‏ Isaiah 11

Tınısh patshalıq

1Ishaydıń ▼
▼ Ishay – Dawıt patshanıń ákesi.
 túbirinen bir putaq ósip shıǵıp,
Onıń tamırınan ósip shıqqan shaqa miywe beredi.
 2Jaratqan Iyeniń Ruwxı:
Danalıq hám aqıl-parasat ruwxı,
Másláhát hám kúsh-qúdiret ruwxı,
Jaratqan Iyeni biliw hám Onnan qorqıw ruwxı,
Onıń ústinde boladı.
 3Ol Jaratqan Iyeden qorqıwdan lázzet alar.
Ol kózi kórgenine qarap, húkim qılmas,
Qulaǵı esitkenine qarap, sheshim qabıllamas.
 4Ol jarlılardı ádillik penen húkim qılıp,
Jer betindegi kámbaǵallar ushın tuwrı qarar shıǵarar.
Bir awız sózi menen dúnyanı jazalap,
Demi menen zalımdı óltirer.
 5Ádillik Onıń belindegi,
Sadıqlıq Onıń beldemesindegi qayıs bolar.

6Sonda qozı qasqır menen jasar,
Qaplan ılaq penen jatar,
Baspaq, arıslan hám semirtilgen mallar birge bolıp,
Kishkene balalar olardı jeteklep júrer.
 7Sıyır ayıw menen birge otlar,
Olardıń tólleri birge jatar,
Arıslan buǵa sıyaqlı saban jer.
 8Bópe jılan uyasınıń ústinde oynar,
Náreste qolın uwlı jılannıń inine tıǵar.
 9Muxaddes tawımnıń hesh bir jerinde,
Zıyan keltirilmes, hesh kim óltirilmes.
Sebebi teńiz suwǵa tolǵanı sıyaqlı,
Jer beti de Jaratqan Iyeniń bilimine tolar.

10Sol kúni Ishaydan ósip shıqqan tamır xalıqlar ushın belgi boladı. Milletler Onı izlep keledi, Onıń mákanı saltanatlı boladı. 11Sol kúni Iyemiz Óz xalqınan aman qalǵanlardı qaytarıw ushın ekinshi ret qolın sozadı. Ol Assiriyadan, Mısırdan, Patrustan, Xabashstannan, Elamnan, Shınardan ▼
▼ Shınar – bul eski Babiloniyanıń atı.
, Xamattan hám teńizdegi atawlardan olardı qaytarıp alıp keledi.

12Ol milletlerge belgi etip bayraq kóterip,
Izraildıń quwǵın bolǵanların toplar.
Yahudanıń tarqalıp ketkenlerin,
Jerdiń tórt tárepinen jıynar.
 13Efrayımnıń qızǵanshaqlıǵı toqtar,
Yahudanıń dushpanlıǵı joq qılınar,
Efrayım Yahudanı kúnlemes,
Yahuda Efrayımǵa dushpanlıq etpes.
 14Olar batısta filistlerge hújim eter,
Shıǵıstaǵı xalıqlardı birge talar,
Edomǵa hám Moabqa qarsı qol kóterer,
Ammonlar boysınar olarǵa.
 15Mısır teńiziniń qoltıǵın,
Bóleklep taslar Jaratqan Iye.
Ol Evfrat dáryası ústine qolın sozıp,
Kúydiretuǵın samal jiberer,
Onı jeti arnaǵa bóler,
Sandal menen óter adamlar onnan.
 16Mısırdan shıqqan kúni,
Izraillılarǵa shıǵıw jolı bolǵanı kibi,
Jaratqan Iyeniń xalqınıń Assiriyada aman qalǵanları ushın,
Úlken bir shıǵıw jolı boladı.
Copyright information for KaaIBT22L