‏ Isaiah 26

Alǵıs-maqtaw jırı

1Sol kúni Yahuda jerinde mına jır aytıladı:

«Bizde kúshli qala bar!
Qudayımızdıń qutqarıwı,
Diywallar menen qorǵanlar sıyaqlı onı qorǵaydı.
2Dárwazalardı ashıńlar!
Sadıqlıqtı saqlaǵan ádil millet ishke kirsin.
3Saǵan úmit artqanı ushın,
Pikirin Saǵan baǵıshlaǵandı,
Tolıq tınıshlıqta saqlaysań.
4Jaratqan Iyege máńgige úmit bayla,
Óytkeni Ol máńgilik súyewshi jartas.
5Ol tákabbirlerdi jerge urar,
Biyik qalanı qulatar,
Jer menen jeksen qılıp, topıraqqa aylandırar.
6Ol qala ayaq astı bolıp,
Jarlılardıń ayaǵı,
Kámbaǵallardıń tabanı menen basqılanar».

7Ádildiń jolı tegis,
Haq Bolǵan, Sen ádildiń soqpaǵın dúziw qılasań.

8Jaratqan Iye! Húkimlerińe ámel qılıp,
Seni kútemiz.
Atıńdı hám Seni este saqlaw júregimizdiń tilegi.
9Túnde janım Seni ańsaydı,
Ishimdegi ruwxım Seni izleydi.
Jerde húkim júrgizgenińde,
Dúnyada jasawshılar ádillikti úyrenedi.
10Zalımǵa rehim kórsetilse de,
Olar ádillikti úyrenbes.
Hátte, haqıyqatshıllardıń jerinde nahaqlıq eter.
Jaratqan Iyeniń ullılıǵın kórmes.
11Jaratqan Iye, qolıń kóterilgen,
Biraq olar kórmes.
Olar Seniń xalqıńa degen ıqlasıńdı kórip, uyalsın.
Dushpanlarıńa niyetlegen ot olardı jalmasın.

12Jaratqan Iye! Sen bizlerge tınıshlıq bereseń.
Islegen barlıq islerimizdi bizler ushın júzege asırǵan Senseń.
13Qudayımız Jaratqan Iye,
Sennen basqa iyeler bizlerge húkimdarlıq qıldı.
Biraq bizler tek Seniń atıńdı húrmet etemiz.
14Sol iyeler dúnyadan ótti,
Ólilerdiń ruwxları endi ornınan turmaydı.
Sen olardı jazalap, joq qıldıń,
Endi olardı hesh kim yadqa almas.
15Jaratqan Iye, sen milletimizdi kóbeyttiń,
Milletimizdi kóbeytip, dańqqa eristiń,
Elimizdiń shegarasın keńeyttiń.

16Jaratqan Iye, xalqımız qayǵı ishinde Seni izledi.
Sen olardı jazalaǵanda,
Sıbırlap zorǵa duwa etti.
17Jaratqan Iye, bizler de Seniń aldıńda,
Hámiledar hayaldıń tolǵaq azabınan qıynalıp,
Baqırǵanı sıyaqlı qıynaldıq.
18Bizler hámiledar bolıp, tolǵattıq,
Biraq samaldan basqa hesh nárse tuwmadıq.
Jer betine qutqarılıw alıp kelmedik,
Áwladlardı da dúnyaǵa keltirmedik.

19Biraq ólileriń jasar, deneler tiriler.
Háy, topıraq astında jatırǵanlar,
Oyanıń, shadlanıp baqırıń!
Sebebi Jaratqan Iyeniń shıǵı tań shıǵına megzer,
Jer ólilerdi jasaw ushın shıǵarar.
20Keliń, háy xalqım, bólmelerińizge kirip,
Ishten qapını jawıp alıń!
Onıń ǵázebi ótip ketkenshe, az-maz jasırınıp turıń.
21Mine, dúnya turǵınların islegen ayıbına bola jazalaw ushın,
Jaratqan Iye Óz mákanınan shıǵıp kiyatır.
Jer ózine tógilgen qandı áshkara eter,
Óltirilgenlerdi artıq jasırmas.