‏ Isaiah 24

Jaratqan Iye jer betin jazalaydı

1Mine, Jaratqan Iye dúnyanı wayran etip, qarabaqanaǵa aylandıradı,
Jer betin kúl-talqan etip, turǵınların tarqatıp jiberedi.
2Xalıqqa ne bolsa, ruwxaniyge de sol boladı.
Qulǵa ne bolsa, xojayınǵa da sol boladı.
Shorıǵa ne bolsa, biykege de sol boladı.
Qarıydarǵa ne bolsa, satıwshıǵa da sol boladı.
Qarız alıwshıǵa ne bolsa, qarız beriwshige de sol boladı.
Qarızdarǵa ne bolsa, payda alıwshıǵa da sol boladı.
3Jer beti tolıq wayran etilip, tolıq talan-taraj qılınadı.
Bul sózdi Jaratqan Iye ayttı.

4Jer júzi kewip, qurǵap qaladı,
Dúnya sónip, solıydı,
Dúnyadaǵı kúshliler kúshten taladı.
5Dúnyada jasaytuǵınlar jerdi haramladı,
Olar nızamlarǵa boysınbadı, qaǵıydalardı ayaq astı qıldı,
Máńgilik kelisimdi buzdı.
6Sol sebepli dúnyaǵa nálet jawadı,
Turǵınları gúnasınıń jazasına tartıladı.
Jer betinde jasawshılar otqa jaǵılıp,
Tek azǵantay adam qaladı.
7Taza sharap azayadı, júzim putaları solıydı,
Shadlanıp júriwshiler ah uradı.
8Dáptiń shadlı hawazı basıldı,
Quwanǵanlardıń sesti tındı,
Liranıń shadlı hawazı da sóndi.
9Endi qosıq aytıp sharap ishpes,
Ótkir ishimlik dámi de ishkenlerge ashshı túyiler.
10Wayran bolǵan qala qarabaqanaǵa aylanǵan,
Hár bir úy jabılǵan, hesh kim kire almas.
11Kóshelerde sharap ushın nala sheger,
Shadlıq qayǵıǵa aylanǵan,
Quwanısh jer betin tárk etti.
12Qala qarabaqanaǵa aylanǵan,
Qala dárwazaları kúl-talqan bolǵan.
13Záytún aǵashı qaǵılǵanda,
Yaki júzim jıynap alınǵannan keyin,
Qalǵan miywelerge ne bolsa,
Dúnyadaǵı milletlerge de sol boladı.

14Aman qalǵanlar dawısların kóterip,
Shadlanıp baqıradı.
Jaratqan Iyeniń ullılıǵın aytıp,
Batıstan baqıradı.
15Sonlıqtan shıǵısta Jaratqan Iyeni,
Teńiz jaǵasında Izraildıń Qudayı Jaratqan Iyeniń atın dańqqa bóleń.
16Jerdiń shetinen alǵıs-maqtaw qosıqların esitemiz:
«Ádil Bolǵanǵa dańq-ataq bolsın!»
Biraq men bılay dedim:
«Qurıp qaldım, qurıp qaldım!
Sorım qurıydı!
Satqınlar satqınlıq qılmaqta,
Satqınlıǵı sheksiz olardıń».
17Háy dúnyada jasawshılar!
Qorqıw, shuqır hám duzaq basıńızǵa túsedi.
18Sonda qorqıw dawısınan qashqan shuqırǵa túsedi,
Shuqırdan shıqqan duzaqqa túsedi.
Aspan qaqpaqları ashılıp,
Jerdiń tiykarı titireydi.
19Jer bólek-bólek bolıp,
Maydalanıp ketedi,
Ol kúshli silkinedi.
20Jer más adamday súrnigedi,
Dawıldaǵı shertektey shayqaladı,
Qılmısları oǵan awır júk boladı,
Jıǵıladı, qaytıp tura almaydı.

21Sol kúni Jaratqan Iye joqarıdaǵı, kóklerdegi kúshlerdi,
Jerdegi dúnya patshaların jazalaydı.
22Olar zindandaǵı tutqınlar kibi, bir jerge jıynalıp,
Zindanǵa qamaladı hám bir qansha waqıttan keyin, jazalanadı.
23Sonda ay uyalıp, quyash shermende boladı.
Álemniń Jaratqan Iyesi Sion tawında,
Erusalimde patshalıq etip,
Xalıq aqsaqalları aldında Óz saltanatın kórsetedi.