Isa 25 | KaaIBT22L | STEP | Jaratqan Iye, Sen meniń Qudayımsań! Seni ullılayman, atıńa alǵıs aytaman. Sebebi Sen ájayıp isler qıldıń, Ázelden dúzgen rejelerińdi, Sadıqlıq hám isenim menen júzege asırdıń.

‏ Isaiah 25

Alǵıs-maqtaw qosıǵı

1 Jaratqan Iye, Sen meniń Qudayımsań!
Seni ullılayman, atıńa alǵıs aytaman.
Sebebi Sen ájayıp isler qıldıń,
Ázelden dúzgen rejelerińdi,
Sadıqlıq hám isenim menen júzege asırdıń.
2 Sen qalanı tas úyindisine,
Qorǵan qalanı qarabaqanaǵa aylandırdıń.
Jat jerlilerdiń sarayı bolǵan qalanı joq qıldıń,
Ol endi hesh qashan qayta qurılmas.
3 Sonlıqtan kúshli xalıqlar dańqqa bóler Seni,
Rehimsiz xalıqlar qorqar Sennen.
4 Sen jarlılarǵa,
Apatqa ushıraǵanda, kámbaǵallarǵa pana boldıń.
Boranda baspana, jáziyramada saya boldıń.
Rehimsizlerdiń qáhárli demi, diywalǵa urılǵan dawılǵa,
5 Qurǵaq jerdegi ıssıǵa uqsar.
Sen jat jerlilerdiń shawqımın,
Íssını bult sayası menen bastırǵanday bastırdıń,
Rehimsizlerdiń qosıǵı da sóndi.

Quday tayarlaǵan zıyapat

6 Sion tawında Álemniń Jaratqan Iyesi,
Pútkil xalıqlar ushın mol taǵamlı,
Jıllaǵan sharaplı, maylı jilikli,
Tazartılǵan sharaplı zıyapat beredi.
7 Bul tawda Ol barlıq xalıqlarǵa jabılǵan párenjelerdi,
Barlıq milletlerge jabılǵan japqıshlardı joq qıladı.
8 Ol ólimdi máńgige jutıp jiberedi.
Quday Iye hámmeniń kóz jasın súrtip qoyadı,
Óz xalqınıń shermendeligin pútkil jer júzinen alıp taslaydı.
Bunı Jaratqan Iye ayttı.

9 Sol kúni adamlar bılay deydi:
«Mine, bizlerdiń Qudayımız,
Oǵan úmit baylaǵan edik, bizdi qutqardı,
Bul – biz úmit baylap kútken Jaratqan Iye,
Onıń qutqarǵanına quwanıp, shadlanayıq».
10 Jaratqan Iyeniń qolı Sion tawın qorǵaydı,
Dáris taslanǵan shuqırda sabannıń ezilgeni kibi,
Moab ta óz elinde ayaq astı boladı.
11 Júziwshi qolın júziw ushın sermegeni sıyaqlı,
Moab ta dáris ishinde qolların sermeydi.
Biraq qansha háreket etse de,
Jaratqan Iye onıń menmenligin basıp qoyadı.
12 Biyik hám bekkem diywalların jıǵıp, qulatıp,
Jer menen jeksen qıladı.