‏ Isaiah 1

1Yahuda patshaları Uzziya, Iotam, Axaz hám Xizkiya húkimdarlıq qılǵan dáwirde Amos ulı Iyshayanıń Yahuda hám Erusalim tuwralı kórgen ayanı:

Jaratqan Iyeniń Yahuda xalqına eskertiwi

2Háy kókler, tıńlań! Háy jer, qulaq túr!
Jaratqan Iye bılay deydi:
«Men balalardı tárbiyalap, ósirdim,
Biraq olar Maǵan qarsı bas kóterdi.
3Mal óz iyesin,
Eshek iyesi qoyǵan aqırdı tanıydı.
Biraq Izrail Meni tanımaydı,
Xalqım Meni túsinbeydi».

4Wah, gúnalı millet,
Jazıǵı awır xalıq,
Jawızlıq islewshi áwlad,
Buzǵın balalar, hásiret shegesizler!
Sizler Jaratqan Iyeni tárk ettińiz,
Izraildıń Muxaddesin mensinbedińiz,
Oǵan arqańızdı qarattıńız.

5Ne ushın sizler ele jazalana beresiz?
Nege bas kóteriwdi dawam ete beresiz?
Basıńız pútkilley jaralanǵan,
Júregińiz tolıq hálsiregen.
6Ayaǵıńızdıń ushınan basıńızǵa shekem saw jerińiz joq,
Tek jaraqatlar, kesikler, ashıq jaralar.
Juwılmaǵan, baylanbaǵan, may jaǵılmaǵan.

7Elińiz wayran bolǵan,
Qalańız janıp kúl bolǵan.
Jat jerliler kóz aldıńızda jerińizdi talan-taraj etedi,
Wayran etip, onı qarabaqanaǵa aylandıradı.
8Qız Sion jalǵızlanıp, júzim baǵındaǵı sayaman,
Palız atızındaǵı shertek,
Qamaldaǵı qala sıyaqlı bolıp qaladı.
9Eger Álemniń Jaratqan Iyesi,
Bizler ushın bir qansha adamdı aman qaldırmaǵanda,
Bizler Sodomday bolar,
Gomoraǵa megzer edik. ▼

▼ Jar 18:16–19:28.

10Háy, Sodom basshıları,
Jaratqan Iyeniń sózin tıńlań!
Háy, Gomora xalqı,
Qudayımızdıń Nızamına qulaq salıń!
11«Qurbanlıqlarıńızdıń kóp bolǵanınan Maǵan ne payda?!
– deydi Jaratqan Iye. –
Jandırılatuǵın qurbanlıqqa bergen qoshqarlarıńızǵa,
Semirtilgen mallarıńızdıń maylarına ábden toydım.
Buǵa, toqlı hám eshkilerdiń qanınan lázzet almayman.
12Aldıma xızmet etiw ushın kelgenińizde,
Kim sizlerden bulardıń hámmesin alıp keliwdi soradı?
Meniń háwlimdi basqılamań,
13Bunnan bılay mánissiz sadaqalarıńızdı usınbań!
Xosh iyisli tútetkilerińiz de Maǵan jerkenishli.
Jańa ay bayramlarıńızdaǵı, Shabbat kúnlerińizdegi,
Basqa da jıynalıslarıńızdaǵı jawızlıqlarǵa taqatım joq.
14Jańa ay bayramıńızdı hám belgilengen bayram kúnlerińizdi,
Janım jek kóredi.
Olar Men ushın júk boldı,
Olardı kóterip júriwden sharshadım.

15Sizler qol jayıp, Maǵan jalbarınǵanıńızda,
Kózimdi sizlerden jasıraman,
Qanshama kóp duwa etseńiz de,
Men tıńlamayman.
Qollarıńız qanǵa batqan.
16Juwınıń, tazalanıń,
Islegen jawız islerińizdi kózimnen joq qılıń,
Jamanlıq qılıwdı toqtatıp,
17Jaqsılıq islewdi úyreniń!
Ádalatlıqtı izleń,
Eziwshini jolǵa salıń,
Jetimdi qorǵań,
Jesirdi jaqlań.

18Kelińler, máseleni birge talqılayıq!
– deydi Jaratqan Iye. –
Gúnalarıńız qıp-qızıl bolsa da,
Olar qarday appaq boladı.
Olar shım qızıl bolsa da,
Aq júndey boladı.
19Eger boysınıp, tıńlasańız,
Jer óndirgen jaqsı nárselerdi jeysiz.
20Al eger qasarısıp, bas kóterseńiz,
Sizlerdi qılısh jalmaydı».
Bular Jaratqan Iyeniń awzınan shıqqan sózler.

Quday Erusalimdi húkim etedi

21Erusalim! Qalayınsha sadıq qala buzıq hayalǵa aylandı?
Ol ádalatqa tolı edi,
Onda ádillik mákan basqan edi,
Endi bolsa, qanxorlarǵa tolǵan!
22Gúmistey ediń ǵawajaqqa aylandıń,
Jaqsı sharaptay ediń endi suw aralastı.
23Húkimdarlarıń qulaqsızlıq etti,
Urılarǵa sherik boldı.
Olardıń hámmesi paranı jaqsı kóredi,
Sawǵa dáme etedi.
Olar jetimlerdi qorǵamaydı,
Jesirlerdiń arzın tıńlamaydı.

24Sonlıqtan Iye, Álemniń Jaratqan Iyesi,
Izraildıń Kúshli Qudayı bılay deydi:
«Dushpanlarıma ǵázebimdi tógip,
Jawlarımnan óshimdi alaman!
25Qolımdı saǵan qarsı kóterip,
Ǵawajaǵıńdı silti menen tazartaman,
Barlıq qosımtalardı sennen alıp taslayman.
26Burınǵıday, biylerińdi qayta tiklep,
Basında bolǵanınday, másláhátshilerińdi qayta qoyaman.
Sonda seni „Ádillik qalası,
Sadıq paytaxt“dep ataydı.

27Sion ádalatlıq penen,
Táwbe qılǵan turǵınları ádillik penen qutqarıladı.
28Biraq óshegiskenleri menen gúnakarları birge qırıp taslanıp,
Jaratqan Iyeni tárk etkenler joq qılınadı.

29Zawıqlanıp sıyınǵan kiyeli terebinf aǵashlarıńız ushın uyatqa qalıp,
Sıyınıw ushın ózlerińiz saylap alǵan baǵlarıńız ushın shermende bolasız.
30Sizler japıraǵı tógilgen terebinf aǵashına,
Suwsız qalǵan baǵqa uqsaysız.
31Kúshliler qawıqqa,
Olardıń isleri ushqınǵa aylanadı.
Kúshliler isleri menen birge janadı,
Bul ottı hesh kim óshirmeydi».