‏ Isaiah 17

Quday Aramdı hám Izraildı jazalaydı

1Damask tuwralı payǵambarshılıq sóz:

«Mine, Damask endi qala dep sanalmas,
Ol qarabaqanaǵa aylanadı.

2Aroer qalaları tárk etiledi,
Súriwler jatatuǵın jaylawǵa aylanıp,
Olardı úrkitetuǵın hesh kim bolmas.
 3Efrayımda qorǵanlı qala qalmas,
Damaskte patshalıq bolmas,
Aramnıń aman qalǵanları,
Izraildıń saltanatı kibi bolar,
– deydi Álemniń Jaratqan Iyesi. –

4Sol kúni Yaqıptıń dańqı ósher,
Maylı denesi azıp-tozar.
 5Oraqshılardıń dándi jıynap alǵanınday,
Óz qolları menen masaqtı terip alǵanınday boladı.
Ol Refaim oypatlıǵında birewdiń masaqlardı jıynap alǵanına uqsaydı.
 6Záytún aǵashınıń miywesi qaǵıp alınǵannan soń,
Eń tóbesinde eki-úsh záytún,
Ónimdar shaqasında tórt-bes záytún qalǵanı sıyaqlı,
Tek bir neshe adam ǵana aman qaladı,
– deydi Izraildıń Qudayı Jaratqan Iye».

7Sol kúni xalıq Jaratqanǵa názerin tigedi,
Kózleri Izraildıń Muxaddesin kóredi.
 8Endi olar ózleri islegen qurbanlıq orınǵa qaramaydı.
Qolları menen soqqan kiyeli aǵashlarǵa,
Tútetki tútetiletuǵın orınlarǵa názer salmaydı.
 9Sol kúni olardıń bekinisli qalaları,
Izraillılardan qashqan xiwler menen amorlardıń,
Tárk etken qalaları sıyaqlı shólge aylanadı.
 10Sen óz Qutqarıwshı Qudayıńdı umıttıń,
Óz Qorǵanıń bolǵan Jartastı eske almadıń.
Sonlıqtan unamlı ósimlikler ekseń de,
Basqa jaqtan alıp kelip, júzim nállerin otırǵızsań da,
 11Olardı ekken kúni ósirseń de,
Otırǵızıp baslaǵan kúni azanda gúlletseń de,
Hástelik hám dárt kúni kelgende,
Jıynap alar daqıl bolmaydı.

12Kóp milletlerdiń shuwıldısı,
Teńizdiń shuwıldısınday shuwıldaydı!
Xalıqlardıń gúwildisi,
Kúshli tolqınlar kibi gúwildeydi!
 13Milletler kúshli tolqınlardıń gúwildisi kibi gúwildesin,
Biraq Quday olardı áshkaralaǵanda,
Tóbelerde samal ushırǵan qawıq kibi,
Uzaqlarǵa qashıp ketedi.
Dúbeley ushırǵan qańbaqtay aylanadı.
 14Keshki waqıt, mine, qorqınısh!
Azanǵa taman olar joq bolıp ketedi!
Bizlerdi tonaǵanlardıń payı,
Bizlerdi talan-taraj qılǵanlardıń táǵdiri usınday boladı.
Copyright information for KaaIBT22L