Isa 21 | KaaIBT22L | STEP | Teńiz jaǵasındaǵı shól tuwralı payǵambarshılıq sóz: Qubladan dúbeleylerdiń dúbegeni kibi, Basqınshı da shólden, qorqınıshlı jurttan keledi.

‏ Isaiah 21

Babilon tuwralı payǵambarshılıq

1 Teńiz jaǵasındaǵı shól ^{▼▼ Teńiz jaǵasındaǵı shól – Persiya qoltıǵındaǵı Babiloniyanıń qubla bólegi.} tuwralı payǵambarshılıq sóz:

Qubladan dúbeleylerdiń dúbegeni kibi,
Basqınshı da shólden, qorqınıshlı jurttan keledi.

2 Maǵan bir qorqınıshlı ayan tústi:
Satqan satadı, talawshı talaydı.
Hújim et, Elam! Qamal qıl, Midiya!
Ol sebepli bolǵan nalalardı aqırına jetkeremen.

3 Sol sebepli belim shanshıp,
Tuwatuǵın hayaldıń tolǵaǵı kibi,
Tolǵaq tuttı meni.
Esitkenlerimnen eki búgilip,
Kórgenlerimnen qorqınıshqa tústim.
4 Júregim háwlirip, qorqınısh biylep aldı meni,
Ímırt jabılıwın kútken edim,
Biraq ol meni qorqınıshqa saldı.

5 Gilemler tóselip, dasturxan jayılıp,
Jep hám iship atır eken.
Turıńlar, áskerbasılar, qalqanlarıńızdı maylańlar!

6 Iye maǵan bılay dedi:
«Barıp, gúzetshi qoy, kórgenin aytsın.
7 Ol sawash arbaların, qos at jegilgen arbaǵa mingenlerdi,
Eshekke, túyege mingenlerdi kórse,
Olarǵa muqıyatlı túrde dıqqat qoysın!»

8 Gúzetshi bılay dep baqırdı:
«Mırzam, kún boyı men minarada turaman,
Túnde de óz ornımda náwbetshilikte bolaman.
9 Áne, olar qos at jegilgen sawash arbada kiyatır».
Keyin gúzetshi baqırıp xabarladı:
«Quladı Babilon, quladı!
Onıń qudaylarınıń barlıq músinleri,
Qıyrap jerde jatır».

10 Qırmanda biyday kibi jenshilgen xalqım!
Álemniń Jaratqan Iyesinen, Izraildıń Qudayınan,
Esitkenlerimdi sizlerge ayan qıldım.

Edom tuwralı payǵambarshılıq

11 Duma ^{▼▼ Duma – evreyshe «jım-jırtlıq» degendi bildiredi, biraq bul jerde jeke at sıpatında qollanılıp, arqa Arabiya yamasa edom xalqın bildiriwi múmkin.} tuwralı payǵambarshılıq sóz:

Birew meni Seirden shaqıradı:
«Gúzetshi, tań atıwǵa qansha qaldı?
Gúzetshi, qashan tún tamam boladı?»

12 Gúzetshi bılay deydi:
«Tań atadı, biraq jáne tún qaytıp keledi,
Eger soraǵıńız kelse, qaytıp kelip soray beriń».

Arabstan tuwralı payǵambarshılıq

13 Arabstan tuwralı payǵambarshılıq sóz:

Dedanlılardıń kárwanları!
Arabstan toǵaylarında túneysizler.
14 Tema jeriniń turǵınları!
Shóllegenge suw berińler,
Qashqınlarǵa awqat berińler.
15 Olar qılıshtan, jalańashlanǵan qılıshtan,
Kerilgen oq jaydan, ǵıjlaǵan urıstan qashıp keledi.

16 Iye maǵan bılay dedi: «Bir jıldan keyin, jallanǵan isshiniń múddeti kibi, Kedardıń pútkil saltanatı aqırına jetedi. 17 Kedardıń sarıjayshı jawıngerlerinen azǵantayı ǵana aman qaladı». Bunı Izraildıń Qudayı Jaratqan Iye ayttı.