Hosea 8
Qudaydıń butqa tabınıwshılardı ayıplawı
1Jaratqan Iye bılay deydi:«Kárnay shalıp, dabıl salıń!
Dushpan búrkittey Jaratqan Iyeniń xalqınıń ústinde ushıp júr,
Sebebi xalqım kelisimimdi buzdı,
Olar nızamıma qarsı shıqtı.
2Izrail xalqı Maǵan dad salıp:
„Qudayım, Seni tán alamız!“– deydi.
3Ózleri bolsa, iygilikli islerden bas tarttı,
Dushpanlar quwǵın qıladı olardı.
4Olar Mensiz patshalar tayınladı,
Ruxsatımsız basshılar sayladı.
Gúmis hám altınınan ózleri ushın butlar soqtı,
Usı arqalı baslarına apat keltirdi.
5Háy, Samariya! Seniń tana súlderindegi butıń jerkenishli,
Sizlerge qarsı ǵázebim lawlap janbaqta!
Qashan ayıpsız bolıp júresiz?
6Óytkeni bul Izraildıń isi,
Buttı bir ónerment soqtı, sonlıqtan ol Quday emes!
Samariyanıń músin tanası sındırıp taslanadı.
7Samal ekken adamlar boran orıp alar,
Masaqsız biyday un bolmas.
Biydayıńızdıń masaǵı bolǵanı menen,
Onı bóten xalıqlar jep keter.
8Izrail jalmap jutıldı,
Basqa xalıqlar arasında jaramsız ıdısqa uqsap qaldı.
9Jalǵız qańǵıp júrgen qulanday,
Olar Assiriyaǵa ketti.
Efrayım ózine oynaslar jalladı.
10Olar basqa xalıqlardan oynaslar jallasa da,
Men olardı bir jerge jıynap alaman.
Kúshli patshanıń zulımlıǵı astında,
Olar tez arada hálsizlenip qaladı.
11Efrayım gúnaların juwmaqshı bolıp,
Kóp qurbanlıq orınlar qurıp tasladı.
Bular bolsa, gúna isleytuǵın orınǵa aylandı.
12Men bul xalıqqa kóp nızamlar jazdım,
Biraq olar nızamlarımdı jat nárse dep sanadı.
13Olar qurbanlıqlar beredi,
Ózleri qurbanlıq góshinen jeydi,
Biraq Jaratqan Iyeniń, Meniń kewlim tolmas olarǵa.
Olardıń jınayatların eske alaman.
Gúnaları ushın jazasın beremen,
Olar Mısırǵa qaytıp ketedi.
14Izrail Óz Jaratıwshısın umıtıp, saraylar qurdı,
Yahuda kóp qalalardı bekkemledi.
Biraq Men qalalarına ot qoyaman,
Qorǵanların otqa jem qılaman».
Copyright information for
KaaIBT22L