Isaiah 18
Quday Xabashstandı jazalaydı
1Xabashstan dáryalarınıń arǵı jaǵında jasaytuǵın,Qanatların suwıldatatuǵın el, hásiret shegesiz!
2Sol el qamıstan islengen qayıq penen,
Nil dáryası arqalı óz elshilerin jiberedi.
Háy, júyrik xabarshılar!
Jerleri dáryalar menen bólingen,
Uzın boylı, tegis terili milletke,
Jaqın-alısqa qorqıw salǵan xalıqqa,
Kúshli hám basqınshı milletke qaytıńlar.
3Háy sizler, pútkil dúnya turǵınları,
Jer betinde jasawshılar!
Taw basında urıs jalawı kóterilse, qarańlar,
Kárnay shalınǵanda, esitińler.
4Jaratqan Iye maǵan bılay dedi:
«Kúnniń háwirli ıssısı sıyaqlı,
Jıyın-terim waqtındaǵı shıqlı bult sıyaqlı,
Men Óz mákanımnan tınısh qarap turaman».
5Hasıl jıynalmastan aldın,
Gúllep bolıp, gúl júzimge aylanǵanda,
Ol baǵ qayshısı menen putaqlardı kesip,
Jayılǵan shaqalardı shawıp, ılaqtıradı.
6Hámmesi tawlardaǵı jırtqısh quslarǵa,
Jerdegi jabayı haywanlarǵa qaladı.
Olar jazda jırtqısh quslarǵa,
Qısta jabayı haywanlarǵa jem boladı.
7Sol waqıtta jerleri dáryalar menen bólingen,
Uzın boylı, tegis terili millet,
Jaqın-alısqa qorqıw salǵan xalıq,
Kúshli hám basqınshı millet,
Álemniń Jaratqan Iyesine,
Álemniń Jaratqan Iyesiniń atı bolǵan jerge,
Sion tawına sawǵalar alıp keledi.
Copyright information for
KaaIBT22L