Isa 28 | KaaIBT22L | STEP | Efrayım máskúnemleriniń maqtanǵan tajı, Ónimdar oypatlıqtıń eń jaqsı jerindegi sharapqa toyǵanlardıń qalası, Hásiret shegedi! Onıń saltanatlı gózzallıǵı, solıp atırǵan gúlge megzeydi.

‏ Isaiah 28

Efrayımnıń hásiret shegiwi

1 Efrayım máskúnemleriniń maqtanǵan tajı,
Ónimdar oypatlıqtıń eń jaqsı jerindegi sharapqa toyǵanlardıń qalası,
Hásiret shegedi!
Onıń saltanatlı gózzallıǵı, solıp atırǵan gúlge megzeydi.
2 Mine, Iyeniń qúdiretli hám kúshli adamı bar,
Ol burshaqlı dawılday, qıyratıwshı quyınday,
Zuwlaǵan topan suwı kibi,
Óz qolı menen qalanı jerge qulatadı.
3 Efrayım máskúnemleriniń maqtanıshı bolǵan tajı,
Ayaq astında qaladı.
4 Ónimdar oypatlıqtıń eń jaqsı jerinde jaylasqan,
Saltanatlı gózzallıǵı solıp baratırǵan gúl,
Erte pisken ánjir kibi boladı.
Onı kórgen, dárriw úzip alıp, jep qoyadı.

5 Sol kúni Álemniń Jaratqan Iyesi xalqınan aman qalǵanlar ushın saltanat tajı, gózzallıq sheńberi boladı. 6 Ol húkim gúrsisinde otırǵanlar ushın ádalatlıq ruwxı, dárwazanı dushpannan qorǵaǵanlar ushın mádet boladı.

Iyshayanıń eskertiwi

7 Mınalar da sharap iship tentireklep, ótkir ishimlik iship teńselip júredi: ruwxaniyler hám payǵambarlar ótkir ishimlik iship tentireklep, sharap iship esten ayırıldı. Olar ótkir ishimlikten teńselip, ayan kórgende shatastıradı, sheshim qabıllaǵanda aljasadı. 8 Pútkil dasturxanları qusıqqa tolǵan, hesh bir taza jeri qalmaydı.

9 Olar bılay deydi: «Quday kimge bilim úyretpekshi? Xabardı kimge túsindirmekshi? Endi emshekten shıqqanlarǵa ma yamasa jaqında emiwdi toqtatqanlarǵa ma? 10 „Ba-ba-ba, da-da-da“, – dep, olay-bulay bıdırlaydı».

11 Endi Jaratqan Iye bul xalıqqa shet ellilerdiń awzı menen, túsiniksiz tillerde sóyleydi. 12 Burın olarǵa: «Bul – tınıshlıq jeri, sharshaǵanlar dem alsın. Bul – dem alıw ornı», – degen edi. Biraq olar tıńlamadı. 13 Jaratqan Iyeniń sózi olar ushın: «„Ba-ba-ba, da-da-da“, – dep, olay-bulay bıdırlaw» boldı. Solay etip, olar ketip, shalqasına qulap jaraqatlanadı, duzaqqa túsip, alıp ketiledi.

14 Sonlıqtan, Erusalimde bul xalıqqa húkimdarlıq etip otırǵan surbetler, Jaratqan Iyeniń sózin tıńlańlar! 15 Sizler: «Bizler ólim menen kelisim dúzdik, óliler mákanı menen pitim dúzdik. Apatshılıq kelse, bizge tiymey, ótip ketedi. Sebebi bizler ótirikti pana, jalǵandı jasırınatuǵın orın qılıp alǵanbız», – deysizler. 16 Sonıń ushın Quday Iye bılay deydi: «Mine, Men Sionǵa tiykar tasın, sınalǵan tastı, qımbatbaha múyesh tasın, isenimli tiykar qoyaman. Oǵan isengenler hesh qashan qáweterge túspeydi. 17 Men ádillikti ólshew jibi, ádalatlıqtı tárezi qılaman. Burshaq jawıp, ótiriktiń panasın sıpırıp alıp ketedi, jasırınǵan ornıńızdı sel basadı. 18 Sizlerdiń ólim menen dúzgen kelisimińiz buzıladı, óliler mákanı menen dúzgen pitimińiz óz kúshin joytadı. Ullı apat kelgende, jer menen jeksen bolasız. 19 Apat hár kelgeninde, sizlerdi sıpırıp alıp ketedi. Ol hár kúni azanda, kúndiz-túni keledi».

Bul xabardı túsingenińizde, sizlerdiń húreyińiz ushadı. 20 Sozılıwǵa tósegińiz dım qısqa, oranıwǵa kórpeńiz dım ensiz boladı. 21 Jaratqan Iye Perasim tawındaǵı sıyaqlı ^{▼▼ 2Pat 5:17-21.} qozǵalajaq, Gibon oypatlıǵındaǵı sıyaqlı ^{▼▼ Eshu 10:7-14.} ǵázepke minejaq. Ol Óz isin, ádetten tıs isin, Óz háreketin, tań qalarlıq háreketin júzege asıradı. 22 Eger kisenleriń jáne de bekkemirek bolmasın deseńiz, bunnan bılay surbetlikti toqtatıń. Pútkil dúnyanı joq qılıwdı sheshkeni tuwralı Iye, Álemniń Jaratqan Iyesinen esittim.

23 Qulaq túrip, dawısımdı esitiń, dıqqat qoyıp, sózimdi tıńlań! 24 Diyxan egin egiw ushın tek jer ayday bere me? Yamasa tek kesek ezip, malalay bere me? 25 Ol jerdi tegislep bolıp, anis egip, zire seppey me? Biydaydı qatarlap, arpanı óz tanabına, jazlıq biydaydı shetine aylandırıp egip taslamay ma? 26 Qudayı oǵan násiyat berip, usınday tártipke úyretedi. 27 Anis túyekke aydalmaydı, zire arbanıń dóńgelegi menen basılmaydı. Anis tayaq penen, al zire shıbıq penen sabalanadı. 28 Nanǵa arnalǵan biyday túyeklenedi, biraq ol máńgige ezile bermeydi. Arbanıń dóńgelegi menen ústinen túyekti aydasa da, atlar biydaydı maydalap ezip taslamaydı. 29 Bul da Álemniń Jaratqan Iyesinen berilgen. Onıń másláháti ájayıp, danalıǵı ullı.