Hos 1 | KaaIBT22L | STEP | Yahuda patshaları Uzziya, Iotam, Axaz, Xizkiya húkimdarlıq etken waqıtları hám Izrail patshaları Ehoash ulı Yarobam húkimdarlıq etken waqıtları Beeriy ulı Hosheaǵa Jaratqan Iyeden sóz tústi.

‏ Hosea 1

1 Yahuda patshaları Uzziya, Iotam, Axaz, Xizkiya húkimdarlıq etken waqıtları hám Izrail patshaları Ehoash ulı Yarobam húkimdarlıq etken waqıtları Beeriy ulı Hosheaǵa Jaratqan Iyeden sóz tústi.

Hosheanıń hayalı hám balaları

2 Jaratqan Iye Hoshea arqalı sóyley baslap, oǵan bılay dedi:

– Bar, bir buzıq hayalǵa úylen, onıń buzıqshılıq penen tuwǵan balaları boladı. Óytkeni bul el de Jaratqan Iyeden bas tartıp, opasızlıq qıldı.

3 Solay etip, Hoshea Diblayımnıń qızı Gomerge úylendi. Gomer hámiledar bolıp, Hosheaǵa ul tuwıp berdi. 4 Jaratqan Iye Hosheaǵa bılay dedi:

– Ulıńnıń atın Izreel dep qoy. Sebebi uzaq waqıt ótpey, Men patsha Ehudıń shańaraǵın Izreelde qan tókkeni ushın jazalayman. Izrail patshalıǵın joq qılaman. 5 Sol kúni Men Izreel oypatlıǵında Izraildıń sadaǵın sındıraman.

6 Gomer jáne hámiledar bolıp, qız tuwdı. Jaratqan Iye Hosheaǵa:

– Qızdıń atın Lo-Ruxama ^{▼▼ Lo-Ruxama – «rehim etilmegen» degendi bildiredi.} dep qoy. Óytkeni bunnan bılay Men Izrail xalqına rehim qılmayman, olardı keshirmeymen. 7 Biraq Yahuda xalqına rehim qılaman. Olardı sadaq, qılısh, sawash, at hám atlılar arqalı emes, al olardıń Qudayı bolǵan Men, Jaratqan Iye, Óz kúshim menen qutqaraman, – dedi.

8 Gomer Lo-Ruxamanı emshekten shıǵarǵannan soń, jáne hámiledar bolıp, ul tuwdı. 9 Jaratqan Iye bılay dedi:

– Ulıńnıń atın Lo-Ammiy ^{▼▼ Lo-Ammiy – «Meniń xalqım emes» degendi bildiredi.} dep qoy. Óytkeni endi sizler Meniń xalqım emessiz, Men de sizlerdiń Qudayıńız emespen. 10 Degen menen, Izrail xalqı teńizdegi qum sıyaqlı kóp bolıp, olardı ólshep te, sanap ta bolmaytuǵın waqıt keledi. Olarǵa: «Sizler xalqım emessiz», – dep aytılǵan jerde: «Tiri Qudaydıń balalarısız», – dep aytıladı. 11 Sonda Yahuda hám Izrail xalıqları qaytadan birlesip, ózlerine bir basshı tańlaydı. Olar óz elinde ósip, gúllep jasnaydı. Solay etip, Izreeldiń ^{▼▼ Izreel – «Quday egedi» degendi bildiredi.} kúni ullı bir kún boladı.