‏ Isaiah 34

Milletler ústinen húkim

1Háy milletler, jaqınıraq kelip, qulaq salıń!
Háy xalıqlar, dıqqat awdarıń!
Jer hám onı toltırıp turǵanlar,
Dúnya hám onda tuwılǵanlardıń barlıǵı esitsin!
2Jaratqan Iyeniń pútkil milletlerge qáhári kelip,
Olardıń pútkil láshkerlerine qarsı ǵázebi lawladı.
Ol olardı pútkilley joq qılıp,
Bawızlaw ushın tapsırdı.
3Olardıń ólikleri dalaǵa ılaqtırıp taslanıp,
Shirip, sasıp jatadı,
Tawlar olardıń qanına bılǵanadı.
4Pútkil aspan deneleri shirip ketedi,
Aspan orama qaǵazday shıyırıladı.
Júzim aǵashınıń japıraǵınday,
Ánjir aǵashınıń japıraǵınday bolıp,
Ondaǵı pútkil barlıq solıp tógiledi.

5Jaratqan Iye bılay deydi:
«Qılıshım kóklerde qanǵa toydı.
Endi, qılıshım jazalaw ushın Edomnıń ústine,
Pútkilley joq qılıwdı qarar etken xalıqtıń ústine túsedi».

6Jaratqan Iyeniń qılıshı qanǵa toyınıp hám mayǵa bılǵanıp,
Qozı menen tekeniń qanına,
Qoshqardıń bóteke mayına toyǵan.
Jaratqan Iyeniń Bosrada qurbanlıǵı bar,
Edom jerinde ullı qırǵın boladı.
7Jabayı buǵalar, tanalar hám kúshli buǵalar da,
Olar menen birge qulaydı.
Olardıń jeri qanǵa suwǵarıladı,
Topıraǵı mayǵa toyadı.
8Sebebi bul kún Jaratqan Iyeniń ósh alıw kúni,
Sionnıń dawası ushın ósh alatuǵın jıl boladı.

9Sonda Edomnıń dáryaları qara mayǵa,
Topıraǵı kúkirtke,
Jeri janıp turǵan qara mayǵa aylanadı.
10Ol kúni-túni óshpey,
Tútini máńgige kóterilip turadı.
Sol jer áwladtan-áwladqa qańırap, bos qaladı.
Endi hesh qashan ol jerden hesh kim ótpeydi.
11Uzaqsha hám kirpitikenler ol jerdi iyelep alıp,
Qulaqlı japalaq hám ǵarǵalar mákan basadı.
Jaratqan Iye onıń ústinen tártipsizlik jibin,
Wayran bolıw aspa rejesin tartadı.
12Aqsúyekleri sol jerde patshalıq joqlıǵın aytadı,
Pútkil húkimdarları joq bolıp ketedi.
13Onıń saraylarına tikenler,
Qorǵanlarına jantaq hám oshaǵanlar ósip,
Saǵallardıń mákanına,
Úkilerdiń baspanasına aylanadı.
14Ol jerde jabayı haywanlar sırtlanlarǵa dus keledi,
Teke máńirep bir-birin shaqıradı.
Túnde janzatlar sol jerde dem alıp, tınım tabadı.
15Bayıwlılar sol jerge uya salıp,
Máyek basıp shıǵarıp,
Palapanların qanatı astına jıynaydı.
Shayquslar da sol jerde jup-jubı menen toplanadı.

16Jaratqan Iyeniń kitabınan oqıp, izleń:
Bulardan hesh biri joǵalmaydı,
Hesh biri jupsız qalmaydı.
Sebebi bul buyrıq Jaratqan Iyeniń awzınan shıqtı,
Onıń Ruwxı olardı jıynaydı.
17Jaratqan Iye olar ushın shek tasladı,
Óz qolı menen jerdi ólshep berdi.
Olar sol jerdi máńgige iyelep,
Áwladtan-áwladqa sol jerde jasaydı.