Isaiah 35
Azat bolǵanlardıń Sionǵa qaytıwı
1Shól hám qurǵaq aymaq quwanadı,Qula dúz shadlanıp, nargiz kibi gúlleydi.
2Jaynap gúllep shadlanadı, shadlanıp baqırısadı.
Oǵan Lebanonnıń dańqı,
Karmel hám Sharonnıń saltanatı beriledi.
Olar Jaratqan Iyeniń dańqın,
Qudayımızdıń saltanatın kóredi.
3Hálsiz qollarǵa kúsh berip,
Qaltıraǵan dizelerge quwat beriń.
4Qoyanjúreklerge bılay deńler:
«Márt bolıń, qorqpań!
Qudayıńız ósh alıwǵa,
Esesin qaytarıwǵa kelip,
Sizlerdi qutqaradı».
5Sonda soqırlardıń kózleri,
Gereńlerdiń qulaqları ashıladı.
6Aqsaq adam kiyiktey sekirip,
Gúńelek shadlanıp baqıradı.
Shólden qaynar bulaqlar shıǵıp,
Qula dúzde saylar aǵadı.
7Qaynaǵan shól kólge aylanıp,
Shóllegen dala bulaqlarǵa toladı.
Saǵallar mákan basqan jerlerde,
Kók shóp, qamıs hám jeken ósedi.
8Sol jerde dárbent jol bolıp,
Ol «Muxaddes jol» dep ataladı.
Napákler onnan ótpeydi,
Aqmaqlar da ol jolǵa ayaq baspaydı.
Ol tek Qudaydıń xalqınıń jolı boladı.
9Ol jerde arıslan bolmaydı,
Hesh qanday jabayı ańlar da ol jolǵa shıqpaydı,
Olar ol jerden tabılmaydı.
Ol joldan qutqarılǵanlar ǵana júredi.
10Jaratqan Iyeniń azat etkenleri izge qaytadı,
Qosıq aytıp Sionǵa qaytıp keledi.
Olar máńgilik quwanısh tajın baslarına kiyedi.
Quwanısh hám shadlıqqa tolıp tasıp,
Qayǵı hám ǵam-táshiwish qashıp ketedi.
Copyright information for
KaaIBT22L