Isa 16 | KaaIBT22L | STEP | Shól jolı arqalı Seladan, Qız Sionnıń tawına, Eldiń húkimdarlarına, Qozılardı sıyǵa jiberiń.

‏ Isaiah 16

1 Shól jolı arqalı Seladan,
Qız Sionnıń tawına,
Eldiń húkimdarlarına,
Qozılardı sıyǵa jiberiń.
2 Moab hayalları uyalarınan ılaqtırıp taslanǵan,
Qaltırap qanat qaqqan quslarday,
Arnon sayınıń ótkelinde júredi.

3 Olar Yahuda xalqına bılay deydi:
«Bizge keńes ber, qarar qabıl et,
Kún ortasındaǵı sayańdı,
Tún sıyaqlı bizge túsir.
Quwılǵanlardı jasır,
Qashaqlardı qolǵa berme.
4 Moabtan quwılǵanlar,
Mákan bassın arańızda,
Qırǵın qılıwshılardan,
Jasırınatuǵın pana bol!»

Eziwshiler joq bolǵanda,
Wayranshılıq toqtap,
Talanshılar elden ǵayıp bolar.
5 Taxt súyispenshilik penen ornatılar,
Onda sadıqlıq penen otırar húkimdar,
Ol Dawıttıń xojalıǵınan kelip shıǵar,
Ádalatlıqtı izler, ádillikti júzege asırıwǵa asıǵar.

6 Moabtıń tákabbirligi,
Asa menmenligi, dańqparazlıǵı,
Kókirekligi hám surbetligi haqqında esittik.
Biraq olar bosqa maqtanadı.
7 Sonıń ushın moablılar zar jılasın,
Hámmesi birge Moab ushın nala sheksin.
Kir-Xaresettiń kishmishlerin qumartıp,
Qayǵırıp, joqlaw aytıń.
8 Xeshbonnıń egin maydanları,
Sibmanıń júzimzarları qurıp qaldı,
Milletlerdiń kósemleri,
Jaqsı júzim aǵashları basqılandı,
Bul aǵashlar Yazerge jetip,
Shólge deyin jayıldı.
Shaqaları uzayıp,
Teńizden de asqan edi.
9 Sonlıqtan Sibmanıń júzimzarları ushın,
Yazer jılaǵanday, men de jılayman.
Xeshbon hám Elale!
Sizlerdi kóz jasım menen suwǵaraman.
Sebebi miywe pisken waqıttaǵı,
Dán oraǵı waqtındaǵı oyın-kúlkińiz toqtadı.
10 Shadlıq hám quwanısh baǵlardı tárk etti,
Júzimzarlarda hesh kim shadlanıp baqırmaydı, qıshqırmaydı da,
Júzim sıǵılatuǵın shuqırlarda júzim sıǵılmaydı,
Quwanıshlı shawqımlarǵa shek qoydım.
11 Júregim Moab ushın,
Janım Kir-Xeres ushın lira sıyaqlı nala shegedi.
12 Eger Moab ózleriniń sıyınıw ornında payda bolıp,
Ózlerin talıqtırsa da,
Olar duwa etiw ushın ózleriniń muxaddes orınlarına kelse de,
Bul hesh qanday payda bermeydi.

13 Bul Jaratqan Iyeniń Moab haqqında álle qashan aytqan sózi edi. 14 Biraq endi Jaratqan Iye bılay deydi: «Jallanǵan isshiniń múddeti kibi, úsh jıldan keyin, Moabtıń saltanatınıń hám kóp sanlı xalqınıń abırayı tógiledi. Xalqınıń aman qalǵanları júdá az hám hálsiz boladı».