‏ Isaiah 2

1Amos ulı Iyshayaǵa Yahuda hám Erusalim haqqında ayan arqalı bildirilgen sóz mınaw:

2Aqırǵı kúnler kelgende,
Jaratqan Iyeniń Úyi qurılǵan taw,
Barlıq tawlardan joqarı bolıp,
Hámme tóbeshiklerden mártebeli boladı.
Pútkil milletler oǵan qaray aǵıladı.
3Kóplegen xalıqlar kelip, bılay deydi:
«Júrińler, Jaratqan Iyeniń tawına,
Yaqıptıń Qudayınıń Úyine kóterileyik.
Ol bizlerge Óz jolların úyretsin,
Bizler de Onıń soqpaqlarınan júreyik».
Óytkeni Nızam Sionnan,
Jaratqan Iyeniń sózi Erusalimnen shıǵadı.
4Jaratqan Iye milletler arasında qazılıq etip,
Kóplegen xalıqlardıń arızın sheshedi.
Endi olar qılıshlarınan pazna,
Nayzalarınan oraq soǵadı.
Millet milletke qarsı qılısh kótermeydi,
Artıq urısıwdı da úyrenbeydi.
5Yaqıptıń urpaqları,
Keliń, Jaratqan Iyeniń nurında júreyik!

Jaratqan Iyeniń kúni

6Sen Óz xalqıńdı, Yaqıptıń urpaqların tárk ettiń,
Óytkeni olardıń ishi shıǵıstıń úrp-ádetlerine tolı.
Olar filistler kibi pal ashadı,
Jat elliler menen qol qısısadı.
7Jeri bolsa, gúmis hám altınǵa tolı,
Ǵáziynesiniń esap-sanı joq.
Eli atlarǵa tolı,
Arbalarınıń esap-sanı joq.
8Olardıń jeri jalǵan qudaylarǵa tolı,
Olar óz qollarınıń isine,
Barmaqları menen soqqan nársege tájim etedi.
9Insan ayaq astı boldı,
Hár biri diz shókti,
Quday, olardı keshirme!

10Jaratqan Iyeniń qorqınıshlı qáhárinen,
Onıń saltanatınıń ullılıǵınan,
Jartaslarǵa kirip alıń,
Topıraq astına jasırınıń.
11Adamnıń menmen názeri tómen qaratılıp,
Tákabbirligi jerge urıladı.
Tek jalǵız Jaratqan Iye sol kúni joqarılatıladı.
12Álemniń Jaratqan Iyesiniń bir kúni bar,
Sol kúni Ol barlıq menmenlerge,
Tákabbirlerge hám barlıq maqtanshaqlarǵa qarsı shıǵıp,
Olardı jerge uradı.
13Lebanonnıń barlıq biyik hám asqınlaǵan kedr aǵashlarına,
Bashannıń barlıq emenlerine,
14Barlıq biyik tawlarǵa,
Barlıq bálent tóbeshiklerge,
15Hár bir biyik minaraǵa,
Hár bir bekkem diywalǵa,
16Barlıq úlken sawda kemelerine,
Barlıq ájayıbatlarǵa qarsı turıladı.
17Adamzattıń menmenligi qulatılıp,
Insan maqtanıshı jerge urıladı.
Tek jalǵız Jaratqan Iye sol kúni joqarılatıladı.
18Jalǵan qudaylar birotala joq boladı.
19Jaratqan Iye jerdi lárzege keltiriw ushın turǵanda,
Onıń qorqınıshlı qáhárinen,
Saltanatınıń ullılıǵınan,
Adamlar jartaslardıń jarıqlarına,
Jerdiń tesiklerine kirip ketedi.
20Sol kúni adamlar ózleri sıyınıw ushın,
Gúmis hám altınnan islegen jalǵan qudayların,
Górtıshqan hám jarǵanatlarǵa taslaydı.
21Jaratqan Iye jerdi lárzege keltiriw ushın turǵanda,
Onıń qorqınıshlı qáhárinen,
Saltanatınıń ullılıǵınan qashıp,
Jartaslardıń jarıqlarına,
Tawlardıń tesiklerine kiriw ushın solay isleydi.
22Demi murnında bolǵan adamzattan úmit etiwdi toqtatıń!
Ol kim bolıptı?