‏ Isaiah 10

1Ádalatsız qaǵıydalar shıǵarıp,
Jábirlewshi pármanlar jazǵanlar, hásiret shegesizler!
2Sizler jarlılardı huqıqınan ayırıp,
Xalqımnıń hálsizlerin ádalattan mahrum etesiz,
Jesirlerdi tonap,
Jetimlerdi oljaǵa aylandırasız.
3Sizler jaza kúni,
Uzaqtan apat kelgende ne qılasız?
Járdem sorap kimge juwırasız?
Baylıǵıńızdı qayaqqa qaldırasız?
4Tutqınlar arasında dize búgiwden,
Yamasa sawashta ólip ketiwden basqa sharańız joq.
Bári bir, Jaratqan Iyeniń ǵázebi basılmas,
Qolı kóteriliwin dawam eter.

Qudaydıń Assiriyaǵa shıǵarǵan húkimi

5«Ashıwımnıń tayaǵı bolǵan Assiriya, hásiret shegedi!
Qolındaǵı tayaǵı – Meniń ǵázebim.
6Onı qudaysız xalıqqa,
Ǵázebim kelgen xalıqqa qarsı jiberemen.
Onı talan-taraj qılıp, oljalawdı,
Kóshedegi ılay sıyaqlı, ayaq astı qılıwdı buyıraman.
7Biraq Assiriya patshası bulay niyet etip,
Bulay oylamaydı da.
Onıń oyı kóplegen milletlerdi qırıp, joq qılıw.
8Ol bılay deydi:
„Meniń láshkerbasılarımnıń hámmesi patshalar emes pe?
9Kalno qalası Karkemish sıyaqlı,
Xamat qalası Arpad sıyaqlı,
Samariya Damask sıyaqlı joq bolǵan emes pe?
10Butları Erusalim menen Samariyanikinen de úlken bolǵan,
Butqa iseniwshi patshalıqlarǵa qolım jetti.
11Samariya hám onıń butlarına islegenimdi,
Erusalim hám onıń butlarına da islemeymen be?“»

12Iyemiz Sion tawına hám Erusalimge qarsı barlıq islerin tamamlap bolıp, bılay deydi: «Assiriya patshasın maqtanıp kókirek kótergeni hám tákabbir názer taslap júrgeni ushın jazalayman. 13Sebebi Assiriya patshası bılay deydi:

„Bunı óz qollarımnıń kúshi menen,
Óz danalıǵım menen isledim.
Óytkeni men aqıllıman.
Men xalıqlardıń shegaraların alıp taslap,
Ǵáziynelerin taladım,
Qúdiretli birewdey, olardıń patshaların taxttan qulattım.
14Uya tapqan sıyaqlı,
Milletlerdiń baylıǵın taptım,
Qarawsız qaldırılǵan máyeklerdi jıynaǵanday,
Pútkil dúnyanı jıynadım.
Qanat qaǵıp, awzın ashıp,
Aybat etken bolmadı“».

15Balta ózi menen shawıp atırǵanǵa maqtana ma?
Yamasa jarǵı ózi menen kesip atırǵanǵa ózin maqtay ma?
Tayaq ózin uslap turǵandı kótere ala ma?
Yamasa aǵashtan bolmaǵan tiri jandı shoqmar kóterip silke ala ma?
16Sonlıqtan Iye, Álemniń Jaratqan Iyesi,
Assiriyanıń mıqlı jawıngerlerine,
Júdetetuǵın kesellik jiberedi.
Onıń saltanatı astında alısıp atırǵan órt kibi,
Jalın tutanadı.
17Izraildıń nurı otqa,
Onıń Muxaddesi jalınǵa aylanıp,
Assiriyanıń tikenzar hám jantaqların,
Bir kúnde jandırıp, jalmap jiberedi.
18Onıń sawlatlı toǵayları menen ónimdar jerlerin,
Pútkilley joq qıladı Jaratqan Iye,
Janı da, táni de nabıt boladı,
Awır dártke jolıqqan adam kibi.
19Toǵaydaǵı tereklerdiń az qalǵanı sonshelli,
Hátte, jas balalar da olardı sanap, jaza aladı.

Izraildıń aman qalǵanları

20Sol kúni Izraildıń qalǵanları,
Yaqıptıń urpaǵınıń aman qutılǵanları,
Bunnan bılay ózlerin jazalaǵanlarǵa arqa súyemey,
Sadıqlıq penen Jaratqan Iyege,
Izraildıń Muxaddesine arqa súyeydi.
21Aman qalǵanlar, Yaqıptıń urpaǵınıń aman qalǵanları,
Kúshli Qudayǵa qaytıp keledi.
22Izrail, seniń xalqıń teńizdiń qumınday kóp sanlı bolǵan bolsa da,
Tek olardan aman qalǵanları ǵana qaytadı.
Joq qılınıw qarar etilgen,
Ol ádillik penen iske asırıladı.
23Qarar qılınǵanınday, Iye, Álemniń Jaratqan Iyesi,
Pútkil jer júzinde joq qılınıwdı ámelge asıradı.

Iyemizdiń Assiriyanı jazalawı

24Sonlıqtan Iye, Álemniń Jaratqan Iyesi bılay deydi:
«Háy, Sionda jasap atırǵan xalqım!
Mısırlılardıń islegeni sıyaqlı,
Assiriyalılar sizlerge shoqmar kóterip,
Tayaq penen urǵanda, olardan qorqpańlar.
25Kóp ótpey, Meniń sizlerge degen ǵázebim basılıp,
Qáhárim assiriyalılardı joq qılıwǵa qaray dónedi.
26Men, Álemniń Jaratqan Iyesi,
Midyanlardı Oreb jartasında qırǵanım sıyaqlı, ▼

▼ Biy 7:22-25.

Olarǵa qarsı qamshımdı kóteremen.
Mısırda qılǵanım sıyaqlı,
Hasamdı suwlar ústine sozaman. ▼

▼ Shıǵ 14:26-28.

27Sol kúni assiriyalılardıń júgi eńseńizden túsip,
Moyıntırıǵı moynıńızdan alıp taslanadı.
Kúshke tolǵanıńız sebepli, moyıntırıq sındırıladı».

28Assiriyalılar Ayyat qalasına júris qıldı,
Migrondı kesip ótip,
Júklerin Mixmasta qaldırdı.
29Qıyın joldan asıp ótip, Gebada túnedi,
Rama qalası lárzege keldi,
Gibada jasaytuǵın Shauldıń xalqı qashıp ketti.
30Páriyad qıl, háy, Gallim qızı!
Qulaq túr, háy, Laysha!
Juwap ber, háy, Anatot!
31Madmena xalqı qashıp ketti,
Gebim turǵınları pana izlep, ushtı.
32Bul kúni dushpanlar Nobta toqtaydı,
Qız Sionnıń tawına,
Erusalimniń tóbeshigine mush kóteredi.

33Mine, Iye, Álemniń Jaratqan Iyesi,
Qorqınıshlı kúshi menen shaqalardı kesip,
Sawlatlı aǵashlardı shawıp taslaydı,
Biyik terekler sozılıp jerge qulaydı.
34Toǵaydaǵı qalıń jerlerdi Ol balta menen shawıp taslaydı,
Lebanonnıń qalıń toǵayları da qulaydı.