‏ Isaiah 33

Járdem sorap jalbarınıw

1Háy, ózi wayran etilmegen,
Wayran etiwshi, hásiret shegeseń!
Háy, ózine satqınlıq islenbegen,
Satqınlıq etiwshi, hásiret shegeseń!
Wayran etip bolǵanıńnan keyin,
Óziń de wayran etileseń,
Satqınlıq etip bolǵanıńnan keyin,
Ózińe de satqınlıq islenedi.

2Jaratqan Iye, bizlerge rehim et!
Bizler Saǵan úmit bayladıq.
Hár tańda bizge kúsh-quwat berip,
Qıyınshılıqqa ushıraǵanımızda qutqara gór!
3Qúdiretli dawısıńnan xalıqlar qashıp keter,
Ornıńnan turǵanıńda, milletler pıtırap qashar.
4Oljańız shegirtkeler jep taslaǵanday joq bolar,
Adamlar úlken shegirtkeler toparınıń topılǵanınday oljaǵa bas salar.

5Joqarıda mákan qurǵan Jaratqan Iye ullı!
Toltırar Ol Siondı ádalatlıq hám ádillikke.
6Ol seniń dáwirińniń bekkem tiykarı bolıp,
Mol etip qutqarılıw, danalıq hám bilim berer.
Jaratqan Iyeden qorqıw – bul ǵáziyne.

7Mine, batırları kóshelerde páriyad eter,
Paraxatshılıq elshileri zar eńirep jılar.
8Úlken jollar bosap qalar,
Jolawshılar ol joldan júrmes.
Pitimler buzılıp, ishken antlarınan tayar,
Adamlar qádirin joytar.
9Jer qurǵap, kewip barar,
Lebanon toǵayları uyattan quwrap qalar.
Sharon tegisligi shólge uqsap qalıp,
Bashan hám Karmeldegi aǵashlar japıraqların tóger.

Jaratqan Iyeniń xalıqlarǵa eskertiwi

10«Endi ornımnan turaman,
– deydi Jaratqan Iye, –
Kóterilip, dańqımdı shıǵaraman.
11Sizler pishenge hámiledar bolıp, saban tuwasız.
Demińiz ózlerińizdi jalmap jutatuǵın otqa aylanadı.
12Xalıqlar janıp kúl boladı,
Kesilip, otqa jaǵılǵan tikendey boladı.
13Háy uzaqtaǵılar, ne islegenimdi esitiń!
Háy jaqındaǵılar, qúdiretimdi biliń!»

14Siondaǵı gúnakarlar qorqıwǵa túsip,
Qudaysızlardı titirew biylep aldı.
Olar bılay deydi:
«Jalmaytuǵın ottıń janında qaysısımız jasay alamız?
Máńgi janıp turǵan jalın janında qaysısımız ornalasa alamız?»
15Hadal jasap, tuwrı sóylegen,
Zorlıq penen alınǵan paydadan jerkengen,
Qolın para alıwdan tıyǵan,
Qanxorǵa qulaq túrmegen,
Jamandı kórmew ushın kózlerin jumǵan,
16Bunday adam biyikliklerde jasaydı.
Jartaslardaǵı qorǵanlar onıń panası boladı,
Onıń nanı mol bolıp, hesh qashan suwsız qalmaydı.

Ullı patshanıń eli

17Kózińiz patshanı pútkil gózzallıǵı ishinde kórip,
Uzaqlarǵa sozılǵan úlkeni sholıp óter.
18Ótken qorqınıshlı kúnler haqqında oylap:
«Salıq jıynaǵan qay jerde?
Salıqtı ólshep alǵan qay jerde?
Minaralardı sanaǵan qay jerde?» – deyseń.
19Bunnan bılay, gápine túsinbeytuǵın,
Basqa tilde sóyleytuǵın,
Sol tákabbir xalıqtı kórmeysiz.
20Bayramlarımız belgilenetuǵın Sion qalasına qara!
Kózleriń tınısh mákandı,
Bekkem shatır bolǵan Erusalimdi kóredi.
Onıń qazıqları hesh qashan ornınan suwırılmaydı,
Birde bir jibi úzilmeydi.
21Keń dáryalar hám saylar aǵıp turǵan jerde,
Qúdiretli Jaratqan Iye bizler menen birge boladı.
Olardan eskekli kemeler de,
Jelqomlı kemeler de óte almaydı.
22Jaratqan Iye biziń qazımız,
Ol bizlerdiń nızam shıǵarıwshımız.
Jaratqan Iye biziń patshamız,
Ol bizlerdi qutqaradı.
23Házir kemelerińizdegi jipler juqarıp,
Olar órlikti uslap tura almaytuǵın,
Jelqomdı da asha almaytuǵın bolsa da,
Waqtı kelgende úlken olja bólinedi,
Hátte, aqsaqlar da oljasın aladı.
24Sion turǵınlarınıń hesh biri: «Men keselmen» – demeydi,
Ol jerde jasaǵan xalıqtıń gúnası keshiriledi.