‏ Isaiah 14

Jaratqan Iyeniń xalqınıń úyine qaytıwı

1Jaratqan Iye Yaqıptıń urpaqlarına rehim eter,
Izraildı jáne tańlap alıp,
Ózleriniń eline ornalastırar.
Jat jerliler olarǵa qosılıp,
Yaqıptıń násiline biriger.
2Xalıqlar olardı óz jerlerine alıp keler,
Izrail xalqı bolsa, olardı basıp alıp,
Jaratqan Iyeniń jerinde qul hám shorı qılar.
Ózlerin tutqın qılǵandı tutqın qılıp,
Ózlerin ezgenlerge húkimdarlıq qılar.

3Jaratqan Iye sizlerdi azaptan, qayǵıdan hám qullıqtıń awır júginen qutqarǵan kúni, 4Babiloniya patshasın mazaq qılıp, mına qosıqtı aytıp berersiz:

«Mine, eziwshiniń aqırı keldi!
Tákabbirligi tamam boldı!
5Jaratqan Iye zalımnıń tayaǵın,
Húkimdardıń hasasın sındırdı.
6Ol ǵázeplenip, xalıqlardı úzliksiz sabap,
Ayawsız ezip, milletlerdi qáhár menen basqarǵan edi.
7Endi pútkil dúnya tınıshlıq hám paraxatshılıq ishinde,
Shadlanıp qosıq aytadı.
8Hátte, Lebanonnıń sárwi hám kedr aǵashları,
Shadlanıp, eziwshiler ústinen bılay deydi:
„Sen jerge qulaǵannan beri,
Hesh kim bizdi shabıwǵa kelmeydi“.

9Seni kútip alıw ushın,
Óliler mákanı háreketke keledi.
Seni qarsı alıw ushın,
Ol ólilerdiń ruwxların,
Jer júziniń barlıq basshıların oyatadı,
Milletlerdiń barlıq patshaların,
Taxtlarınan turǵızadı.
10Olardıń hámmesi saǵan:
„Sen de bizlerdey hálsiz boldıń,
Bizlerge uqsadıń“, – deydi.
11Saltanatıń da, arfańnıń sesti de,
Óliler mákanına kirdi.
Shıbın qurtları astıńa tóselip,
Jawın qurtları kórpeń boldı.

12Háy, jarqın juldız, tań ulı,
Kóklerden qalay quladıń!
Xalıqlardı ezip kelgen sen,
Endi óziń jerge jıǵıldıń!
13Sen ishińnen bılay dediń:
„Kóklerge kóterilemen,
Taxtımdı Qudaydıń juldızlarınan,
Joqarıǵa qoyaman.
Qudaylar jıynalatuǵın tawda,
Safon tawında otıraman.
14Bultlardıń ústine shıǵaman,
Ózimdi Quday Taaladay qılaman“.
15Biraq sen óliler mákanına,
Tuńǵıyıqtıń túbine ılaqtırılasań.

16Seni kórgenler tigilip qarap,
Táǵdirińe hayran qalıp, bılay deydi:
„Jerdi terbeltip,
Patshalıqlardı titiretken,
17Dúnyanı shólistanǵa aylandırıp,
Ondaǵı qalalardı qıyratqan,
Tutqınlardı úylerine qaytarmaǵan adam usı ma?“
18Milletlerdiń patshaları saltanatlı jerlenip,
Hár biri óz qábirinde jatır.
19Al sen kereksiz putaq kibi,
Qábirińnen sırtqa ılaqtırıldıń.
Sen qılısh penen shabılǵan,
Taslı tuńǵıyıqqa taslanǵan,
Óliler arasında jatırsań.
Ayaq astında qalǵan óli denege uqsaysań.
20Sen basqa patshalar kibi jerlenbeyseń.
Sebebi sen jerińdi wayran ettiń,
Xalqıńdı qırdıń.
Jawızlıq qılǵanlardıń násili hasla eske alınbasın!

21Ata-babaları islegen ayıp ushın,
Ulların bawızlawǵa tayarlań.
Olar qalıp, dúnyanı iyelemesin,
Jer betin óz qalaları menen toltırmasın».

22«Men olarǵa qarsı kóterilemen,
– deydi Álemniń Jaratqan Iyesi, –
Men Babilonnan onıń atın, tiri qalǵanların,
Urpaqların hám keleshek áwladın joq qılaman,
– deydi Jaratqan Iye. –
23Men onı kirpitikenler iyeligine,
Batpaqlıqqa aylandırıp,
Joq qılıw sipsesi menen sıpırıp taslayman,
– deydi Álemniń Jaratqan Iyesi».

Assiriyaǵa qarsı payǵambarshılıq

24Álemniń Jaratqan Iyesi bılay dep ant ishti:

«Neni niyet etken bolsam, sol boladı,
Qanday qararǵa kelgen bolsam, sol ámelge asadı.
25Assiriyalılardı Ózimniń elimde sındıraman,
Tawlarımda olardı ayaq astı qılaman.
Olardıń moyıntırıǵı xalqımnan,
Júkleri xalqımnıń iyninen alıp taslanadı.
26Pútkil dúnya ushın qabıl etilgen qarar bul,
Pútkil milletlerge sozılǵan qol bul».
27Álemniń Jaratqan Iyesi qarar etti,
Onı kim biykar qıla aladı?
Ol qolın sozdı,
Onı kim izge qaytara aladı?

Filistlerge qarsı payǵambarshılıq

28Patsha Axaz ólgen jılı usı payǵambarshılıq sóz tústi:

29«Ózlerińizdi urǵan tayaq sındı dep,
Shadlanbańlar, háy Filistiya!
Sebebi jılannıń tuqımınan qara jılan tuwılar,
Jılannıń balası da záhárli jılan bolar.
30Jarlınıń tuńǵıshı toyadı,
Mútájler qáwipsizlikte boladı,
Biraq seniń tuqımıńdı ashlıqtan qurtaman,
Aman qalǵanlarıńızdı da óltiremen.
31Páriyad qıl, háy dárwaza! Dad sal, háy, qala!
Filistiya, qorqınıshtan ruwxıńız tússin!
Arqadan shań-tozań bultı kiyatır,
Dushpan áskerleri sap tartıp kiyatır».

32Millettiń xabarshılarına ne dep juwap beremiz?
Olarǵa: «Jaratqan Iye Siondı qurdı,
Xalqınıń jarlıları sol jerden pana tabadı», – deymiz.