Hos 4 | KaaIBT22L | STEP | Tıńlań Jaratqan Iyeniń sózin, Izrail xalqı, Jaratqan Iyeniń bul eldiń turǵınlarına qarsı dawası bar: «Bul elde sadıqlıq ta, súyispenshilik te, Quday haqqında bilim de joq, Meni, Óz Qudayın tanıǵısı kelmeydi.

‏ Hosea 4

Jaratqan Iyeniń Izrail xalqın ayıplawı

1 Tıńlań Jaratqan Iyeniń sózin, Izrail xalqı,
Jaratqan Iyeniń bul eldiń turǵınlarına qarsı dawası bar:
«Bul elde sadıqlıq ta, súyispenshilik te, Quday haqqında bilim de joq,
Meni, Óz Qudayın tanıǵısı kelmeydi.
2 Ol jerde nálet, jalǵan, adam óltiriw, urlıq,
Hám buzıqshılıq tolıp ketken.
Hámme jaqta zorlıq, qan ústine qan tógedi.
3 Sonıń ushın, jer kóz jas tógedi,
Ol jerde jasaytuǵın xalıq hálsireydi.
Nabıt bolar jabayı haywanlar,
Kóktegi quslar, hátteki teńizdegi balıqlar».

Jaratqan Iyeniń ruwxaniylerdi ayıplawı

4 «Birde birewińiz dawlaspańlar,
Hesh kim bir-birin ayıplamasın,
Meniń dawam sizlerge qarsı, háy ruwxaniyler!
5 Sizler kúndiz jıǵılasız,
Payǵambar da túnde sizler menen birge súrnigedi,
Men anańızdı nabıt qılaman.

6 Joq bolmaqta xalqım Meni bilmegeni ushın,
Óytkeni sizler waz keshtińiz Meni biliwden,
Maǵan ruwxaniy bolıp xızmet etpesin, dep,
Men de waz keshemen sizlerden.
Sizler umıttıńız Qudayıńızdıń nızamların,
Sonıń ushın, Men de perzentlerińizdi umıtaman.
7 Ruwxaniyler, sizlerdiń sanıńız artqan sayın,
Maǵan qarsı kóp gúna qıldıńız.
Endi abırayıńızdı tógip, shermende qılaman.
8 Sizler xalqımnıń gúna qurbanlıqları arqalı jasaysız,
Olardıń gúna qılıwın qáleysiz.
9 Xalqımnıń basına túsken sizlerdiń de basıńızǵa túsedi.
Tutqan jolıńız boyınsha jazalayman,
Qılǵan qılmısıńızǵa jarasa qaytaraman.
10 Olar jeydi, biraq toymaydı qarnı,
Buzıqshılıq qıladı, biraq kóbeymeydi sanı.
Olar buzıqshılıq ushın, Jaratqan Iyeni tárk etti».

Qudaydıń butqa tabınıwshılardı húkim qılıwı

11 «Jańa hám eski sharap,
Xalqımdı es-aqılınan ayırdı.
12 Olar aǵash buttan keńes sorap,
Tayaqtan juwap aladı.
Óytkeni joldan urdı olardı buzıqshılıq ruwxı,
Óz Qudayınan ayırılıp, buzıqshılıq qıldı.
13 Tawlardıń tóbelerinde qurbanlıqlar shalıp,
Tútetki tútetip atır tóbeshiklerde,
Emen, aq terek hám terebinflerdiń qoyıw sayalarında.
Sonıń ushın, qızlarıńız buzıq boldı,
Kelinlerińiz neke hadallıǵın buzdı.
14 Buzıqshılıq qılǵan qızlarıńızdı,
Neke hadallıǵın buzǵan kelinlerińizdi jazalamayman.
Sebebi erkeklerdiń ózleri buzıqlarǵa baradı,
Butqa tabınatuǵın jerde buzıqlar menen birge qurbanlıq shaladı.
Es-aqılınan ayırılǵan xalıq óledi.

15 Sen, Izrail buzıqshılıq qılsań da, Yahuda bul ayıpqa qol urmasın.
Tabınıw ushın Gilgalǵa barmań, Beyt-Awenge ^{▼▼ Beyt-Awen – «jawızlıq úyi» degendi ańlatadı. Hoshea Beyt-El qalasın sol jerdegi butparazlıq sebepli usılay atadı.} de ayaq baspań.
Tiri Jaratqan Iye haqı ant ishpeń.
16 Izrail qaysar sıyırday bolıp ketti,
Endi Jaratqan Iye olardı
Qalay baǵadı qoyday etip keń jaylawda?
17 Efrayım ^{▼▼ Efrayım – arqa patshalıq Izrail názerde tutılǵan.} butlarǵa júregin berdi,
Qoy onı!
18 Olar sharabın tawısılǵansha iship,
Buzıqshılıq jolın dawam etedi,
Olardıń húkimdarları shermendelikti jaqsı kórdi.
19 Dawıl olardı ushırıp alıp ketedi,
Butlarǵa bergen qurbanlıqları sebepli uyatqa qaladı».