Isa 15 | KaaIBT22L | STEP | Moab tuwralı payǵambarshılıq sóz: Moabtıń Ar qalası, Bir túnde qarabaqanaǵa aylanıp, Moab joq boldı! Moabtıń Kir qalası, Bir túnde qarabaqanaǵa aylanıp, Moab joq boldı!

‏ Isaiah 15

Moabqa qarsı payǵambarshılıq

1 Moab tuwralı payǵambarshılıq sóz:

Moabtıń Ar qalası,
Bir túnde qarabaqanaǵa aylanıp,
Moab joq boldı!
Moabtıń Kir qalası,
Bir túnde qarabaqanaǵa aylanıp,
Moab joq boldı!
2 Dibon xalqı jılaw ushın ibadatxanaǵa,
Sıyınıw orınlarına shıqtı.
Moab xalqı Nebo hám Medeba ushın joqlaw aytar,
Hár biri shashın aldırıp, saqalın qırqar.
3 Kóshelerde xalıq aza kiyimin kiyer,
Úydiń tóbelerinde, maydanlarda,
Hámme páriyad etip, zar eńirep jılar.
4 Xeshbon menen Elale baqırıp jılar,
Olardıń dawısı Yahasqa deyin esitiler.
Sonlıqtan Moabtıń áskerleri de zar jılar,
Qorqınıshtan júrekleri qaltırar.

5 Júregim Moab ushın jılaydı,
Qashqınları Soarǵa,
Eglat-Shelishiyaǵa qashıp ketedi.
Olar jılawı menen Luxit biyikligine kóterilip,
Xoronayımǵa baratuǵın jolda,
Wayran bolǵanı ushın dad salıp jılaydı.
6 Nimrim suwları qurıp, shópler soladı,
Taza shóp kógermedi, hasla kók shóp qalmadı.
7 Jıynap-terip, saqlaǵan baylıǵın,
Olar Arabim sayı arqalı alıp ketedi.
8 Moab jeri jılaǵan dawısqa toldı,
Olardıń eńirewi Eglayımǵa,
Nalası Beer-Elimge jetti.
9 Dibonnıń suwları qanǵa tolǵan.
Biraq Men Dibonnıń basına,
Bunnan beterin jawdıraman,
Moabtan qashqanlardıń,
Elde qalǵanlardıń ústine,
Arıslan jiberemen.