Hos 7 | KaaIBT22L | STEP | Izraildı shıpalamaqshı bolǵanımda, Efrayımnıń ayıpları áshkara boldı, Samariyanıń jınayatı ashıldı. Olar hiylekerlik penen is tutadı, Urılar úylerge urlıqqa túsedi, Qaraqshılar jol tosıp tonawshılıq qıladı.

‏ Hosea 7

1 Izraildı shıpalamaqshı bolǵanımda,
Efrayımnıń ayıpları áshkara boldı,
Samariyanıń jınayatı ashıldı.
Olar hiylekerlik penen is tutadı,
Urılar úylerge urlıqqa túsedi,
Qaraqshılar jol tosıp tonawshılıq qıladı.
2 Olardıń islegen jawız isleri yadımda,
Biraq olar bunı oylamaydı da.
Endi jawız isleri ózlerin qorshap aldı,
Sol gúnalar Meniń kóz aldımda.

3 Olar jamanlıqları menen patshanıń,
Jalǵanları menen hámeldarlarınıń kewlin kóterer.
4 Olardıń hámmesi buzıqshılıqqa háwes,
Olar qamırdı iylegennen baslap,
Ol ashıǵanǵa deyin,
Óshpey janıp turǵan tandırǵa uqsaydı.
5 Patshasınıń bayramı kúni,
Hámeldarlar sharaptıń qızıwına más boldı,
Patsha surbetler menen tabaqlas boldı.
6 Olar hiyle menen oǵan jaqın bolar,
Júrekleri peshtey janar,
Túni menen ǵázepten pısqıp,
Azanda jalınday lawlaydı.
7 Tandırday qızǵan bul barlıq adamlar,
Húkimdarların jalmamay jutıp atır.
Nátiyjede patshaları birinen keyin biri ólip atır,
Biraq Meni járdemge shaqırmadı birewi de.

8 Efrayım basqa xalıqlar menen aralasıp ketti,
Ol bir jaǵı kúyip, bir jaǵı shiyki qalǵan nanǵa uqsaydı.
9 Ózge xalıqlar onıń kúshin jalmadı,
Ol bolsa, bunı ańlamadı.
Shashlarına aq tústi,
Biraq bunı da bayqamadı.
10 Izraildıń menmenligi, ózine qarsı gúwalıq berer,
Basına túsken apatlarǵa qaramay,
Óz Qudayı Jaratqan Iyege qaytpadı,
Olar Meni izlemedi.

11 Efrayım sana-sezimi joq, aqılsız kepterge uqsaydı,
Olar birese Mısırdı shaqırıp,
Birese Assiriyaǵa barıp, járdem soraydı.
12 Olar ketkende, Men torımdı olardıń ústine taslayman,
Aspanda ushıp júrgen qustay etip, jerge túsiremen.
Olardı jıyınında aytılǵanı boyınsha jazalayman.
13 Hásiret bolsın, olarǵa!
Sebebi olar Mennen uzaqlasıp ketti!
Apat jawadı olardıń baslarına,
Óytkeni Maǵan qarsı bas kóterdi!
Olardı qutqarǵım keledi,
Biraq Maǵan jalǵan sóyleydi.
14 Olar Maǵan shın júrekten jalbarınbaydı,
Tóseklerinde jatıp, baqıradı.
Biyday hám sharap ushın olar óz denelerin tiledi ^{▼▼ Baalǵa tabınıwshılar tárepinen islengen háreket. 3Pat 18:28.}.
Mennen olar uzaqlasadı.
15 Olarǵa tálim-tárbiya berip, kúsheytken bolsam da,
Olar Maǵan qarsı jamanlıq oyladı.
16 Olar jaramsız sadaqqa uqsaydı,
Maǵan, Quday Taalaǵa júzin burmaydı.
Aqılsız sózleri sebepli,
Basshıları qılıshtan óledi,
Mısırda olar kúlki boladı».