‏ Isaiah 19

Mısır tuwralı payǵambarshılıq

1Mısır tuwralı payǵambarshılıq sóz:

Mine, Jaratqan Iye ushqır bultqa minip alıp,
Mısırǵa keledi.
Onıń aldında Mısır butları titireydi,
Mısırlılardıń ruwxları túsip ketedi.

2«Men mısırlını mısırlıǵa qarsı kóteremen,
Tuwısqan tuwısqanǵa, qońsı qońsıǵa, qala qalaǵa,
Patshalıq patshalıqqa qarsı urısadı.
3Mısırlılardıń ruwxı túsedi,
Niyetlerin pushqa shıǵaraman.
Olar butlarınan, óli ruwxlarınan,
Árwaqlardı hám ruwxlardı shaqırıwshılardan másláhát soraydı.
4Men mısırlılardı zalım xojayınlardıń qolına beremen,
Olardıń ústinen rehimsiz patsha húkim súredi»,
– deydi Iye, Álemniń Jaratqan Iyesi.

5Nildiń suwı qurıp,
Tarmaqları tartılıp, qurǵap qalar.
6Onıń kanalları pataslanar.
Mısırdaǵı Nildiń tarmaqları qurıp, kewip qalar,
Jekenler hám qamıslar shirip keter.
7Nildiń jaǵasındaǵı basqa ósimlikler,
Nil dógeregindegi atızlardaǵı eginler quwrap,
Samal menen ushıp, joq bolar.
8Balıqshılar dad salıp, zar jılar,
Nilge qarmaq salıp, kún kórip otırǵanlar,
Suwǵa aw taslaǵanlar túskinlikke túser.
9Zıǵırdıń qabıǵına islew beriwshiler,
Jaqsı zıǵır tawar toqıwshılar uyatqa qalar.
10Kiyim toqıwshılar qayǵıǵa batıp,
Jallanba jumısshılar túskinlikke túser.

11Soannıń xızmetkerleri qanday aqılsız?
Faraonnıń dana keńesshileri aqmaq keńes beredi.
Sizler qalayınsha faraonǵa:
«Men danıshpannıń ulıman,
Áyyemgi patshalar násilinenmen», – dey alasız.
12Háy faraon, qáne sol dana adamlarıń?
Álemniń Jaratqan Iyesi Mısırǵa qarsı neni maqset qılǵanın,
Olar saǵan aytıp bersin, bildirsin.
13Soannıń xızmetkerleri aqıldan adastı!
Nof húkimdarları aldandı!
Mısırdı óz urıw basshıları joldan adastırdı.
14Jaratqan Iye olarǵa aqılınan adastırıw ruwxın jiberdi,
Óz qusıǵına tayıp jıǵılǵan máskúnem qanday bolsa,
Olar da Mısırdı hámme isinde adastırdı.
15Bas ta, quyrıq ta, palma shaqası da, qamıs ta,
Mısır ushın hesh nárse qıla almadı.

Mısırlılardıń Jaratqan Iyege boysınıwı

16Sol kúni mısırlılar hayal adamǵa uqsap qalıp, Álemniń Jaratqan Iyesi ózlerine qarsı qol kótermey atırıp, qorqıp, titiresedi. 17Yahuda eli mısırlılarǵa qáwip tuwdıradı. Yahudanıń atı atalǵanda, Álemniń Jaratqan Iyesiniń Mısırǵa qarsı shıǵarǵan qararınan hár bir mısırlı qorqatuǵın boladı.

18Sol kúni Mısırda bes qala qanan tilinde sóylep, Álemniń Jaratqan Iyesine sadıq bolıwǵa ant ishedi. Olardıń biri Quyash qalası dep ataladı.

19Sol kúni Mısırdıń ortasına Jaratqan Iyege arnap qurbanlıq orın qurılıp, eldiń shegarasına Oǵan arnalǵan estelik tas qoyıladı. 20Bul Álemniń Jaratqan Iyesi ushın Mısırda bir belgi hám gúwalıq boladı. Olar eziwshiler sebepli Jaratqan Iyege jalbarınǵanda, Jaratqan Iye mısırlılarǵa qutqarıwshı jiberip, ǵamxorlıq qıladı hám azat etedi. 21Jaratqan Iye Ózin mısırlılarǵa tanıtadı hám sol kúni mısırlılar Jaratqan Iyeni tanıydı. Olar qurbanlıqlar hám ǵálle sadaqaları menen Jaratqan Iyege sıyınadı, Oǵan wádeler berip, olardı orınlaydı. 22Jaratqan Iye Mısırdı jazalaydı hám jazalaǵannan keyin Ózi olarǵa shıpa beredi. Mısırlılar Jaratqan Iyege júz buradı, Jaratqan Iye de olardıń jalbarınıwlarına qulaq salıp, olarǵa shıpa beredi.

23Sol kúni Mısırdan Assiriyaǵa keń jol ashıladı. Assiriyalılar Mısırǵa, mısırlılar Assiriyaǵa baradı. Mısırlılar assiriyalılar menen birge sıyınadı.

24Sol kúni Izrail Mısır menen Assiriya qasındaǵı úshinshi el bolıp, olar arqalı dúnya jarılqanadı. 25Álemniń Jaratqan Iyesi: «Xalqım Mısır, Óz qolımnıń isi bolǵan Assiriya hám miyrasım Izrail jarılqansın», – dep olarǵa aq pátiyasın beredi.