Isaiah 29
Erusalimniń hásireti
1Dawıttıń mákan basqan qalası Ariel ▼▼ Ariel – mánisi anıq emes. Bul atama bul jerde Erusalimdegi Sion tawınıń titulın bildiredi.
, Ariel, hásiret shegeseń!Jılǵa jıl qos, bayramlarıń dawam ete bersin.
2Men Arielge azap shektiremen.
Ol jılap, páriyad etedi,
Men ushın qurbanlıq oshaǵı kibi boladı.
3Seni aylanıp, orda quraman,
Láshkerlerdi ornatıp, qamal qılaman.
Qarsıńa minaralar tikleymen.
4Sen qulatılıp, jerdiń astınan sóyleyseń,
Sózleriń topıraq ishinen esitiledi,
Dawısıń árwaq dawısınday bolıp, jerden shıǵadı,
Sózleriń topıraqtan sıbırlap esitiledi.
5Biraq sansız dushpanlarıń orpań shańǵıt kibi,
Rehimsiz sansız láshkerler suwırılǵan qawıq kibi ushıp ketedi.
Tosattan, bir máwritte,
6Álemniń Jaratqan Iyesi gúldirmama,
Jer qozǵalıwı, ullı shawqım,
Boran, dawıl hám jalmaytuǵın ot jalını menen keledi.
7Arielge qarsı urısqan barlıq milletler,
Oǵan hám onıń qorǵanlı qalalarına hújim qılıp,
Onı ezgenler,
Túndegi tús kibi, túngi kórinis kibi boladı.
8Ash adam túsinde awqat jese de,
Oyanǵanda ash boladı,
Túsinde suw ishken adamnıń da,
Ońında shóli basılmaydı.
Sion tawına qarsı urısqan,
Hámme milletlerdiń sansız ordası da usı awhalǵa túsedi.
9Hayran bolıp, tań qalıń,
Ózińizdi gór qılıń, soqır bolıń,
Más bolıń, biraq sharaptan emes,
Súrnigiń, biraq ótkir ishimlikten emes.
10Jaratqan Iye sizlerge tereń uyqı berdi,
Kózlerińizdi jawıp qoydı, háy, payǵambarlar,
Baslarıńızdı orap qoydı, háy, wáliyler.
11Bul ayanlardıń hámmesi sizler ushın mórlengen orama qaǵazdaǵı sózlerdey bolıp qaldı. Eger oqıp biletuǵın adamǵa orama qaǵazdı berip: «Mınanı oqıp ber», – deseńiz, ol: «Oqıy almayman, bul mórlengen-ǵo», – deydi. 12Eger orama qaǵazdı oqıp bilmeytuǵın adamǵa berip: «Mınanı oqıp ber», – deseń, ol: «Men oqıy almayman», – dep juwap beredi. 13Iyemiz bılay deydi:
«Bul xalıq tek sózi menen Maǵan jaqınlap,
Tek awzı menen Meni sıylaydı.
Biraq júregi Mennen alıs.
Adam oylap tapqan parızlar arqalı Maǵan sıyınadı.
14Sonlıqtan Men bul xalıqtıń arasında jáne bir qúdiretli is,
Tań qalarlıq qúdiretli is isleymen.
Danaları danalıqtan mahrum boladı,
Aqıllıları aqılınan ayırıladı».
15Óz niyetlerin Jaratqan Iyeden jasırıwǵa tırısıp,
Islerin qarańǵılıqta qılıp atırǵanlar, hásiret shegedi!
Olar: «Bizdi kim kóredi, kim bizdi biledi?» – deydi.
16Sizler hámmesin nadurıs túsinip atırsız!
Gúlalshını ılay menen teńlestirip bola ma?
Islengen zat ózin islegenge:
«Ol meni islemedi», – dey me?
Pishimi keltirilgen zat óziniń pishimin islep shıqqanǵa:
«Ol hesh nárseni túsinbeydi», – dep ayta ma?
17Tez arada ájayıp Lebanon bir jıńǵıllıqqa,
Al jıńǵıllıq bolǵan jerler ájayıp toǵayǵa aylanbay ma?
18Sol kúni gereńler orama qaǵazdıń sózlerin esiter,
Qoyıw qarańǵılıq ishinde soqırlardıń kózleri kórer.
19Ezilgenler Jaratqan Iyede jańadan quwanısh tabar,
Jarlılar Izraildıń Muxaddesinde shadlanar.
20Zalımlar joq bolar,
Surbetler ǵayıp bolar,
Jamanlıq tárepdarları joq qılınar.
21Dóhmet qılıp, adamlardı ginalaǵanlar,
Qala dárwazasındaǵı qazıǵa duzaq qurar,
Haqtı jalǵan gúwalıqlar menen huqıqınan mahrum eter.
22Sonlıqtan Ibrayımdı qutqarǵan Jaratqan Iye,
Yaqıptıń urpaqları tuwralı bılay deydi:
«Bunnan bılay Yaqıptıń urpaǵı masqaralanbas,
Endi júzi qara bolmas.
23Meniń qollarım jaratqan balaların óz aralarında kórgende,
Atımdı muxaddes sanaydı.
Yaqıptıń Muxaddesin muxaddes sanap,
Izraildıń Qudayınan qorqatuǵın boladı.
24Joldan adasqanlar túsinedi,
Shaǵım etip nalıytuǵınlar tálimdi qabıl etedi».
Copyright information for
KaaIBT22L