‏ Hosea 9

Izrail xalqınıń jazalanıwı

1Háy Izrail, basqa xalıqlarday quwanıp, shadlanba!
Sen opasızlıq qılıp, Qudaydan uzaqlastıń,
Barlıq qırman jerinde,
Buzıqshılıqqa tólengen tólemdi jaqsı kórdiń.
2Al endi qırman da, sharap sıǵatuǵın iskenje de xalıqtı toydırmas,
Taza sharap ta olardıń úmitin aqlamas.
3Olar Jaratqan Iyeniń jerinde qalmaydı,
Efrayım Mısırǵa qaytıp ketedi.
Assiriyada haram sanalǵan azıq-awqatlardı jeydi.
4Qurbanlıqlarıń lazımdaǵı nan sıyaqlı bolıp,
Onnan jegenlerdiń hámmesi haram sanaladı.
Jaratqan Iyege ishimlik sadaqasın quymań,
Alıp kelgen qurbanlıqlarıń Oǵan maqul bolmas.
Olardıń nanı tek ǵana qarın ushın,
Bunday nanlar Jaratqan Iyeniń Úyine kirgizilmes.

5Ne isley alasız belgilengen bayramlarda,
Jaratqan Iyeniń bayram kúnlerinde?
6Olar apattan qashıp qutılsa da,
Mısır olardı bir jerge jıynaydı,
Paytaxtı Memfis olardı jerleydi.
Bahalı gúmis zatlarıńdı jantaq shópler basıp,
Shatırlarına sheńgel ósip ketedi.
7Jaza beriletuǵın waqıt jetip keldi,
Esap beretuǵın waqtı keldi.
Háy, Izrail, mınanı bilip qoy,
Kóp gúnalarıń sebepli,
Dushpanshılıǵıńnıń sheksizligi sonshelli,
Payǵambar aqmaq, ruwxtan ilhamlanǵan adamlar telbe, dep sanaldı.
8Qudayım payǵambardı Efrayımǵa gúzetshi qıldı,
Biraq onıń hár bir adımına duzaq qurdıńız,
Dushpanlıq bar Qudayımızdıń Úyinde.
9Giba kúnlerindegi sıyaqlı ▼

▼ Biy 19–21.

, olar azǵırılıwǵa tereń battı.
Quday jınayatların eske aladı,
Gúnalarına jarasa jaza beredi.

10Jaratqan Iye bılay deydi:
«Men Izraildı tapqanda,
Shólde júzim tapqanday boldım.
Ata-babalarıńızdı kórgende,
Dáslepki ánjir miywesin kórgendey boldım.
Biraq olar Baal-Peorǵa kelgende,
Sol jerdegi jerkenishli butqa ózlerin baǵıshladı.
Olar ózleri jaqsı kórgen sol but sıyaqlı
Jerkenishli bolıp qaldı.
11Efrayımnıń saltanatı bir qus sıyaqlı ushıp ketedi,
Olarda perzent te tuwılmas, hayalları da hámiledar bolmas,
Qursaǵına bala da pitpes.
12Eger perzent ósirse de,
Men olardı birewin de qaldırmay tartıp alaman.
Awa, olardı taslap ketkenimde, hásiret shegedi!
13Efrayımdı kórgenimde,
Ol Tir qalasına uqsaytuǵın edi,
Gózzal jerde jaylasqan edi.
Biraq endi Efrayım óz balaların,
Jálladtıń aldına alıp shıǵadı».

14Jaratqan Iye, bul xalqıńa ne bereseń?
Hayallardı bala tuwmaytuǵın,
Balaların emize almaytuǵın qılıp ber.

15Jaratqan Iye bılay deydi:
«Olardıń hár bir jawızlıǵı Gilgaldan baslandı,
Sol jerde jerkene basladım olardan.
Islegen jawızlıqları ushın,
Olardı úyimnen quwıp jiberemen.
Artıq olardı jaqsı kórmeymen,
Olardıń barlıq basshıları Maǵan qarsı bas kóterdi.
16Efrayım quladı, tamırları kewip qaldı,
Artıq miywe bere almaydı.
Balalı bolǵan jaǵdayda da,
Álpeshlegen zúryadın óltiremen».

17Olar Qudayǵa qulaq salmaǵanlıqtan,
Qudayım olardan júz buradı.
Xalıqlar arasında gezende boladı.