‏ Isaiah 32

Ádil patsha

1Mine, patsha ádillik penen patshalıq etip,
Húkimdarlar ádalatlıq penen basqaradı.
2Olardıń hár biri samaldan qorǵaytuǵın bastırmaday,
Dawıldan bas sawǵalaytuǵın panaday boladı.
Olar shóldegi aǵın suwǵa,
Kewip shóllegen jerdegi úlken jartastıń sayasına uqsaydı.
3Endi kóretuǵınlardıń kózleri jumılmaydı,
Esitetuǵınlar qulaq qoyadı.
4Oysızlar túsiniwdi úyrenedi,
Saqawlar tutlıqpay, anıq sóyley aladı.
5Bunnan bılay, aqmaq hasılzada, dep shaqırılmas,
Hiyleker húrmetke ılayıqlı, dep aytılmas.
6Aqmaq biyádeplik penen sóyleydi,
Niyeti jamanlıq islewden ibarat.
Ol zorlıq isleydi,
Jaratqan Iyege til tiygizedi,
Ashlardı ash qaldırıp,
Shóllegenge suw beriwden bas tartadı.
7Hiylekerdiń usılı jawız,
Jarlınıń dawası haq bolsa da,
Onı jalǵan sózler menen joq etiw ushın,
Jawız jobalar dúzedi.
8Al hasılzadalar hasıl jobalar dúzip,
Hasıl isler ushın bekkem turadı.

Jazalaw hám qutqarıw

9Háy, erkin jasap atırǵan hayallar,
Ornıńızdan turıp, dawısımdı esitiń!
Háy, biyǵam qızlar,
Meniń sózime qulaq salıń!
10Háy, biyǵam hayallar,
Biraz jıldan keyin titiresesiz,
Sebebi júzim hasıl bermes,
Miywe jıyın-terimi bolmas.
11Háy, erkin jasap atırǵan hayallar, titiresesiz!
Háy, biyǵam qızlar, qaltırasasız!
Kiyimlerińizdi sheship taslap,
Azalap, belińizdi buwıp alıń.
12Ónimdar atızlar ushın,
Hasılı mol júzim shaqaları ushın,
Kókiregińizdi mushlap urıp, aza tutıń.
13Tiken hám jantaqlar basıp ketetuǵın,
Xalqımnıń jeri ushın,
Quwanıshqa tolı úyler,
Shadlıqqa tolı qalalar ushın jılańlar.
14Óytkeni saraylar taslap ketilip,
Shawqımlı qala bos qaladı.
Qorǵan hám minaralar máńgige qıyralıp,
Qulanlardıń quwanıshına,
Mallardıń jaylawına aylanadı.
15Ústimizge joqarıdan Ruwx tógilgenshe,
Shól ónimdar atızǵa aylanǵansha,
Ónimdar atız ájayıp baǵ dep sanalǵansha usılay boladı.
16Keyin shólde ádalat mákan basıp,
Ádillik ónimdar atızda jasaydı.
17Ádilliktiń miywesi tınıshlıq,
Nátiyjesi amanlıq hám máńgilik qáwipsizlik boladı.
18Xalqım tınısh orınlarda,
Qáwipsiz úylerde,
Ráhát baǵıshlaytuǵın jerlerde jasaydı.
19Toǵay pútkilley joq bolsa da,
Qala jer menen jeksen etilse de,
20Sizler baxıtlı bolasızlar!
Hár bir dárya jaǵasında egin egesiz,
Ógiz hám esheklerdi bos jiberesiz.