‏ Isaiah 13

Babilonǵa qarsı payǵambarshılıq

1Amos ulı Iyshaya kórgen ayanda Babilon tuwralı aytılǵan payǵambarshılıq sóz:

2Taqır tóbe basına bayraq tigiń,
Shabıwılshılarǵa dawıslap baqırıń.
Aqsúyeklerdiń dárwazalarına kiriwi ushın,
Qol bılǵap, olarǵa belgi beriń.
3Men Ózimniń tańlap alǵanlarıma buyrıq berdim.
Ǵázebimdi shashıw ushın, jawıngerlerimdi shaqırdım.
Meniń jeńisime quwanatuǵınlardı topladım.

4Tawlardaǵı alamannıń baqırısqan dawısın tıńlań,
Ol sansız xalıqtıń dawısına megzer.
Bir jerge jıynalǵan milletlerdiń,
Yaǵnıy patshalıqlardıń qıshqırısqan dawısın tıńlań!
Álemniń Jaratqan Iyesi sawashqa láshker toplamaqta!
5Jaratqan Iye hám Onıń ǵázep quralları,
Pútkil jerdi joq qılıw ushın,
Uzaq jerlerden, aspannıń shetinen kiyatır olar.

6Páriyad etiń! Jaratqan Iyeniń húkim kúni jaqın qaldı!
Ol keledi Qúdireti kúshli Qudaydıń apatshılıǵı kibi.
7Sol sebepli qollarda dárman qalmas,
Hár bir adamnıń ruwxı túser.
8Olardı qorqınısh biylep,
Dárt hám qayǵı basar,
Tolǵaq tutqan hayalday azap sheger,
Bir-birine hayran bolıp qarar,
Júzleri ottay lawlap janar.

9Mine, Jaratqan Iyeniń húkim kúni kiyatır!
Jer júzin wayran etip,
Ondaǵı gúnakarlardı joq qılıw ushın,
Rehimsiz, qáhárli hám lawlaǵan ǵázepke tolǵan.
10Kóktegi juldızlar, olardıń toparı,
Jarıqlıq taratpas,
Shıqqan quyash qarawıtıp,
Ay da nurın shashpas.

11Men dúnyanı jawızlıǵı ushın,
Zalımlardı qılmısları ushın jazalayman.
Menmenlerdiń menmenligine shek qoyaman,
Zalımlardıń tákabbirligin jerge uraman.
12Men adamlardı sap altınnan da,
Ofir altınınan da siyrek ushıraytuǵın qılaman.
13Sonlıqtan Álemniń Jaratqan Iyesiniń,
Meniń ǵázebim lawlaǵan kúni,
Men kóklerdi titiretemen,
Qáhárimnen jer ornınan qozǵalar.

14Sonda ańshı quwǵan jeyranday,
Shopanı joq qoylarday,
Hár bir adam óz xalqına qaytar,
Hár biri óz eline qashar.
15Hár bir tutılǵan adam nayzaǵa shanshılar,
Hár bir qolǵa túsken adam qılıshtan ótkeriler.
16Balaları kóz aldında mılja-mılja qılınar,
Úyleri tonalıp, hayallarınıń namısı ayaq astı qılınar.

17Mine, Men gúmisti qádirlemeytuǵın,
Altındı súymeytuǵın,
Midiyalılardı olarǵa qarsı óshegistiremen.
18Olardıń oq jayları jas jigitlerdi óltirer,
Bópelerge rehim etpes,
Balalarǵa da ayanısh penen qaramas.
19Men, Quday patshalıqlardıń eń saltanatlısı,
Kaldeylerdiń jarqın maqtanıshı bolǵan Babilondı,
Sodom hám Gomora sıyaqlı,
Jer menen jeksen etemen.
20Ol jerde hesh qashan adam jasamas,
Áwladtan-áwladqa mákan basqan adam bolmas,
Kóshpeli arablar ol jerge shatırın tikpes,
Shopanlar da súriwin ol jerge jaymas.
21Biraq jabayı haywanlar ol jerge mákan basar,
Ol jerdegi úylerdi jabayı ańlar iyeler,
Ol jerde úkiler jasar,
Tekeler sekirip júrer.
22Qorǵan qalalarında sırtlanlar,
Kórkem saraylarında saǵallar ulır.
Babilonnıń sońı jaqın qaldı,
Onıń kúnleri uzaq bolmas.