‏ Isaiah 3

Yahuda hám Erusalim ústinen shıǵarılǵan húkim

1Mine, Iye, Álemniń Jaratqan Iyesi,
Erusalimnen hám Yahudadan tirek hám súyenishlerin:
Barlıq nan hám suw dereklerin,
2Batırların hám jawıngerlerin,
Biylerin hám payǵambarların,
Palkerlerin hám aqsaqalların,
3Eliwbasıların hám abıraylı adamların,
Másláhátshilerin, sheber ustaların hám kózbaylawshıların tartıp aladı.
4Ol bılay deydi:
«Men óspirimlerdi olarǵa basshı etip qoyaman,
Olarǵa gódekler húkimdarlıq etedi.
5Adamlar bir-birine qısım jasap,
Qońsı qońsısın jábirleydi.
Jaslar jası úlkenlerdi,
Qarapayımlar abıraylılardı sıylamay qoyadı.
6Sonda adamlar óz ákesiniń xojalıǵındaǵı,
Tuwısqanına jabısıp:
„Seniń ústińde kiyimiń bar eken,
Sen bizlerge basshı bolıp,
Mına wayran bolǵan úyindilerdi qol astıńa al!“– deydi.
7Biraq sol kúni ol baqırıp:
„Men jarańızdı tańa almayman!
Úyimde awqat ta, kiyim de joq.
Meni basshı qılıp qoymańlar“, – deydi».

8Erusalim qıyradı,
Yahuda quladı.
Olardıń sózleri hám isleri Jaratqan Iyege qarsı bolıp,
Onıń saltanatın masqara qıldı.
9Júz kórinisleri ózlerine qarsı gúwalıq beredi,
Sodom sıyaqlı gúnaların ashıq aytadı, hesh jasırmaydı.
Olardıń sorı qurıydı!
Sebebi olar óz basına ózleri apat keltirdi.
10Ádillerge aytıń, olar jaqsılıq kóredi,
Olar óz isleriniń miywesin tatadı.
11Zalımlardıń sorı qurıydı!
Olar jaqsılıq kórmeydi,
Qolı menen islegen isiniń esesin aladı.
12Jas balaları xalqımdı ezedi,
Hayalları olarǵa húkimdarlıq etedi.
Xalqım, jetekshileriń sizlerdi joldan urdı,
Júrer jolıńızdan adastırdı.

13Jaratqan Iye dawa ashıw ushın ornınan qozǵalıp,
Xalıqlardı húkim etiw ushın ayaqqa turdı.
14Jaratqan Iye Óz xalqınıń aqsaqalların hám basshıların húkim etiwge kirisip:
«Sizler júzimzarlarımdı wayran ettińiz,
Úylerińiz jarlılardan talap alǵan oljaǵa tolı.
15Sizler nege Meniń xalqımdı ezip,
Jarlılardı qısqıǵa ala beresiz?» – deydi Iye, Álemniń Jaratqan Iyesi.

16Jaratqan Iye bılay deydi:
«Sion qızları tákabbir,
Murnın aspanǵa kóterip,
Kózlerin súzip júredi,
Ayaqlarındaǵı halqaların shıńǵırlatıp,
Kerilip qádem basadı».
17Sonlıqtan Iyemiz Sion qızlarınıń bas kiyimlerin julıp alıp,
Eńbegin ashıp taslaydı.
18Sol kúni Iyemiz olardıń ayaqlarındaǵı halqalardı,
Shashbawların, yarım ay kórinisindegi bezeniw buyımların,
19Sırǵaların, bileziklerin, oramalların,
Oraypeklerin, tobıǵındaǵı shınjırlardı, iyin japqıshların,
Átir shiyshelerin, tumarların,
20Mór júziklerin, árebeklerin,
21Sánli kiyimlerin, jegdelerin, shekpenlerin, shıjlanların,
22Siyledey juqa kiyimlerin, zıǵır kiyimlerin,
Túrmelerin, jawlıqların tartıp aladı.
23Sonda átirdiń ornın sasıq iyis,
Belbewdiń ornın jip,
Áshekóylengen shashtıń ornın taqır bas,
Sánli kiyimniń ornın aza kiyimi,
Sulıwlıqtıń ornın shermendelik tamǵası basadı.
24Erkeklerińiz qılıshtan óledi,
Jawıngerlerińiz sawash maydanında qaza tabadı.
25Sionnıń dárwazaları jılap, aza tutadı,
Bosap qalıp, paytaxt taqır jerde otırıp qaladı.