Hos 5 | KaaIBT22L | STEP | Jaratqan Iye bılay deydi: «Háy, ruwxaniyler, esitińler! Háy, Izrail xalqı, dıqqat penen tıńlańlar! Qulaq salıń, háy patsha shańaraǵı! Sizlerge qarsı húkim shıǵarıldı. Sizler Mispada adamlar ushın duzaq, Tabor tawında jayılǵan bir tor boldıńız.

‏ Hosea 5

Izrail hám Yahudanıń húkim etiliwi

1 Jaratqan Iye bılay deydi:
«Háy, ruwxaniyler, esitińler!
Háy, Izrail xalqı, dıqqat penen tıńlańlar!
Qulaq salıń, háy patsha shańaraǵı!
Sizlerge qarsı húkim shıǵarıldı.
Sizler Mispada adamlar ushın duzaq,
Tabor tawında jayılǵan bir tor boldıńız.
2 Sizler tereń battıńız Shittimde,
Biraq Men hámmeńizdi jazalayman.
3 Efrayım, seni jaqsı bilemen,
Izrailda da Meniń ushın jasırın nárse joq.
Efrayım, házir sen buzıqshılıq qılıp kettiń,
Izrail, sen ózińdi haramladıń.
4 Islegen isleri Qudayına qaytıwına jol qoymaydı,
Sebebi olardıń ishinde buzıqshılıq ruwxı bar,
Olar Jaratqan Iyeni tanımadı.
5 Izraildıń menmenligi ózine qarsı gúwalıq beredi,
Óz jınayatı sebepli qulaydı Izrail, yaǵnıy Efrayım,
Yahuda da onıń menen birge qulaydı.
6 Qoy hám malları menen Jaratqan Iyeni izleydi,
Biraq Onı taba almaydı,
Óytkeni Jaratqan Iye olardı taslap ketti.
7 Olar Jaratqan Iyege opasızlıq etti,
Nekesiz balalar tuwdı.
Jańa ay bayramı olardıń ózlerin,
Jáne de, eginlerin jalmap jutadı».

Izrail menen Yahuda arasındaǵı urıs

8 «Gibada kárnay, Ramada kárnay shertiń,
Beyt-Awende sawash dabılın urıń,
Dushpan izińizden kiyatır, háy Benyamin!
9 Jaza kúni Efrayım qańırap, bosap qaladı,
Izrail urıwlarına járiyalaǵanım sózsiz júz beredi.
10 Yahuda basshıları jer shegarasınıń sızıǵın,
Jılıstırǵanlarǵa uqsaydı,
Suw tasqınınday etip, ǵázebimdi tógemen olardıń ústine.
11 Húkim waqtında Efrayım azap shegip, ezildi,
Óytkeni biyhuda zatlarǵa eriwdi abzal kórdi.
12 Men Efrayımdı kúye sıyaqlı jep,
Yahuda xalqın qurt sıyaqlı kemiremen.
13 Efrayım óziniń kesel ekenin,
Yahuda óz jaraların kórgende,
Efrayım Assiriyaǵa ketti,
Ullı patshadan járdem sorap, elshi jiberdi,
Biraq ol shıpa bere almaydı sizlerge,
Jarańızdı táwir qıla almaydı.
14 Óytkeni Men Efrayımǵa arıslan sıyaqlı,
Yahuda xalqı ushın kúshli bir arıslanday bolaman.
Olardı Ózim tilkimlep, maydalap taslayman,
Súyrep, Ózim alıp ketemen.
Olardı hesh kim qutqara almaydı.
15 Olar óz gúnasın moyınlaǵan waqıtqa deyin,
Men olardı taslap ketemen.
Azap ishinde júrgende, Meniń júzimdi izlep, olar Maǵan qaytadı».