Isa 31 | KaaIBT22L | STEP | Járdem sorap Mısırǵa ketkenler, Atlarǵa isengenler, Kóp bolǵanı ushın sawash arbalarına, Júdá kúshli bolǵanı ushın shabandozlarǵa, Úmit baylaǵanlar, hásiret shegedi! Olar Izraildıń Muxaddesine júz burmadı, Jaratqan Iyeden keńes soramadı.

‏ Isaiah 31

Mısırǵa úmit baylamaw tuwralı

1 Járdem sorap Mısırǵa ketkenler,
Atlarǵa isengenler,
Kóp bolǵanı ushın sawash arbalarına,
Júdá kúshli bolǵanı ushın shabandozlarǵa,
Úmit baylaǵanlar, hásiret shegedi!
Olar Izraildıń Muxaddesine júz burmadı,
Jaratqan Iyeden keńes soramadı.
2 Biraq Jaratqan Iye de dana.
Ol baxıtsızlıq jawdırar, Óz sózin qaytarıp almas.
Jawızlıq islewshilerdiń úyine qarsı kóterilip,
Qılmıskerlerge járdem beriwshilerge qarsı shıǵar.
3 Mısırlılar – Quday emes, adam,
Olardıń atları – ruwx emes, deneden ibarat.
Jaratqan Iye qolın kóterse, járdem beriwshi súrnigip,
Járdem alıwshı qulap, ekewi de nabıt boladı.

4 Sebebi Jaratqan Iye maǵan bılay dedi:
«Arıslanǵa, awlaǵan awınıń basında ırıldaǵan jırtqısh arıslanǵa,
Bir topar shopan qarsı shıqsa da,
Arıslan olardıń baqırǵanınan qorqpaydı,
Shuwlasqanınan seskenbeydi.
Álemniń Jaratqan Iyesi de urısıw ushın,
Sion tawına hám onıń tóbelerine túsip keledi.
5 Quslardıń qanat jayıp,
Óz palapanların qorǵaǵanı sıyaqlı,
Álemniń Jaratqan Iyesi de,
Erusalimdi qorǵaydı.
Ol onı qorǵaydı, qutqaradı,
Rehim etip, azat qıladı».

6 Háy izraillılar, ózlerińiz ójetlenip bas tartqan,
Jaratqan Iyege qaytıńlar.
7 Sebebi sol kúni hár birińiz,
Óz qollarıńız benen gúnaǵa batıp,
Gúmis hám altınnan islegen jalǵan qudaylarıńızdan júz burasız.

8 «Assiriyalılar adamdiki bolmaǵan qılıshtan qulaydı,
Adamzattiki bolmaǵan qılıshtan óledi.
Olar qılıshtan qashadı,
Jas jigitleri qul boladı.
9 Qorqıwdan jıǵılar olardıń jartası,
Sárkárdaları bayraqtı kórip, titireser».
Otı Sionda,
Oshaǵı Erusalimde bolǵan Jaratqan Iye usılay deydi.