‏ Isaiah 23

Tir tuwralı payǵambarshılıq

1Tir tuwralı payǵambarshılıq sóz:

Úlken sawda kemeleri, jılańlar!
Tir qalası wayran boldı,
Úysiz, baspanasız qaldı.
Kittim jerlerinen olarǵa xabar keldi.
2Teńizden júzip ótkenler arqalı bayıǵan,
Ataw xalqı hám Sidon sawdagerleri, úndemeń!
3Mol suw jolı arqalı,
Shixordıń dáni, Nildiń zúrááti paydańız edi.
Milletlerdiń sawda orayı edińiz.

4Uyal, háy Sidon, teńiz jaǵasındaǵı qorǵan!
Teńiz saǵan bılay deydi:
«Tolǵaq ta tutpadı, tuwmadım da,
Ul da tárbiyalamadım, qız da ósirmedim».

5Xabar Mısırǵa jetkende,
Tir haqqındaǵı xabardan Mısır qorqıp, qayǵıǵa túsedi.
6Tarshishke qaray júziń,
Háy, ataw turǵınları, páriyad etiń!
7Haslında ázelden bar bolǵan,
Uzaq úlkelerge ayaǵı jetip, qonıs basqan,
Shadlıqqa bólengen qalańız usı ma?

8Patshalarǵa taj kiydiretuǵın,
Tirge qarsı bul isti kim belgiledi?
Sawdagerleri húkimdarlar bolıp,
Olar dúnyanıń abıraylı adamları edi.
9Menmenliginiń negizi bolǵan pútkil dańq-ataǵın xorlaw,
Dúnyanıń barlıq abıraylı adamların jer qılıw ushın,
Álemniń Jaratqan Iyesi usılay qarar shıǵardı.

10Háy, qız Tarshish!
Nil sıyaqlı elińdi kesip ót,
Ol jerde endi jaǵıs bolmaydı.
11Jaratqan Iye qolın teńiz ústine sozıp,
Patshalıqlardı titiretti.
Qanan qorǵanların qıyratıwdı buyırdı.
12Ol bılay dedi:
«Háy, ezilgen pák qız Sidon!
Sen endi yoshlanbaysań.
Tur, Kittimge bar,
Ol jerde de ráhát kórmeyseń».

13Kaldeylerdiń jerine qara!
Bul xalıq joq endi.
Assiriyalılar onı jabayı haywanlarǵa berdi.
Olar qalaǵa qarsı aǵash minara tiklep,
Sarayların qıyrattı,
Qalanı qarabaqanaǵa aylandırdı.
14Jılańlar, úlken sawda kemeleri,
Qorǵanıńız wayran boldı!

15Sol kúnnen baslap Tir jetpis jılǵa, bir patshanıń ómirindey waqıtqa umıtıladı. Usı jetpis jıl tamamlanǵanda, buzıq hayal haqqında aytılǵan mına qosıqtaǵılar Tirdiń basına túsedi:

16«Háy, umıtılǵan buzıq hayal!
Lira alıp, qalanı aylan,
Jaqsı nama shertip, bir qansha qosıqlar ayt,
Bálkim, seni eslep qalar».

17Jetpis jıldan soń, Jaratqan Iye Tirge jaqsılıq qıladı. Qala óz sawdasına qaytıp, jer betindegi barlıq patshalıqlar menen buzıqshılıq qıladı. 18Biraq onıń sawdadan hám xızmetten alǵan dáramatları Jaratqan Iyege baǵıshlanadı. Dáramatlar saqlanbaydı da, jıynalmaydı da. Sawdadan alınǵanlar toyǵansha jew, sulıw kiyiniw ushın Jaratqan Iyeniń dárgayında jasaytuǵınlarǵa beriledi.