‏ Isaiah 30

Qozǵalańshı xalıq

1«Qozǵalańshı balalar, hásiret shegedi!
– deydi Jaratqan Iye, –
Olar Mennen bolmaǵan oy-niyetlerdi júzege asıradı,
Meniń Ruwxımsız kelisimler dúzedi,
Gúna ústine gúna jamaydı.
2Mennen keńes soramay,
Faraonnıń panasında panalaw,
Mısırdıń sayasına tıǵılıw ushın, Mısırǵa baradı.
3Faraonnıń panası sizlerdi uyatqa qaldıradı,
Mısırdıń qorǵawshı sayası sizlerdi biyabıray qıladı.
4Basshıları Soanda bolıp,
Elshileri Xaneske jetken bolsa da,
5Ózlerine paydası bolmaǵan xalıq sebepli olar uyatqa qaladı.
Sol xalıq járdem de, payda da bermeydi.
Tek olardı uyatqa qaldırıp, shermende qıladı».

6Negeb haywanları tuwralı payǵambarshılıq sóz: Urǵashı hám erkek arıslan,
Záhárli sur hám oq jılanlar jasaytuǵın,
Apatlı hám azaplı úlkeni gezip,
Baylıqların esheklerdiń arqasına,
Ǵáziynelerin túyelerdiń órkeshine artıp,
Paydası joq xalıqqa aǵılıp baradı.
7Mısırdıń járdemi paydasız hám úmitsiz.
Sonlıqtan Men onı: «Biykarshı Rahab ▼

▼ Rahab – teńiz aydarhası. Bul jerde Mısırdıń astarlı ataması.

» dep atadım.

8Endi barıp, bunı bir tas taxtaǵa jazıp,
Olarǵa kitap etip ber.
Bul keleshek kúnleri ushın,
Máńgilik gúwalıq bolsın.
9Bul qozǵalańshı xalıq, hiyleker balalar,
Jaratqan Iyeniń táliminen bas tartatuǵın perzentler.
10Olar kózi ashıqlarǵa: «Ayan kóriwdi qısqartıń!»
Al wáliylerge: «Haqıyqattı aytıp, payǵambarshılıq qılmań,
Bizlerge jaǵımlı sózlerdi aytıp,
Qıyalıy payǵambarshılıq etiń,
11Joldan shıǵıń, qaytıń bul joldan,
Izraildıń Muxaddesin kózimizden joq qılıń!» – deydi.

12Sonlıqtan Izraildıń Muxaddesi bılay deydi:
«Bul xabardı qabıl etpey,
Zulımlıq hám jalǵannan úmit etip,
Olarǵa súyengenińiz ushın,
13Bul qılmısıńız sizler ushın,
Biyik diywaldaǵı opırılıp atırǵan tesik kibi boladı.
Diywal tosattan, bir sátte qulap, qıyraydı.
14Ol ılay ıdıs yańlı qıyrap qaladı.
Maydalanǵanı sonshelli,
Oshaqtan kúl alıwǵa da, quyıdan suw alıwǵa da,
Jaraǵanday sınıǵı qalmaydı».

15Sonlıqtan Quday Iye, Izraildıń Muxaddesi bılay deydi:
«Maǵan qaytıp, ráhát tabıń, qutqarılasız.
Eger sizler tınıshlıq penen Maǵan úmit baylasańız, kúshli bolasız.
Biraq sizler bunı qálemedińiz.
16Sizler: „Yaq, bizler atqa minip qashamız“, – dedińiz.
Sonıń ushın qashasız-dá!
Sizler: „Bizler júyrik atqa minip shabamız“, – dedińiz.
Sonıń ushın quwıwshılar da júyrik boladı!
17Bir adamnıń aybatınan mıń adam qashadı,
Besewiniń aybatınan hámmeńiz qashasız.
Qalǵanlarıńız taw tóbesindegi bayraq shıbıǵı,
Tóbeshiktegi bayraq kibi bolasız».

