eń muxaddes bólmege jıl sayın kiretuǵın bas ruwxaniy sıyaqlı, aspanǵa kirgen Masiyxqa Ózin qayta-qayta qurban etiwdiń keregi joq. 26 Eger olay bolmaǵanda, dúnya jaratılǵannan baslap Masiyxtıń qayta-qayta azap shegiwi tiyis bolar edi. Biraq Masiyx Ózin qurban etip, gúnanı joq qılıw ushın, zamannıń aqırında tek bir mártebe jerge keldi. 27 Bir mártebe ólip, onnan soń húkim etiliw adamlardıń táǵdirine jazılǵan. 28 Sol sıyaqlı, Masiyx ta kóplerdiń gúnaların juwıw ushın, birinshi hám sońǵı mártebe qurban boldı. Ekinshi mártebe bolsa, Ol gúnalardı juwıw ushın emes, al Ózin intizarlıq penen kútip atırǵanlardı tolıq qutqarıw ushın keledi.