‏ Isaiah 22

Erusalim tuwralı payǵambarshılıq

1Ayan oypatlıǵı tuwralı payǵambarshılıq sóz:

Ne boldı sizlerge?
Nege hámmeńiz úsheklerge shıǵıp aldıńız?
2Háy, shawqım-súrenge tolı,
Ǵalmaǵallı hám shadlı qala!
Ólgenlerińiz qılıshtan da ólmedi,
Sawashta da ólmedi.
3Húkimdarlarıń birgelikte qashıp ketti,
Biraq oq jaylarınan bir oq atpay-aq tutqınǵa tústi.
Olar uzaqqa qashıp ketken edi,
Tabılǵanlardıń hámmesi tutqınǵa alındı.
4Sonda men bılay dedim:
«Meni jalǵız qaldırıń, ókirip jılap alayın.
Xalqımnıń qırǵınǵa ushıraǵanı ushın,
Táselle bermeń maǵan».

5Sebebi Iye, Álemniń Jaratqan Iyesiniń,
Ayan oypatlıǵında ǵawǵalı,
Zorlıq-zombılıqqa tolı hám ala-sapıran kúni boladı.
Sol kúni diywallar qulap,
Járdem soraǵan dawıslar tawlardı jańǵırtadı.
6Elam oq jay hám oǵın alıp,
Sawash arbaları hám atlıları menen keldi.
Kir áskerleri qalqanların tayarladı.
7Seniń saylandı oypatlıqlarıń sawash arbalarına toldı,
Atlılar qala dárwazası janında sap tartıp tur.
8Jaratqan Iye Yahudanıń bekinislerin kúl-talqan qıldı.

Sol kúni «Lebanon toǵayı» dep atalatuǵın imarattaǵı,
Qural-jaraqqa úmit etip qaradıńız.
9Sizler Dawıttıń qalasınıń diywallarında,
Kóp jarıqlardı kórdińiz.
Tómengi háwizge suw saqlap qoydıńız.
10Sizler Erusalimdegi úylerdi qarap shıǵıp,
Diywaldı pitew ushın, úylerdi buzdıńız.
11Eski háwizdiń suwları ushın,
Eki diywal arasına suw saqlaǵısh qurdıńız.
Biraq bunı Kimniń oylap qoyǵanına názer salmadıńız,
Bunı Kimniń ázelden joba qılǵanına itibar bermedińiz.

12Sol kúni Iye, Álemniń Jaratqan Iyesi,
Jılap, aza tutıwǵa,
Shashlarıńızdı aldırıp, aza kiyim kiyiwge shaqırdı.
13Biraq sizler: «Kelińler, iship-jep qalayıq,
Sebebi erteń ólemiz-ǵo», – dep,
Ógiz soyıp, qoy shalıp,
Gósh jep, sharap iship,
Keypi-sapa qurıp atırsız.

14Sonda Álemniń Jaratqan Iyesi qulaǵıma:
«Bul gúna ólgenińizshe keshirilmeydi», – dedi.
Bunı Iye, Álemniń Jaratqan Iyesi ayttı.

Shebnaǵa eskertiw

15Iye, Álemniń Jaratqan Iyesi bılay deydi: «Qáne, patshanıń oń qolı bolǵan, saray basqarıwshısı sol Shebnaǵa barıp, bılay dep ayt: 16„Bul jerde ne jumısıń bar? Ózińe qábir oyatuǵınday, bul jerde kimiń bar? Joqarıda ózińe qábir qazıp, jartasqa jasaw ushın úńgir oyıpsań. 17Háy, kúshli adam! Jaratqan Iye seni ılaqtırıp jiberedi. Ol seni bekkem uslap alıp, 18aylandırıp-aylandırıp, top kibi keń bir elge ılaqtırıp jiberedi. Sen sol jerde óleseń. Ájayıp sawash arbalarıń sol jerde qaladı hám sen mırzańnıń úyin shermende qılasań. 19Men seni óz lawazımıńnan túsirip, ornıńnan alıp taslayman.

20Sol kúni Men qulım Xilkiya ulı Elyakimdi shaqıraman. 21Seniń kiyimlerińdi oǵan kiygizip, beline belbewińdi baylayman hám hákimshiligińdi oǵan beremen. Ol Erusalim turǵınlarınıń hám Yahuda xalqınıń ákesi boladı. 22Dawıttıń úyiniń giltin onıń moynına asaman. Onıń ashqanın hesh kim jaba almaydı, onıń japqanın hesh kim asha almaydı. 23Men onı qattı jerge qaǵılǵan qazıqtay etip qaǵaman. Ol óz násili ushın saltanat taxtı boladı. 24Onıń xojalıǵınıń pútkil abırayı: onıń urpaqları hám shaqaları – onıń keseden gúzege shekemgi barlıq ıdısları oǵan júklenedi.

25Sol kúni, – deydi Álemniń Jaratqan Iyesi, – qattı jerge qaǵılǵan qazıq bosap, suwırılıp, qulap túsedi. Oǵan ilingen barlıq júk te alıp taslanadı. Bunı Jaratqan Iye ayttı“».