18Jaratqan Iye sizlerge miyrim-shápáát kórsetiw ushın kútip turadı,
Sizlerge rehim kórsetiw ushın ornınan turadı.
Sebebi Jaratqan Iye ádalat Qudayı,
Onı kútkenler baxıtlı!

Jaratqan Iyeniń Óz xalqın jarılqawı

19Háy, Erusalimde jasaytuǵın Sion xalqı,
Endi jılamaysız!
Páriyad etkenińizde, Ol sizlerge miyrim-shápáát kórsetedi.
Esitiwden-aq, Ol sizlerge juwap beredi.
20Iyemiz sizlerge azap shóregin berip,
Apat suwın ishkizgen bolsa da,
Muǵallimińiz endi jasırınbaydı,
Kózińiz benen Onı kóresiz.
21Qulaǵıńız art betten:
«Mınaw durıs jol, sonnan júr», – degen dawıstı esitedi.
Sonda ońǵa burılıw kerek pe, shepke burılıw kerek pe, bilesiz.
22Sonda gúmisiń menen qaplanǵan butlardı,
Altınıń menen qaplanǵan háykellerdi,
Haram dep sanap, haram nársedey kórip, ılaqtırıp taslaysız.
Olarǵa: «Joq bolıńlar!» – deysiz.
23Iyemiz jerge ekken tuqımıń ushın jawın jawdıradı,
Jerdiń zúrááti mol hám bereketli boladı.
Sol kúni mallarıń keń jaylawda jayılıp júredi.
24Jer aydaytuǵın ógiz hám eshekler,
Gúrek hám jaba menen samalǵa suwırılǵan,
Saylandı jem jeydi.
25Ullı qırǵın kúni, minaralar qulaǵanda,
Hár bir biyik tawda, hár bir biyik tóbede suwlar aǵıp turadı.
26Jaratqan Iye Óz xalqınıń jaraların tańıp,
Ózi bergen jaraqattı jazǵan kúni,
Aydıń nurı kún nurınday,
Kúnniń nurı jeti kúnniń nurınday,
Jeti ese jaqtı boladı.

Jaratqan Iyeniń Assiriyanı jazalawı

27Mine, Jaratqan Iyeniń Ózi uzaqtan,
Lawlaǵan qáhári menen qoyıw bult ishinde kiyatır.
Onıń awzı ǵázepke tolı,
Tili jalmaytuǵın otqa megzeydi.
28Demi moyınǵa deyin kóteriletuǵın tasqınǵa uqsaydı.
Ol milletlerdi nabıt bolıw eleginen ótkeredi.
Xalıqlardıń awzına olardı joldan azǵıratuǵın júwen saladı.
29Biraq sizler muxaddes bayramdı nıshanlaǵan túndegidey,
Qosıq aytasız.
Jaratqan Iyeniń tawına, Izraildıń qorǵawshı jartasına,
Sırnay sazı astında shıqqanıńızday,
Júregińiz shadlanadı.

30Jaratqan Iye aybatlı dawısın esittirip,
Lawlaǵan ǵázebi hám jalmaytuǵın ot jalını menen,
Nóser jawın, dawıl hám burshaq penen,
Bileginiń kúshin kórsetedi.
31Jaratqan Iyeniń dawısı Assiriyanı qorqıtıp, titiretedi,
Ol hasası menen Assiriyanı uradı.
32Jaratqan Iyeniń jaza hasası menen,
Olardı urǵan hár bir soqqısı,
Dáp hám lira naması astında ámelge asadı.
Jaratqan Iye qol jumsap, olar menen urısadı.
33Deneler jaǵılatuǵın orın álle qashan tayınlandı,
Awa, Assiriya patshası ushın tayın qılıp qoyıldı.
Ol jer tereń hám keń bolıp,
Otın qalap toltırılǵan.
Aǵıp turǵan kúkirt kibi,
Jaratqan Iyeniń demi onı jandıradı.