‏ Hosea 13

Izraildıń keyingi jazası

1Jaratqan Iye bılay deydi:
«Burın Efrayım sóylegende, hámme titireytuǵın edi,
Izrailda onıń mártebesi ullı edi.
Biraq Efrayım Baalǵa tabınıp, gúna arttırdı,
Usılay etip, ózin ólimge tapsırdı.
 2Házir de xalqım gúna ústine gúna islep atır,
Gúmislerinen quyma butlar,
Sheberlik penen músinler soǵıp atır.
Bulardıń hámmesin ónerment qoldan isler.
Bunday adamlar haqqında bir sóz bar:
„Butqa qurbanlıq qılǵan – tananı súygen boladı“.
 3Sonıń ushın, olar tańǵı dumanday boladı,
Bir maydanda joq bolatuǵın shıqqa uqsaydı.
Samal ushırǵan qırmandaǵı qawıqtay joq boladı,
Morıdan shıqqan tútinge uqsap qaladı.

4Biraq Mısırdan seni alıp shıqqan,
Qudayıń Jaratqan Iye – Men bolaman.
Mennen basqa Qudaydı bilmewiń kerek,
Mennen basqa joqdur seniń qutqarıwshıń.
 5Men seni shólde,
Suwsız qurǵaqshılıqta baqtım.
 6Otlı jaylawda olar toydı,
Qarnı toyǵannan keyin, menmen boldı.
Sol sebepli sen Meni umıttıń.
 7Men olardıń jolın arıslan sıyaqlı ańlıyman,
Qaplan sıyaqlı, buqqıda jataman.
 8Balalarınan ayırılǵan ayıw sıyaqlı taslanaman,
Júreklerin jawıp turǵan kókireklerin tilkimlep taslayman.
Sol jerde arıslan sıyaqlı olardı jalmayman,
Jırtqısh haywan kibi maydalap taslayman.

9Háy, Izrail, Men seni qurtaman,
Saǵan kim járdem bere aladı?
 10Barlıq qalalarıńdı qutqaratuǵın patshań qáne?
„Bizlerge patsha hám basshı ber“, – dep soraǵan biyleriń qáne?
 11Men ashıwlanıp, saǵan patsha berdim,
Ǵázepke mingenimde, onı alıp tasladım.
 12Efrayımnıń jınayatı jıynalıp tur,
Onıń gúnası saqlanıp tur.
 13Tolǵaq tutqan ananıń azabı oǵan túsedi,
Biraq bala aqılsız bolıp,
Waqtı bolǵanda da, qarınnan shıqpadı.

14Bul xalıqtı óliler mákanınıń kúshinen qutqarar ma edim?
Olarǵa ámeńgerlik qılar ma edim?
Háy ólim, uwlı iyneńdi shıǵar!
Háy óliler mákanı, apat kúshińdi kórset!
Endi Men rehim qılmayman».

15Efrayım tuwısqanları arasında kóp ósip-ónse de,
Jaratqan Iye onıń ústine shıǵıs samalın,
Shólden esetuǵın samal jiberedi,
Onıń bulaǵı qurıydı,
Qudıǵınıń suwı tartılıp qaladı.
Ǵáziynesindegi bahalı zatları tonaladı.
Copyright information for KaaIBT22L