Hos 2 | KaaIBT22L | STEP | Jaratqan Iye bılay dedi: «Aǵa-inilerińizdi Ammiy , ájapa-qarındaslarıńızdı Ruxama , dep shaqırıń».

‏ Hosea 2

1 Jaratqan Iye bılay dedi: «Aǵa-inilerińizdi Ammiy ^{▼▼ Ammiy – «Meniń xalqım» degendi bildiredi.}, ájapa-qarındaslarıńızdı Ruxama ^{▼▼ Ruxama – «rehim etilgen» degendi bildiredi.}, dep shaqırıń».

Izraildıń opasızlıǵı

2 «Anańızdıń ayıbın betine basıń, awa, ayıbın betine basıń,
Ol endi hayalım emes,
Men de onıń kúyewi emespen.
Júzindegi buzıqshılıq boyawın óshirip,
Alıp taslasın kókiregindegi buzıqshılıq belgisin.
3 Bolmasa, Ózim onıń kiyimin sheship, jalańash qılaman,
Anasınan tuwılǵanday etip, hámmeniń aldına qoyaman.
Kewip qalǵan jerdey, shól daladay etip,
Suwsızlıqtan óltiremen.
4 Balalarına rehim qılmayman,
Óytkeni olar buzıqshılıqtan tuwılǵan.
5 Olardıń anası buzıqshılıq qıldı,
Shermendelik penen olarǵa hámiledar boldı.
Ol bılay dedi: „Oynaslarımnıń izinen eremen,
Nanımdı, suwımdı, jún hám zıǵır tawarımdı,
Záytún mayımdı hám ishimligimdi olar beredi“.

6 Sonıń ushın, tosaman jolın tikenler menen,
Jolın taba almasın dep, diywal quraman.
7 Oynaslarınıń izinen quwadı,
Biraq olarǵa jete almaydı,
Olardı izleydi, biraq taba almaydı.
Sonda ol bılay deydi:
„Kúyewimniń aldına qaytıp barayın,
Sol waqıttaǵı awhalım házirgiden jaqsı edi!“
8 Biyday, sharap hám záytún mayın,
Oǵan Men bergenimdi bilmedi.
Baal ushın qollanǵan gúmis penen altındı da,
Oǵan Men bergenimdi bilmedi.

9 Sonıń ushın, zúráát waqtında tartıp alaman biydayımdı,
Jıyın-terim máwsiminde alıp qoyaman taza sharabımdı.
Jalańash denesin jawıp turǵan jún hám zıǵır tawarlarımdı qaytarıp alaman.
10 Mine, endi oynaslarınıń kóz aldında,
Onı jalańashlap, abırayın tógemen,
Hesh kim onı qutqara almaydı Meniń qolımnan.
11 Pútkil quwanıshlarına, úlken bayramlarına,
Jańa Ay bayramına hám Shabbat kúnlerine,
Barlıq belgilengen bayramlarına shek qoyaman.
12 „Oynaslarımnıń bergen tólemi“, dep aytqan,
Júzimzarları menen ánjir baǵların wayran etemen,
Hámmesin toǵaylıqqa aylandıraman.
Baǵları jem boladı jabayı haywanlarǵa.
13 Baallarǵa arnalǵan bayram kúnleri,
Oǵan arnap tútetki tútetkeni ushın,
Sırǵa hám taǵınshaqlar menen bezenip,
Oynaslarınıń izinen júrip,
Meni tolıq umıtqanı ushın, onı jazalayman», – deydi Jaratqan Iye.

Jaratqan Iyeniń Izrailǵa degen súyispenshiligi

14 «Al endi, onıń kewlin tabaman,
Shólge alıp barıp, jıllı sóylesemen.
15 Sonnan keyin oǵan júzimzarların qaytarıp beremen,
Axor ^{▼▼ Axor – «apat» degendi bildiredi.} oypatlıǵın úmit esigi qılaman.
Jaslıq waqtındaǵıday,
Mısırdan shıqqan kúnlerindegidey,
Ol Maǵan: „Awa“, – dep juwap beredi.

16 Sol kúni, – deydi Jaratqan Iye, – sen Meni „Kúyewim“, dep shaqırasań, artıq „Mırzam“ ^{▼▼ Sózbe-sóz: «Baalım».} demeyseń. 17 Baallardıń atların qaytıp tilińe almaytuǵın qılaman. Olardıń atları qaytadan yadqa alınbaydı. 18 Sol kúni olar ushın jabayı haywanlar, aspandaǵı quslar hám jer bawırlawshılar menen kelisim dúzemen. Sol jerden sadaq hám qılıshlardı, barlıq sawash quralların joq qılaman. Sonda olar qáwipsiz jatatuǵın boladı. 19 Men seni Ózime máńgige nekelep alaman. Saǵan hámme waqıtta ádalatlı hám ádil, súyispenshilikli hám miyrim-shápáátli qatnasta bolaman. 20 Seniń menen bolǵan nekege sadıq qalaman, sen Meni Jaratqan Iye, dep bileseń.

21 Sol kúni juwap beremen,
– deydi Jaratqan Iye, –
Men aspanǵa, aspan bolsa jerge juwap beredi.
22 Jer biyday, taza sharap hám záytún mayı menen juwap beredi,
Olar Izreelge juwap beredi.
23 Sol waqıtta Men onı Ózim ushın usı jerge egemen.
Lo-Ruxamaǵa rehim kórsetemen,
Lo-Ammiyge: „Meniń xalqım“, – deymen.
Ol da Meni: „Meniń Qudayım“, – dep shaqıradı».