Hos 12 | KaaIBT22L | STEP | Efrayım shól samalın kútip turadı, Kúni boyı shıǵıs samalınıń izinen quwıp júredi. Jalǵan hám zorlıqtı arttıradı. Assiriya menen kelisim dúzip, Záytún mayın Mısırǵa jiberedi.

‏ Hosea 12

1 Efrayım shól samalın kútip turadı,
Kúni boyı shıǵıs samalınıń izinen quwıp júredi.
Jalǵan hám zorlıqtı arttıradı.
Assiriya menen kelisim dúzip,
Záytún mayın Mısırǵa jiberedi.
2 Jaratqan Iyeniń dawası bar Yahudaǵa,
Yaqıptı júrgen jolı boyınsha jazalaydı,
Islegen islerin ózlerine qaytaradı.
3 Yaqıp anasınıń qarnında tuwısqanınıń tabanın uslaǵan ^{▼▼ Jar 25:26.},
Úlkeygende, Quday menen gúresken ^{▼▼ Jar 32:22-30.}.
4 Perishte menen gúresip, onı jeńdi,
Ol jılap, miyrim-shápáát soradı.
Qudaydı Beyt-Elde taptı,
Sol jerde Quday bizler menen sóylesti ^{▼▼ Jar 28:10-22; 35:1-15.}.
5 Jaratqan Iye, Álemniń Qudayı,
Onıń atı – Jaratqan Iye.
6 Sonlıqtan Qudayıńa qayt sen,
Súyispenshilikti hám ádillikti saqla,
Hámme waqıtta Qudayıńdı kút.
7 Jaratqan Iye bılay deydi:
«Xalqım táreziden jeytuǵın sawdagerge uqsaydı,
Olar urlıqtı jaqsı kóredi.
8 Efrayım: „Men bayman,
Ózime mal-dáwlet arttırdım,
Barımdı mańlay terim menen taptım,
Hesh kim meni gúnakar dep ayıplay almas“, – deydi.

9 Biraq seni Mısırdan alıp shıqqan,
Qudayıń Jaratqan Iye – Men bolaman.
Shóldegi kúnlerińizdegidey,
Seni jáne shatırlarǵa ornalastıraman.
10 Men payǵambarlarǵa sóyledim,
Olarǵa kóp ayanlar berdim,
Olar arqalı tımsallar ayttım».

11 Giladta jawızlıq islenbedi me?
Sózsiz onıń xalqı áhmiyetsiz bolıp qaldı.
Gilgalda buǵalar qurbanlıq qılınbadı ma?
Atızlar dógeregindegi qurbanlıq orınlar,
Tas úyindilerine uqsap qaladı.
12 Yaqıp Aram eline qashıp ketti ^{▼▼ Jar 28:1-5.},
Izrail ol jerde hayalı ushın qul bolıp,
Qalıńlıq tólew ushın qoy baqtı ^{▼▼ Jar 29:1-20.}.
13 Jaratqan Iye payǵambarı arqalı,
Izrail xalqın Mısırdan alıp shıqtı,
Payǵambar arqalı olardı qorǵadı.
14 Biraq Efrayım qattı ǵázeplendirdi Qudaydı,
Efrayımnan esabın talap qıladı tókken qanı ushın,
Onı mazaq qılǵanı ushın ılayıqlı jazasın qaytaradı.